الداعى ۋاقىتتا استانادا قىلمىسكەرلەردى بيومەتريالىق تانۋ ارقىلى انىقتاۋعا بولادى. وزىق تەحنولوگيانىڭ تيىمدىلىگى الدىمەن تاجىريبە جۇزىندە سىنالماق.
ەلوردالىق پوليتسەيلەردىڭ ايتۋىنشا, بەت الپەتىن سايكەستەندىرۋ ارقىلى ادامداردى تانۋ ءادىسى جوعالعان ازاماتتاردى تابۋعا, قىلمىسكەرلەردى دە ۇستاۋعا سەپتىگىن تيگىزبەك.
– بيومەتريالىق تانۋ جۇيەسى ادامنىڭ كىم ەكەنىن, قاشان جانە قايدا بارعانىن فوتو ارقىلى انىقتايدى. وسىعان بايلانىستى قازىرگى ۋاقىتتا «سەرگەك» جۇيەسىنە قاتىستى ماسەلەلەر قاراستىرىلۋدا. ازىرگە سىناق ساتىسىندا تاجىريبە جۇرگىزۋدەمىز. جاڭا ءادىس ءتيىمدى ناتيجە بەرۋ ءۇشىن ەڭ الدىمەن ادامداردىڭ سوڭعى فوتولارى بار بازانى جاڭارتامىز. ايتپاقشى, «ەكسپو-2017» كورمەسىن وتكىزۋ كەزىندە جاڭا ءادىستىڭ ادامداردى قانشالىقتى تانۋ جىلدامدىعىن تەكسەرىپ كوردىك. ول كەزدە سايكەستىك 65 پايىزدى قۇرادى. ارينە, بيومەتريالىق تانۋ جۇيەسى ادامداردى 100 پايىز انىقتايدى دەپ ويلاۋعا بولمايدى, ويتكەنى قالپاق كيىپ نەمەسە كوزىلدىرىك تاعىپ الاتىندار بولادى, – دەيدى استانا قالاسى ءىىد باستىعىنىڭ ورىنباسارى سابىر جۇسىپبەكوۆ.
بۇگىندە قالا كوشەلەرىندە كۇن سايىن 1400 پوليتسەي مەن ۇلتتىق ۇلاننىڭ اسكەرلەرى قوعامدىق ءتارتىپتى قامتاماسىز ەتەدى. جىل باسىنان بەرى 5 مىڭعا جۋىق بەينەباقىلاۋدىڭ كومەگىمەن 500-دەن اسا قىلمىستىڭ بەتى اشىلدى. ونىڭ ىشىندە كىسى ءولتىرۋ, ۇرلىق, توناۋ, الاياقتىق, بۇزاقىلىق تىركەلگەن.
«ەگەر قالتا ۇرلىعى تۋرالى ايتار بولساق, اۆتوبۋستا جولاۋشىلار كوبەيەتىن ۋاقىتتا ۇرلىق تا كۇشەيەدى. اسىرەسە, ۇيالى تەلەفوندار مەن گادجەتتەر قولدى بولادى. كوبىنە تەمىرجول ۆوكزالى اۋماعى, بازار ماڭايى, ياعني حالىق ءيىن تىرەسىپ مىنەتىن جەرلەردە ءجيى تىركەلەدى. ولار ۇرلانعان زاتتاردى تاۋىپ الماس ءۇشىن ادەيى بولشەكتەپ ساتىپ جىبەرەدى. كەيدە اشىق الاڭداردا وتەتىن ۇلكەن كونتسەرتتەرگە بارعاندا ءار ادام جەكە زاتتارىنا يە بولۋ كەرەكتىگىن ەسكەرتەمىز. ويتكەنى ءتۇسىرىپ السا دا, ۇمىتىپ كەتسە دە, بىزگە كەلىپ ۇرلانعانى تۋرالى شاعىمداناتىندار كوپ» دەيدى س.جۇسىپبەكوۆ.
جالپى, بيىل قالا كوشەلەرىندە جاسالعان قىلمىستاردىڭ سانى 24 پايىزعا تومەندەگەن. استانا قالاسى ءىىد جەدەل باسقارۋ ورتالىعىنىڭ كامەرالارى, «سمارت سيتي» زياتكەرلىك (ونىڭ ىشىندە «سەرگەك»), «قاۋىپسىز اۋلا», «اقىلدى قالا» كامەرالارى جول جانە قوعامدىق قاۋىپسىزدىكتى باقىلاۋعا ەرەكشە مۇمكىندىك بەرەدى. ولاردىڭ كومەگىمەن بيىل 45900 اكىمشىلىك قۇقىق بۇزۋشىلىق انىقتالعان. سونىمەن قاتار, كوشە قىلمىستارىنىڭ الدىن الۋ, سونداي-اق «ءىزىن سۋىتپاي» اشۋ ماقساتىندا جاياۋ پاترۋلدىك جاساقتاردىڭ سانى كوبەيتىلگەن.
