قازاقستاندا تاپشى سانالاتىن از عانا كاسىبي ينفەكتسيونيستەردىڭ ءبىرى – ەلوردالىق ەلميرا ادىشەۆا. ول تۋرالى كوبىمىز Facebook جەلىسىندە جەڭگەسىنىڭ جازباسىنان وقىپ بىلگەنىمىز راس. ونىڭ ەشكىمگە ۇقسامايتىن تاعدىر جولى, ومىرىندە كەزدەسكەن قيىندىقتارعا قاراماستان العا ۇمتىلۋى كوپشىلىك وقىرمانداردى تاڭعالدىرعان بولاتىن.
كەيىپكەرىمىز – تالايدىڭ ءومىرىن جالماعان تاجتاجالمەن كۇرەس جۇرگىزۋدى باستاعان ەڭ العاشقى دارىگەرلەردىڭ ءبىرى. ونىڭ كوروناۆيرۋسپەن كۇرەستەگى ءبىر كۇنى جايلى روليك تە, مىلتىقسىز مايداننىڭ قاق ورتاسىندا ءوز ومىرىنە تونەر قاۋىپتى ويلاماستان جاساپ جۇرگەن جانكەشتى ەرلىگى جايلى جازبالار دا شىقتى. بىراق وسىنشاما كوزسىز ەرلىك پەن قايسارلىقتىڭ استارىندا قانشاما سىناقتاردان قۇرالعان جەكە تاعدىرى تۇرسا دا, ول مۇنى كوپكە كوز قىلىپ جاريا ەتكەندى قالامايدى.
بۇگىندە ەلميرا باتىربەكقىزى ەلورداداعى كوپسالالى ينفەكتسيالىق اۋرۋلار ورتالىعىندا ەڭبەك ەتەدى. ناۋقاستاردى اجال تىرناعىنان امان الىپ قالۋ ءۇشىن قاۋىپتى ۆيرۋسپەن كۇرەستىڭ ەڭ الدىڭعى شەبىندە ءجۇر. ال ونىڭ ىندەت ەلدى ەندى شارپي باستاعاندا كوروناۆيرۋس جۇقتىرعان ەڭ العاشقى ناۋقاستى قابىلداعان دارىگەر ەكەنىن ءبىرىمىز بىلسەك, ءبىرىمىز بىلمەيمىز.
– بيىل 28 قاڭتاردان باستاپ وسى ورتالىقتىڭ وقشاۋلاۋ بلوگىندا قىتايدان, سونىڭ ىشىندە ۋحاننان جانە جاپونيادان, گەرمانيادان, رەسەيدەن, اقش-تان, باسقا دا شەتەلدەن كەلگەن ەلىمىزدىڭ ازاماتتارىن قابىلداۋدى باستادىق. 14 كۇن وقشاۋلاپ, ولاردان الىنعان پتر تالداۋ سىناماسىنىڭ ناتيجەسى كەلگەن سوڭ عانا جۇقتىرماعاندارىن ۇيلەرىنە جىبەردىك. سولاردىڭ اراسىنان نۇر-سۇلتان قالاسىندا ەڭ ءبىرىنشى كوروناۆيرۋس ينفەكتسياسىن جۇقتىرعان پاتسيەنتتى مەن ءوز كەزەكشىلىگىمدە 13 ناۋرىزدا قابىلداعان ەدىم. ونىڭ پتر تەست ناتيجەسى «وڭ» بولىپ شىققانىن مەن ۇيدە بولعاندا ارىپتەستەر حابارلاپ ايتىپ, دەرەۋ مەنى جۇمىسقا شاقىرتتى. بىردەن ناۋقاسپەن بايلانىستا بولعان ادام رەتىندە كوروناۆيرۋستىڭ بار-جوعىنا تەست تاپسىردىم. مەنەن دەرتتىڭ ينفەكتسياسى جوق ەكەنى انىقتالعان سوڭ 15 ناۋرىزدان باستاپ قاتارىنان ءۇش اي بويىنا ۇيىمىزگە بارماي, بارلىق ارىپتەستەرمەن بىرگە ستاتسيوناردا دەرتپەن كۇنى-ءتۇنى كۇرەستىك. ال ەڭ ءبىرىنشى جۇقتىرعان ناۋقاس ەلوردا تۇرعىنى بولماعانمەن, اۋرۋ انىقتالعاندا نۇر-سۇلتان قالاسىندا بولدى. ول ادام باياعىدا ەمدەلىپ, ۇيىنە كەتتى, – دەيدى دارىگەر.
بۇل ارالىقتا يزولياتوردىڭ مەديتسينالىق قىزمەتكەرلەرى سانيتارلىق تالاپ بويىنشا ارنايى دايىندالعان قوناقۇيدە عانا ءومىر ءسۇردى. العاشىندا ەشكىمگە دە وڭاي سوقپاعانى بەلگىلى. سول ءبىرىنشى ناۋقاستان كەيىن كۇن سايىن دەرت جۇقتىرۋدىڭ جاڭا دەرەگى شىعىپ وتىرعاندىقتان, احۋال كۇردەلەنە تۇسكەنىن دەنساۋلىق ساقتاۋ مينيسترلىگى حابارلاپ وتىردى. وسى كۇردەلى كەزەڭدەردە دەرت جۇقتىرعان ناۋقاستارمەن بەتپە-بەت قالعان الدىڭعى شەپتەگى بارلىق مەديتسينالىق پەرسونال اۋرۋحانا بوساعاسىنان اتتاپ شىقپاي, ادامداردىڭ ءومىرى ءۇشىن «ۇلى كۇرەس» جۇرگىزىپ جاتتى. تەك ماۋسىم ايىندا – ەپيدەميولوگيالىق جاعداي وڭالا باستاعاندا ولار ۇيلەرىنە ورالىپ, تۋىستارىمەن, وتباسىلارىمەن قاۋىشتى.
– باستاپقىدا وتە قيىن بولعان سەبەبى دارىگەرلەر, مەدبيكەلەر, ءتىپتى سانيتارلار دا جەتىسپەدى. قازىر جاعداي ءبىرشاما جاقساردى. مىسالى, ناۋرىز-ءساۋىر-مامىر ايلارىندا ءار دارىگەرگە تۇسەتىن جۇكتەمە وتە اۋىر بولدى. سەبەبى جاڭادان مەديتسينا قىزمەتكەرلەرى, اسىرەسە, ورتا جانە كىشى مەديتسينالىق پەرسونال كوپتەپ قىزمەتكە الىندى. قازىرگى احۋالدىڭ جاقسارۋى ول, ارينە, كارانتين ەنگىزۋدىڭ ارقاسىندا دەپ ويلايمىن. ودان ءارى شەكتەۋ شارالارىن جۇمسارتا وتىرىپ كارانتيندى تاعى ەكى اپتاعا سوزعانى دا دۇرىس بولدى. بۇگىننىڭ وزىندە ادامدار قاۋىپسىزدىك تالاپتارىن ساقتاپ جۇرۋگە ءبىراز داعدىلانىپ قالدى. بىزگە بىردەن ەركىنسۋگە بولمايدى. الدىڭعى كارانتيندەگىدەي تاعى بوساڭسىپ كەتسەك, الدىمىزدا ناعىز تۇماۋ ماۋسىمى كەلە جاتقاندا تۇراقتى جاعدايدى ۋشىقتىرىپ الۋىمىز مۇمكىن, – دەيدى ە.ادىشەۆا.
تۇلكىباستاعى تۋعان جەرى ت.رىسقۇلوۆ اۋىلىندا جۇرگەندە توعىزىنشى سىنىپتاعى وقۋشى قىز ىشەك ينفەكتسياسىمەن قاتتى اۋىرعانى ەسىندە. الايدا جاعدايى ناشارلاسا دا, ونى اۋرۋحاناعا جاتقىزۋ سوزىلىپ كەتەدى. تەك لاۋازىمدى جاقىن تۋىسىنىڭ «ءبىر تەلەفون قوڭىراۋىنان» كەيىن عانا ونى قاراعان. سوندا ول ادامداردى جاعدايىنا قاراپ بولمەي, الالاماي, بارىنە بىردەي قارايتىن دارىگەر, سونىڭ ىشىندە ءدال وسى ينفەكتسيونيست بولامىن دەپ الدىنا ماقسات قويىپتى. سودان بەرى ەلميرا ءوز ارمانىنا جەتۋ جولىندا ەشتەڭەدەن قايمىققان ەمەس. كوپبالالى وتباسىندا دۇنيەگە كەلىپ, ارتىنا قارايلايتىن كىشكەنتاي باۋىرلارى بار ەدى. سوندا دا بولسىن ول ءوزى قالاعان ماماندىعىن جەتىك مەڭگەرۋ ءۇشىن ۇزاق جىلىن ءبىلىم الۋعا سارپ ەتتى. 2001-2003 جىلدارى «ميراس» ۋنيۆەرسيتەتىنىڭ ەمدەۋ ءىسى فاكۋلتەتىندە, 2003-2007 جىلدارى وڭتۇستىك قازاقستان وبلىستىق مەملەكەتتىك مەديتسينا اكادەمياسىندا ءبىلىم الدى. ال ينتەرناتۋرانى جۇقپالى اۋرۋلار بويىنشا 2009 جىلى ءتامامدادى. ەڭبەك جولىن 2010 جىلى ەلورداداعى جۇقپالى اۋرۋلار اۋرۋحاناسىندا باستادى. سودان بەرى 10 جىل ۋاقىت ىشىندە ول دارىگەر-ينفەكتسيونيست بولسام دەگەن بالا ارمانىن جۇزەگە اسىرىپ كەلەدى. قازىر بايقاساق, جۇقپالى اۋرۋلار سەكىلدى جاھاندىق تاجۆيرۋسپەن كۇرەستە ينفەكتسيونيست ماماندارى اۋاداي قاجەت. بىلۋىمىزشە, قازىرگى تاڭدا ەلوردادا كاسىبي 15 شاقتى ينفەكتسيونيست دارىگەر عانا بار ەكەن.
ەلميرا ادىشەۆا بەس جىلدان بەرى نەگىزگى جۇمىسىنا قوسا استانا مەديتسينالىق ۋنيۆەرسيتەتىندە جۇقپالى اۋرۋلار كافەدراسىنىڭ اسسيستەنتى بولىپ ءجۇر. سونىمەن قاتار ەلورداداعى بارلىق ستاتسيونارلار مەن مەديتسينالىق-سانيتارلىق رەابيليتاتسيا ورتالىعىنا جانە ناركولوگيالىق ديسپانسەرگە, ۇلتتىق عىلىمي ونكولوگيالىق ورتالىققا, شارۋاشىلىق قۇقىعىنداعى مەملەكەتتىك كوممۋنالدىق مەكەمەلەرگە كونسۋلتاتسيالىق قىزمەت كورسەتەدى.
اناسىنان ەرتە ايىرىلعان ەلميرا بۇگىندە ارتىنان ەرگەن التى باۋىرىن جالعىز ءوزى جەتىلدىرىپ, ءبارىن وقىتىپ, اياقتاندىردى. سوڭعى 4 ايدا دەرتپەن كۇرەستە كورسەتكەن عالامات ەڭبەگى ءۇشىن مەملەكەت باسشىسى قاسىم-جومارت توقاەۆتىڭ جارلىعىمەن «شاپاعات» مەدالىمەن ماراپاتتالدى.
ەلميرا سياقتى دارىگەرلەر قاۋىمى ماراپاتقا دا, قۇرمەتكە دە, قامقورلىققا دا لايىقتى!
