استانادا العاش رەت 25-26 تامىز ارالىعىندا «Astana Vine Fest» اتتى جاستار فەستيۆالى وتەدى. ەلىمىزدىڭ ەڭ تانىمال ۆاينەرلەرى ءوزارا جارىسقا ءتۇسىپ, ۇزدىكتەر انىقتالاتىن بولادى.
– ەلباسىمىز «بولاشاققا باعدار: رۋحاني جاڭعىرۋ» اتتى ماقالاسىندا جاستارعا ناقتى مىندەتتەر مەن ماقساتتاردى جۇكتەدى. پرەزيدەنت قوعام ساناسىنىڭ رۋحاني جاڭعىرۋىن بىرنەشە باعىتتارعا ءبولىپ, قاي-قايسىندا دا جاستارعا زور ءۇمىتىن ءبىلدىردى. سوندىقتان ءبىز, جاستار, 21 عاسىرعا لايىقتى قاسيەتتەردى قالىپتاستىرىپ, بولاشاققا ۇمتىلۋىمىز كەرەك.
وزدەرىڭىز بىلەتىندەي, بۇگىندە جاستار اراسىندا «ۆاين» دەگەن باعىت كەڭىنەن تارالىپ كەلەدى. سول سەبەپتى, استانا قالاسى جاستار ساياساتى ماسەلەلەرى باسقارماسى ەلوردادا «Astana Vine Fest» اتتى ۆاينەرلەردىڭ جاستار فەستيۆالىن ۇيىمداستىرۋدى ۇيعاردى. بۇل جوبانىڭ ماقساتى – جاس بۋىن وكىلدەرىنە قولداۋ كورسەتۋ, سونداي-اق, رۋحاني جاڭعىرۋ تاقىرىبىن دارىپتەۋ, – دەيدى باسقارمانىڭ باس مامانى المات دوسقاليەۆ.
بايقاۋ شارتى بويىنشا ۆاينەرلەر ءۇي تاپسىرماسى رەتىندە پرەزيدەنت ن.نازارباەۆتىڭ «بولاشاققا باعدار: رۋحاني جاڭعىرۋ» اتتى ماقالاسىنا ۆاين (بەينەروليك) ءتۇسىرۋى كەرەك. وتىنىمدەر 20 تامىزعا دەيىن 5 اتالىم بويىنشا قابىلدانادى. كەلىپ تۇسكەن جۇمىستارعا «قازاقستان» رترك باس پروديۋسەرى, كۆن ويىنشىسى نۇرلان قويانباەۆ باستاعان توپ قازىلىق ەتەدى.
ال «حالىق تاڭداۋى» اتتى اتالىمدا كورەرمەن كوڭىلىنەن شىققان ۆاينگە VineFest.kz سايتىندا داۋىس بەرە الادى. ۇيىمداستىرۋشىلار اۋەسقويلارعا دا ارناپ بايقاۋ جاريالادى. قاتىسام دەۋشىلەر «استانا جاستارى», «Smile Astana», «ەكسپو-2017» حالىقارالىق مامانداندىرىلعان كورمەسى جانە ەلوردا جايلى ءبىر مينۋتتان اسپايتىن ۆاين ءتۇسىرىپ, ونى ينستاگرام الەۋمەتتىك جەلىسىندە جاريالاۋى كەرەك. ۇزدىك دەپ تانىلعان جۇمىسقا ارنايى سىيلىقتار تاعايىندالعان.
فەستيۆال ەكى كۇنگە جالعاسادى. باعدارلاما اياسىندا قاتىسۋشىلار «EXPO-2017» كورمەسىنە ساياحات جاساپ, دەمەۋشىلەرمەن, EXPO ەرىكتىلەرىمەن جانە اۋلا كلۋبتارىنىڭ تاربيەلەنۋشىلەرىمەن كەزدەسەدى. ۇزدىكتەردى ماراپاتتاۋ سالتاناتى قازاقستاندىق ەسترادا جۇلدىزدارىنىڭ قاتىسۋىمەن بولاتىن كونتسەرتتە وتەدى.
كوپشىلىكتىڭ كوزايىمىنا اينالعان «Yuframe», «Jokeasses», «4juniors», «XAXA Show», «Queex» سىندى ۆاين توپتارى مەن نۇرلان باتىروۆ, جەڭىس وماروۆ, ناعيما احمەتوۆا, ءبىرجان ءاشىم سىندى ۆاينەرلەر ءوزارا باسەكەگە تۇسەدى دەپ كۇتىلۋدە. جارىستا «جىلدىڭ ۇزدىك ۆاينەرى», «ۇزدىك ەر ادام ءرولى», «ۇزدىك ايەل ادام ءرولى», «ۇزدىك ەپيزودتىق ءرول» دەگەن اتالىمدار بار. جەڭىمپازدارعا 500 مىڭ تەڭگە سىياقى تاعايىندالىپ, اتاۋلى ستاتۋەتكالار تابىستالادى. بۇعان قوسا ولار ايتۋلى سىيلىقتار مەن EXPO كورمەسىنە ەكى بيلەتتى ۇتىپ الادى.
گۇلدانا
تالعاتقىزى
