بۇرناعى كۇنى «استانا-وپەرا» مەملەكەتتىك وپەرا جانە بالەت تەاترىندا 250 ورىندىق كامەرالىق زال سالتاناتتى تۇردە اشىلدى. حالىقارالىق مۋزىكا كۇنىنە وراي وتكەن شاراعا كورەرمەندەرمەن قاتار پارلامەنتتىڭ قوس پالاتاسىنىڭ دەپۋتاتتارى قاتىستى.
ءان اۋەلەپ, ساز كەرنەدى
گالا-كونتسەرتتە پارلامەنت ءماجىلىسىنىڭ دەپۋتاتى داريعا نازارباەۆا پيانيست, قازاقستاننىڭ ەڭبەك سىڭىرگەن قايراتكەرى تيمۋر ورمانشەەۆتىڭ سۇيەمەلدەۋىمەن ءان سالدى. سونىمەن قاتار, الەمگە تانىمال سكريپكاشى, حالىق ءارتىسى ايمان مۇساقوجاەۆانىڭ ونەرىن تاماشالادى. شاراعا «استانا-وپەرا» تەاترىنىڭ جەكە ورىنداۋشىلارى, بەلگىلى انشىلەر تالعات مۇساباەۆ (باريتون), جان تاپين (تەنور) جانە «سوليستەر اكادەمياسى» مەملەكەتتىك كامەرالىق وركەسترى ساحناعا شىعىپ, كورەرمەننىڭ ىستىق ىقىلاسىنا بولەندى. كەشتە باروككو ءداۋىرىنىڭ مۋزىكاسى, سول زاماننىڭ داۋلەسكەرلەرىگەندەل, باح, ۆيتالي, ۆيۆالدي شىعارمالارى ورىندالدى. ۇجىمنىڭ كوركەمدىك جەتەكشىسى – ايمان مۇساقوجاەۆا, باس ديريجەرى – باقىتجان مۇساقوجاەۆا.
تەاتردىڭ ءباسپاسوز قىزمەتى حابارلاعانىنداي, كامەرالىق زالدىڭ سالتاناتتى اشىلۋىنان كەيىن 9 قازاندا ونەرسۇيەر قاۋىم ءۇشىن «استانا وپەرانىڭ جاس داۋىستارى» اتتى كلاسسيكالىق مۋزىكادان كونتسەرت ۇيىمداستىرىلادى.
چەحيانىڭ شامى, يتاليانىڭ ورىندىقتارى…
شارا بارىسىندا تەاتر ديرەكتورى تولەگەن مۇحامەدجانوۆ جاڭا كامەرالىق زالدا ابونەمەنتتىك كونتسەرتتەر قويىلاتىنىن مالىمدەدى. «كامەرالىق زال تىنىمسىز جۇمىس ىستەيتىن بولادى. وندا ابونەمەنتتىك كونتسەرتتەر قويىلادى, ياعني, بيلەت قۇنى الدەقايدا ارزاندايدى. ابونەمەنتتىك كونتسەرتتەر ءتۇرلى تاقىرىپتارعا ارنالماق. مىسالى, كلاسسيكا كەشتەرى, تانىمال سازگەرلەردىڭ مەرەيتويلارىنا ارنالعان جانە قازاقستان سازگەرلەرى شىعارماشىلىعىنىڭ كونتسەرتتەرى ۇيىمداستىرىلادى. ارينە, مىندەتتى تۇردە بالالارعا ارنالعان كونتسەرتتەر دە بولادى» دەدى ول.
زالدىڭ اكۋستيكاسىن «B&A Contractors SA» كومپانياسى Biobyte-پەن بىرلەسىپ جاساعان. زالدى يتاليا جانە فرانتسۋز سۋرەتشىلەرى بەزەندىرگەن. توبەسى مەن اينالا قورشاعان كارتينالارعا ۇلتتىق ەلەمەنتتەردى پايدالانا وتىرىپ, كلاسسيكالىق ستيلدە ايشىقتاعان. زالدىڭ ورتاسىندا چەحيادا جاسالعان 450 كەلىلىك اسپالى شام ءىلىنىپ تۇر. كامەرالىق زالدىڭ ساحناسى قاراعايدان تۇرعىزىلىپتى, ورىندىقتارى يتاليادان ارنايى اكەلىنگەن.
جاڭا زال كوپ فۋنكتسيالى, ياعني, وندا مۋزىكا, ءان ورىنداۋمەن قاتار, ماجىلىستەر وتكىزۋگە دە بولادى. 250 ادامعا شاقتالعان زال ەرەكشە اكۋستيكالىق مۇمكىندىكتەرگە يە. كەلەشەكتە مۇندا الەمدىك مۋزىكا ونەرىنىڭ بىرەگەي شىعارمالارى ورىندالماق. بۇل جونىندە تولەگەن مۇحامەدجانوۆ «اكۋستيكاسى كەرەمەت ويلاستىرىلعان. سوندىقتان, قاي مەملەكەتتىڭ ونەرپازىنا بولسا دا, وسى كامەرالىق زالدىڭ ساحناسىنا شىعىپ, كونتسەرت بەرۋ ۇلكەن مارتەبە دەپ ويلايمىن» دەيدى.
اسحات رايقۇل
