جاقىندا قالا اكىمدىگىنىڭ مۇقتاج ازاماتتاردىڭ جەكەلەگەن ساناتتارىنا تۇرعىن ءۇي ساتىپ الۋعا الەۋمەتتىك كومەك كورسەتۋ ەرەجەسىنە ءتيىستى وزگەرىستەردى ەنگىزۋ تۋرالى قاۋلىسىنا قول قويىلدى. سوعان سايكەس استاناداعى الەۋمەتتىك قىزمەت كورسەتۋ ورتالىقتارىنىڭ, قارت ادامدار مەن مۇگەدەكتەرگە ارنالعان داعدارىس جانە بەيىمدەۋ ورتالىقتارىنىڭ قىزمەتكەرلەرى مۇعالىمدەر, دارىگەرلەر, پوليتسەيلەر سياقتى 1 ملن تەڭگەلىك تۇرعىن ءۇي سەرتيفيكاتتارىن الا الاتىن بولدى. بۇل تۋرالى قالالىق قوعامدىق كەڭەس وتىرىسىندا قۇرىلىس جانە تۇرعىن ءۇي ساياساتى باسقارماسىنىڭ باسشىسى رۋسلان احمەتوۆ مالىمدەدى.
ونىڭ ايتۋىنشا, قازىر قالادا 1260 الەۋمەتتىك قىزمەتكەر جۇمىس ىستەيدى. ولاردىڭ 482-ءسى – تۇرعىن ۇيگە مۇقتاج. بۇل قىزمەتكەرلەردىڭ ورتاشا جالاقىسى 70 مىڭ تەڭگەنى قۇرايدى. بىلتىر تۇرعىن ءۇي سەرتيفيكاتتارىنا 100 ملن تەڭگە ءبولىندى. قارجى تولىعىمەن يگەرىلدى, ياعني 100 ادام سەرتيفيكاتتاردى الدى. بيىل ءتيىستى سومانى ەداۋىر ارتتىرىپ, 2 ملرد تەڭگە ءبولۋ جوسپارلانىپ وتىر.
قوعامدىق كەڭەس مۇشەلەرى اتالمىش كومەك بولاشاقتا جالاقىلارى تومەن مادەنيەت جانە سپورت قىزمەتكەرلەرىنە كورسەتىلە مە دەپ سۇرادى. باسقارما باسشىسى بۇل ماسەلەنى ءماسليحات دەپۋتاتتارىمەن, قوعامدىق كەڭەس مۇشەلەرىمەن, جەرگىلىكتى اتقارۋشى ورگاندارىمەن جان-جاقتى قاراپ, شەشىمىن شىعارۋ كەرەكتىگىن ەسەپتەيتىنىن جەتكىزدى.
«سەرتيفيكاتتار تۇرىندە كومەك بەرۋدىڭ ءبىر ۇتىمدى تۇسى بار. سول ارقىلى ءبىز تۇرعىن ءۇي كەزەگىندە تۇرعان مامانداردىڭ سانىن قىسقارتامىز. سەرتيفيكاتقا يە بولعاندار بەرىلگەن قارجىنى باسقا ماقساتتارعا پايدالانباي, ءۇش ايدىڭ ىشىندە الاتىن باسپانانى تابۋى ءتيىس. ەگەر وسى ۋاقىت ارالىعىندا تابا الماسا, وندا اقشانى قايتارادى. ولارعا وسىنداي شارت قويىلدى. ءبىر اتاپ وتەرلىگى, سەرتيفيكاتتى پايدالانا الماعان ادام ونى الۋعا ەكىنشى رەت ءوتىنىش بەرە الادى» دەدى ر.احمەتوۆ.
