«تۇرعىن ءۇي كەزەگىم قاشان كەلەدى؟», «ءوز ماماندىعىم بويىنشا جۇمىسقا تۇرا الام با؟», «الداپ كەتكەن مەردىگەردى قايدان تاپساق بولادى؟», «ەڭبەكاقىمىزدى قاشان الامىز؟», «جەرىمنىڭ قۇجاتىن نەگە زاڭداستىرمايدى؟..» كەشە حالىقتىڭ كوكەيىندە جۇرگەن وسىنداي ساۋالدارعا استانا قالاسى اكىمىنىڭ ورىنباسارى اسقار ءامرين جانە باسقارما ماماندارى جاۋاپ بەردى.
«نۇر وتان» پارتياسىنىڭ عيماراتىنا جينالعان حالىق كوپ. ولاردىڭ ارقايسىسى ءارتۇرلى ماسەلەمەن كەلىپ تۇر. ماسەلەن, ەڭبەك جانە الەۋمەتتى قورعاۋ باسقارماسىنىڭ ماماندارىنا جولىققىسى كەلگەن جىگىتتەر التى ايدان بەرى جالاقىلارىن الا الماي جۇرگەندەرىن ايتادى.
«ءبىز جەكە كاسىپكەر نارمەتوۆانىڭ قاراماعىندا جۇمىس ىستەدىك. قۇرىلىس جۇمىستارىنا بىزدەن باسقا جيىرماعا جۋىق ادامدى تارتتى. ءبارىمىزدىڭ جالاقىمىزدى بەرمەي كەتتى. جۇمىسقا قابىلدانار كەزدە تەك ءتورت اداممەن عانا كەلىسىمشارت جاساسقان. قازىر وسى ماسەلەنى كوتەرىپ جۇرگەن – تورتەۋمىز. ال قالعان جۇمىسشىلار قولدارىندا ەشقانداي قۇجات بولماعان سوڭ, سان سوعىپ قالدى. شىنىمىزدى ايتساق, بارماعان جەرىمىز جوق. سوتقا دەيىن شاعىمداندىق. ءتىپتى سوت ۇكىمى ءبىزدىڭ پايدامىزعا شەشىلدى. الماتى اۋداندىق سوتى كاسىپكەردەن جالاقىمىزدى ءوندىرۋدى تالاپ ەتتى. ەندى ءبىزدىڭ ىسىمىزبەن اينالىساتىن جەكە سوت ورىنداۋشى ەشقانداي كومەك بەرە المايتىنىن ايتتى. سەبەبى ونىڭ ەسەپشوتىندا ەشقانداي اقشا جوق. جەكە باسىندا كولىك, ءۇي سەكىلدى مۇلكى دە جوق. ءبىزبەن جاساسقان كەلىسىمشارتى دا جالعان بولىپ شىقتى. ول ايەلىنىڭ اتىنداعى «يپ» ەكەن. ۇلتى وزبەك ازاماتى بىزدەن باسقا دا جۇمىسشىلاردى الداپ ءجۇرۋى مۇمكىن عوي» دەيدى ارىزدانعان جىگىتتەردىڭ ءبىرى تولەبي ابدىبەكۇلى. ونىڭ ايتۋىنشا, جۇمىسشىلار «پريگورودنىي» اۋدانىندا جەڭىل رەلستى ترامۆاي جولىن سالۋعا قاتىسقان. وسى ماسەلە بويىنشا ودان ءارى تىڭداعان استانا قالاسى ءىىد جەرگىلىكتى پوليتسيا قىزمەتىنىڭ ماماندارى الگى مەردىگەردىڭ ۇستىنەن ۇجىمدىق ارىز قابىلداپ الدى. ەندى الاياقتىق بابى بويىنشا قىلمىستىق ءىس قوزعالماق.
جالپى, تۇرعىن ءۇي مەن جەرگە قاتىستى ساۋالمەن كەلگەن جۇرتتىڭ قاراسى كوپ بولدى. سونىڭ ءبىرى – ىسقاقوۆا مينزيرا. ايتۋىنشا, ءوزىنىڭ اتىنداعى باعباندىققا ارنالعان جەرىنە اكىمدىك كەلىسىمشارتتى ۇزارتۋدان باس تارتقان.
بۇل جەردى 2006 جىلى جالعا الدىم. بارلىق قۇجاتتارىم تۇگەل. بۇرىن كەلىسىمشارتتى ۇزارتۋ ءۇش جىلدا ءبىر جۇرگىزىلەتىن ەدى. قازىر جىل سايىن ۇزارتامىز. وسى جولى مەرزىمىنەن 5 كۇن كەشىگىپ تاپسىردىم. ويتكەنى جاڭا جىلدىق مەرەكەمەن سايكەس كەلىپ قالدى. ونداعى ماماندار اتالمىش قۇجاتتاعى 5-پۋنكتەگى «جالداۋ مەرزىمى اياقتالۋدان ءبىر اي بۇرىن تاپسىرۋ كەرەك» دەگەن قاعيدانى العا تارتىپ وتىر. الدىندا مۇنداي پۋنكتتەرگە نازار اۋدارمايتىن. قايبىر جىلدارى ءتىپتى ءتورت جىلعا دەيىن ۇزارتۋدان باس تارتىپ ەدى. سول كەزدە سوتقا جۇگىنىپ, سول ارقىلى قايتارىپ العانمىن. ەندى كەلىپ تاعى ۇزارتۋدان باس تارتىپ وتىر» دەيدى قالا تۇرعىنى. «جەرىمە بىرەۋلەردىڭ كوزى ءتۇسىپ ءجۇر» دەگەن كۇدىگىن دە جاسىرمادى. ماسەلەنىڭ ءمانىسىن جان-جاقتى تىڭداعان استانا قالاسى جەر قاتىناستارى جانە جەردىڭ پايدالانىلۋى مەن قورعالۋىن باقىلاۋ باسقارماسىنىڭ باسشىسى نازىمبەك كەنجەباەۆ بۇل ارادا ءبىر تۇسىنبەۋشىلىكتىڭ بارىن ايتتى.
«اكىمدىكتىڭ شەشىمىندە جەردى بۇرىنعى بەرىلگەن شارتى بويىنشا بەلگىلەنگەن ۋاقىتتا پايدالانۋ كەرەك دەلىنگەن. سول ءۇشىن اتالمىش قۇجاتتاردىڭ بارلىعىن قايتا قاراۋىمىز كەرەك. ءسىزدىڭ ماسەلەڭىزدى ءوزىم باقىلاۋعا الامىن» دەدى باسقارما باسشىسى.
گۇلميرا ايماعانبەت
