نۇر-سۇلتان قالاسىندا العاش رەت امبۋلاتورلىق تۇردە ۆاريكوز اۋرۋىنا وتا جاسالدى.
№10 قالالىق ەمحانا قابىرعاسىندا جاسالعان ۆاريكوز وتاسى قر فلەبولوگتار قاۋىمداستىعىنىڭ ۇيىتقى بولۋىمەن جاسالدى. «جاسىم 24-تە. ۆاريكوزبەن اۋىرىپ جۇرگەنىمە 2 جىل بولدى. بۇل اۋرۋدىڭ قيىندىعى سول, جۇرگەندە اياققا سالماق تۇسەدى دە, ءوزىڭدى جايسىز سەزىنەسىڭ, ونىڭ ۇستىنە اياعىڭ ءىسىپ كەتەدى. جالپى, وتا جاساتۋ جوسپارىمدا بولعان, بىراق مۇمكىندىك بولماي ءجۇردى. وسى ەمحاناعا كەزەكتى تەكسەرىلۋىمە كەلگەنىمدە, دارىگەرلەر ارنايى الماتىدان حيرۋرگتەر كەلىپ ۆاريكوزعا وتا جاسايتىنىن ايتتى. جانە ماعان وتا جاساۋدى ۇسىندى. مەن ءوز كەلىسىمىمدى بەردىم. وتانىڭ ءوزى 20 مينۋتتاي ۋاقىتقا سوزىلدى. قازىر ءوزىمدى جاقسى سەزىنۋدەمىن» دەدى وتادان شىققان استانالىق پاتسيەنت راۋشان اسىلحانوۆا.
– وتا جارتى ساعات كولەمىندە جاسالدى. ارينە, الدىمەن پاتسيەنتتەردىڭ رۇقساتىن الىپ جانە ولار وتا جاساۋ ءۇشىن ءتيىستى تەكسەرۋلەردەن ءوتتى. وتا بىتكەن سوڭ پاتسيەنتتى كوتەرىپ جۇرگىزەمىز, ياعني ونىڭ اياعىن باسا الاتىندىعىنا كوز جەتكىزۋىمىز كەرەك. وتا بىتكەن سوڭ پاتسيەنت ءوزىن جاقسى سەزىنسە, ۇيىنە جىبەرىلەدى. بىزگە مامان رەتىندە وتا جاساۋدا سونشالىقتى قيىنشىلىق جوق دەپ ايتۋعا بولادى. سەبەبى قازىر – تەحنولوگيا زامانى, وتا جاساۋ قۇرىلعىسى اۆتوماتتاندىرىلعان. ياعني وتا تۇينەلىپ, كەڭەيگەن اياق تامىرلارىنا ەندوۆازالدىك لازەر ارقىلى جاسالىنادى. سول سياقتى وتا الدىندا ناركوز سالىنبايدى, ونىڭ ورنىنا ۋلترادىبىستىق زەرتتەۋ ارقىلى اياق تامىرىنا ەنگىزەمىز, – دەدى حيرۋرگ, PhD, پروفەسسور, ءال-فارابي اتىنداعى قۇۋ-دىڭ حيرۋرگيالىق اۋرۋلار كافەدراسىنىڭ مەڭگەرۋشىسى نۇرلان ءاشىموۆ.
بۇگىندە اۋرۋحانادا كۇنىنە 50 وتاعا دەيىن جاساۋعا مۇمكىندىك بار. مامان دا, قاجەتتى تەحنولوگيا دا جەتكىلىكتى. وتا جاساۋ قۇرىلعىلارى – رەسەيلىك ءونىم. اتالعان قۇرىلعى نۇر-سۇلتان قالاسى بويىنشا ازىرگە تەك وسى №10 قالالىق ەمحانادا عانا بار. جالپى, ۆاريكوزعا وتا جاساۋ لازەرلىك تەحنولوگياسى ەۋروپا ەلدەرىندە كەڭىنەن وندىرىلەدى جانە قولدانىلادى.
فاريدا كاريموۆا
