ەرتەڭ «استانا وپەرا» تەاترىنىڭ ۇلكەن زالىندا موريس جارردىڭ «پاريج قۇداي اناسىنىڭ سوبورى» شىمىلدىعىن اشادى. الەم ساحنالارىندا قويىلىپ, تالايدىڭ جۇرەگىن جاۋلاعان بالەتتى ەندى استانالىقتار دا كورە الادى.
فرانتسۋزدىڭ ۇلتتىق كلاسسيكالىق بالەتى ايگىلى حورەوگراف رولان پەتيدىڭ نۇسقاسى بويىنشا قويىلماق. قويىلىمنىڭ حورەوگرافياسى مەن ستسەنوگرافياسى «استانا وپەرا» ساحناسىنا سول كۇيى ۇسىنىلادى.
كورەرمەن بۇل جولى ساحنا تورىنەن كوركەم بەزەندىرىلگەن دەكوراتسيانى كورە الادى. كەڭ پوديۋمدار, قوڭىراۋ, سوبوردىڭ سۇلباسى, ارتقى فونداعى ءپاريجدىڭ سۋرەتى مەن دار اعاشى سىندى دەكوراتسيالار كوپتىڭ كوكەيىندە ۇزاق ۋاقىت ساقتالاتىن بولادى. كوركەمدىك-وندىرىستىك كەشەننىڭ جەتەكشىسى ۆيكتور كارارەنىڭ ايتۋىنشا, رەنە اللونىڭ ستسەنوگرافياسىنا ءبىر عانا وزگەشەلىك ەنگىزىلگەن, ول – «استانا وپەرا» ساحناسى پاريج وپەراسىنىڭ ساحناسىنان ۇلكەن بولعاندىقتان, ساحنا كولەمىنىڭ كەڭەيتىلگەندىگى. ولاردى دايىنداماس بۇرىن ساحنالىق جوبالار مەن قويىلىم جۇمىستارىن جۇزەگە اسىرۋ بارىسىندا ءبىر ايعا جۋىق سىزبالار جاسالعان.
ال, حورەوگرافياعا كەلەر بولساق, ەسمەرالدانىڭ رولىندە – ءمادينا باسپاەۆا جانە ايگەرىم بەكەتاەۆا, كلود فروللو ءرولىن – سەرىك ناقىسپەكوۆ پەن عازيز رىسقۇلوۆ, فەب ءرولىن – جاندوس اۋباكىروۆ پەن ارمان ورازوۆ سومدايدى.
– «پاريج قۇداي اناسىنىڭ سوبورى» – كەز كەلگەن تەاتردىڭ قويۋعا مۇمكىندىگى جەتە بەرمەيتىن بالەت. ناقتىلىق پەن دالدىكتى تالاپ ەتەتىن حورەوگرافيا – ارتىستەرگە سىناق. بۇل ولار ءۇشىن اۋىر ءارى وتە پايدالى. ترۋپپادا ەسمەرالدا دا, كۆازيمودو دا بار. كەز كەلگەن ءارتىستىڭ رەپەرتۋارىندا قىزىقتى دا درامالىق ءرولدىڭ بولۋى ۇلكەن ساتتىلىك دەپ ەسەپتەيمىن, بارىنە بىردەي مۇنداي باقىت بۇيىرا بەرمەيدى, – دەيدى «استانا وپەرا» بالەتىنىڭ كوركەمدىك جەتەكشىسى التىناي اسىلمۇراتوۆا.
گۇلميرا شارحانقىزى
