جادىرا قۇسايىنوۆا, گازەت وقىرمانى:
– بىزگە باسشىلىق تاراپىنان ۇجىمدا كاسىپوداق ۇيىمىن اشۋ جونىندە ۇسىنىس ءتۇستى. بىراق بۇل ۇيىمدى اشۋ-اشپاۋ كوپشىلىكتىڭ قولداۋىنا قاراي شەشىلەتىن بولدى. باسشىلىققا ناقتى جاۋابىمىزدى ايتپاس بۇرىن كاسىپوداق ۇيىمىنىڭ جۇمىسشىلارعا قانداي پايداسى, ماسەلەنى شەشۋدە قانداي مۇمكىندىگى بار ەكەنىن بىلگىمىز كەلەدى.
وقىرمان ساۋالىنا استانا قالاسى كاسىپوداق ورتالىعىنىڭ توراعاسى تاستانبەك ەسەنتاەۆتىڭ جاۋابىن ۇسىنامىز:
– كاسىپوداقتىڭ كوتەرەتىن ءماسەلەسى كوپ. ماسەلەنى شەشۋدە مۇمكىندىگى دە مول. ەڭ باستىسى, ەڭبەك قاۋىپسىزدىگى مەن ەڭبەكتى قورعاۋ ماسەلەلەرى قاراستىرىلادى. كاسىپوداق زاڭ بۇزۋشىلىققا جول بەرمەيدى. ونەركاسىپتەردە تەحنيكالىق جاڭارتۋلاردى ەنگىزۋدە دە جۇمىستار جۇرگىزىلەدى. قىزمەتىنەن بوساعان ازاماتتاردى جۇمىسپەن قامتۋ, ولاردى باسقا ماماندىقتارعا قايتا دايارلاۋ كۋرسىنان وتكىزۋ ءۇشىن جاعداي جاساۋ دا كاسىپوداقتىڭ قۇزىرىندا. كاسىپوداق ءۇشىن باسشى كىم بولسا دا ءبارىبىر, وندا جۇمىسشىلاردىڭ مۇددەسى ءبىرىنشى ورىندا. ەگەر كاسىپوداق مۇشەلەرىن زاڭسىز جۇمىستان شىعارىپ جىبەرسە, جالاقىسىن تولەمەي, ەڭبەك ادامىنىڭ قۇقىعى تاپتالسا, ول ءۇشىن ءبىز سوتتاسۋعا دەيىن, ءتىپتى بەيبىت شەرۋ وتكىزۋگە دەيىن بارامىز. وسى سياقتى كوپتەگەن ماڭىزدى شارالاردى اتقارۋدا كاسىپوداقتىڭ وزىندىك سالماعى بار.
