كەشە ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىندا «ابىز اكتەر – قاللەكي» اتتى دوڭگەلەك ۇستەل وتىرىسى ءوتتىقاليبەك قۋانىشباەۆتىڭ 120 جىلدىعىنا وراي ۇيىمداستىرىلعان باسقوسۋ الدىندا كوپشىلىككە قوياندى جارمەڭكەسىنەن تەاترلاندىرىلعان كورىنىس ۇسىنىلدى. قوناقتار قاللەكيدىڭ پايدالانعان زاتتارى, تۇلعالارمەن تۇسكەن سۋرەتتەرىنەن جاساقتالعان كورمەنى دە تاماشالادى . 
دوڭگەلەك ۇستەلدە تەاتر سىنشىسى اشىربەك سىعاي, اكادەميك, ادەبيەتتانۋشى سەيىت قاسقاباسوۆ, جازۋشىلار تولەن ابدىك, اكىم تارازي, تۇرسىن جۇرتباي, استانا قالاسى مادەنيەت باسقارماسى باسشىسىنىڭ ورىنباسارى سامات تەرگەمباەۆ, حالىق ارتىستەرى گۇلجان اسپەتوۆا, تىلەكتەس مەيراموۆ, قازاقستاننىڭ ەڭبەك سىڭىرگەن ارتىستەرى رىمكەش ومارحانوۆا, بولات ۇزاقوۆ سىندى بەلگىلى ونەر جانە مادەنيەت سالاسىنىڭ مايتالماندارى ءسوز سويلەپ, تالانتتى اكتەر قاليبەك قۋانىشباەۆ تۋرالى تارتىمدى ەستەلىكتەر ايتتى. جيىنعا قاللەكيدىڭ نەمەرە-شوبەرەلەرى دە قاتىستى.
ابىز اكتەردىڭ اتىن العان تەاتردىڭ جاڭا XXIII ماۋسىمى ءداستۇر بويىنشا مۇحتار اۋەزوۆتىڭ «اباي» تراگەدياسىمەن اشىلدى, قويۋشى رەجيسسەرى – ءا.ورازبەكوۆ.
قالىپتاسقان ءداستۇر بويىنشا جاڭا ماۋسىم قارساڭىندا قاللەكي تەاترىنىڭ ارتىستەرى جوعارى وقۋ ورىندارى, كوللەدجدەر مەن مەكتەپتەردەگى جاس كورەرمەندەرىمەن «تەاتر جانە كورەرمەن» تاقىرىبىندا كوپتەگەن كەزدەسۋلەر وتكىزگەنىن ايتا كەتۋ كەرەك. 23-29 قىركۇيەك ارالىعىندا اقتوبە قالاسىندا حالىق جازۋشىسى, دراماتۋرگ تاحاۋي احتانوۆتىڭ 90 جىلدىعىنا ارنالعان قازاقستان دراما تەاترلارىنىڭ XXI رەسپۋبليكالىق فەستيۆالى وتكەن. دوداعا استانالىق تەاتر ۇجىمى شەرحان مۇرتازانىڭ «ءبىر كەم دۇنيە» دراماسىمەن قاتىسىپ, «ەڭ ۇزدىك اكتەرلىك انسامبل» نوميناتسياسىن جەڭىپ الدى. قويىلىم جازۋشىنىڭ «تەكەبۇرقاق» اڭگىمەسىنىڭ جەلىسى بويىنشا ساحنالانعان. شىعارمانىڭ ساحنالىق نۇسقاسىن جازعان ءارى قويۋشى رەجيسسەرى – بولات ۇزاقوۆ. ەندى ۇجىم سەيسەنبى مەن جەكسەنبى كۇندەرى ارالىعىندا كورەرمەندەر نازارىنا ءتۇرلى قويىلىمداردى ۇسىنادى.
اسحات رايقۇل
