ەلوردادا 9 قازاندا قالالىق پوليتسيا دەپارتامەنتى قىزمەتكەرلەرىنە العاشقى مەديتسينالىق كومەك بەرۋدەن ساباق وتكىزىلەدى.
قالالىق جەدەل-جاردەم ستانساسى جانىنداعى سيمۋلياتسيالىق وقىتۋ ورتالىعىنىڭ نۇسقاۋشىلارى قۇقىققورعاۋ ورگاندارى قىزمەتكەرلەرىن شۇعىل جاعدايدا قالاي العاشقى كومەك بەرۋ كەرەكتىگىن ۇيرەتەدى. وقىتۋ كۋرسىن وتكىزۋ تۋرالى پوليتسيا دەپارتامەنتى مەن قوعامدىق دەنساۋلىق ساقتاۋ باسقارماسى باسشىلىعى بىرلەسە شەشىم قابىلدادى. سەبەبى وقيعا ورنىنا ەڭ ءبىرىنشى جەتەتىن پوليتسيا مەن جەدەل جاردەم بريگاداسى. «ءاربىر قۇقىق قورعاۋ ورگانى قىزمەتكەرى ومىرىندە ءبىر رەت بولسا دا شۇعىل مەديتسينالىق كومەك كورسەتۋ قاجەت ەتىلەتىن جاعدايمەن ۇشىراستى. قازىرگى زامان جانە الەمدىك پاندەميا تالاپتارىنا ساي مەديتسينا ماماندارى كەلگەنگە دەيىن وقيعا ورنىندا العاشقى كومەك كورسەتۋ اسا قاجەت», دەپ سانايدى ورتالىق ماماندارى.
مۇنداي تاجىريبە كوپتەگەن دامىعان ەلدەردە بار. ماسەلەن, يزرايلدە «جەدەل ەرىكتىلەر قىزمەتى» دەپ اتالاتىن قىزمەت تانىمال بولا باستادى. بۇل ارنايى كۋرستان وتكەن ەرىكتىلەر توبى كاسىبي ماماندار كەلگەنشە شۇعىل كومەك بەرۋگە داعدىلانعان. «شەتەلدىك تاجىريبەنى نەگىزگە الا وتىرىپ سيمۋلياتسيالىق وقىتۋ ورتالىعىنىڭ نۇسقاۋشىلارى العاشقى كومەك كورسەتۋدى ءوز ەركىمەن ۇيرەنگىسى كەلەتىندەردى وقىتادى. سەبەبى ادام ءومىرىن ساقتاپ قالۋدا ءاربىر مينۋتتىڭ ماڭىزى زور بولۋى مۇمكىن», دەدى نۇسقاۋشىلار. قىزمەتكەرلەرگە ارنالعان شەبەرلىك كلاسى «دينامو» سپورت كەشەنى بازاسىندا ۇيىمداستىرىلادى. كۋرستى تاجىريبەلى ماماندار وتكىزەدى.
