ادام ءوزىنىڭ تۋعان جەرىن تاڭداي المايدى. تاعدىردىڭ جازۋى دەپ قابىلدايسىڭ. «جاراتۋشىنى جاساعان ىسىنە قاراپ بىلەسىز» دەپ حاكىم اباي ايتقانداي, ەسىڭ كىرگەندەگى ەڭ ءبىرىنشى كوزگە كورىنىپ, ءتاڭىردىڭ «كولەڭكەسىندەي» ماڭگى كوڭىلدە قالاتىن سول ءبىر جاراتىلىس كورىنىسى – كىندىك قانىڭ تامىپ, العاش جارىق دۇنيە كورىپ, يت كويلەك كيگەن تۋعان توپىراعىڭ. قۇداي ادامدى توپىراقتان جاراتتى دەگەندە, ءتانىڭدى قۇراۋشى پەريودتىق كەستەدەگى ەلەمەنتتەردىڭ جيىنتىعى دا اتا-اناڭنىڭ سول توپىراقتان ىشكەن ءدام-تۇزى مەن سۋىنان قالىپتاسپاي ما؟ تۋعان جەردىڭ سۋىن مەيىرى قانىپ ىشكەن ءاربىر ادامنىڭ كىشى وتانى دەسە ەلجىرەيتىنى, اتا-بابالارىمىزدىڭ «اركىمنىڭ تۋعان جەرى – وزىنە مىسىر شاھارى» دەگەنى دە سودان بولار, بالكىم…
الىستان مەن مۇندالاپ, اقسوراڭ تاكاپپارلانا قارايتىنداي, عۇلاما الكەيدىڭ ءىزى قالعان قارتاڭ بەعازى ءالى دە قويىنىمدا قۇپيا كوپ, كورمەي, بىلمەي جاتىرسىڭدار دەيتىندەي. توبەسىندە تاڭبالى تاسى كوپ جەلتاۋعا, ءاليحان تورەنىڭ اۋىلىنا جان-جاقتان جىڭىشكەنى كەسىپ ءوتىپ ۇلكەن كوش تۇزەلىپ بارا جاتقانداي. دۇبىرلەتىپ, جەر قايىستىرعان وسى ءبىر ۇلى كوشتى باستاپ شابانباي بي, جاڭعۇتتى بي, بورىكتاستان ءالىمحان ەرمەكۇلى, بەرىكقارا توڭىرەكتاسىنان اقبايدىڭ جاقىبى, ءپوتانيندى قاسىنا ەرىتكەن دىنمۇحامەت سۇلتانعازين, نارمانبەت اقىن, ولاردىڭ سوڭىندا اسەت پەن شاشۋباي باستاعان اققىز, ماناربەك, كۇلاش, ءاشىمتاي بالاسى ماعاۋيامەن قوش كوڭىلمەن اۋەلەتىپ ءان سالىپ, كۇمبىرلەتىپ كۇي شەرتىپ كەتىپ بارا جاتقانداي.
سول كوش بۇگىن دە جالعاسىن تاۋىپ, «قازاق قيامەتكە دەيىن جاساي بەرەدى» دەپ ءاليحان اتامىز ايتقان قازاقپەن بىرگە جاساسىپ, بيىل قۇرىلعانىنا 90 جىل تولعان قاراعاندى وبلىسىنىڭ اقتوعاي اۋدانى دا كەلە جاتىر.
سۇلتان ىبراي,
عالىم
