انار, ستۋدەنت:
– تولقۇجات پەن جەكە كۋالىكتى ءبىر كۇندە راسىمدەۋگە بولا ما؟
بۇل ساۋالعا استانا قالاسىنىڭ ىشكى ىستەر دەپارتامەنتى مەملەكەتتىك ءتىل جانە اقپارات ءبولىمىنىڭ باسشىسى سوفيا قىلىشبەكوۆانىڭ جاۋابىن ۇسىنامىز.
– استانا, الماتى, اقتوبە, شىمكەنت قالالارىندا جەكە كۋالىكتى جەدەلدەتىلگەن تۇردە ءبىر كۇندە قولعا الۋعا مۇمكىندىك بار. ول ءۇشىن 4983 تەڭگە تولەۋ جەتكىلىكتى. بۇل وزگەرىستەر 2018 جىلعى 23 شىلدەدەگى ۇكىمەتتىڭ قاۋلىسىندا قاراستىرىلدى. رەسمي جاريالانعان ساتتەن 10 كۇن وتكەننەن كەيىن كۇشىنە ەنەدى. ياعني تامىزدىڭ ەكىسىنەن بۇل ءادىس جۇزەگە اسا باستادى. جەكە كۋالىكتى الۋعا قاتىستى جۇرت كوكەيىندە جۇرگەن سۇراقتاردىڭ جاۋابىن قاراستىرىپ كوردىك. جەكە كۋالىكتى 15 كۇن ىشىندە راسىمدەۋ ءۇشىن 481 تەڭگە تولەيسىز. ەڭ ءبىرىنشى تولقۇجات پەن جەكە كۋالىكتىڭ اراجىگىن اجىراتىپ الايىق. تولقۇجات (پاسپورت) – ازاماتتاردىڭ قالاۋلارى بويىنشا جاسىنا قاراماستان 10 جىلعا بەرىلەدى. قر اۋماعىنان تىس جەرلەردە يەسىنىڭ جەكە باسىن كۋالاندىراتىن قۇجاتقا جاتادى. ءتىپتى جاڭا تۋعان شاقالاقپەن شەتەلگە بارعىڭىز كەلسە دە, بوپەڭىزدىڭ تۋ تۋرالى كۋالىگى ارقىلى تولقۇجات جاساتاسىز. ال جەكە كۋالىكتى 16 جاسقا تولعان ازاماتتار الا الادى. ونىڭ تەك رەسپۋبليكا اۋماعىندا عانا جارامدى ەكەنىن بىلەسىزدەر. ەلىمىزدە تۇراتىن بارلىق ازاماتتاردىڭ جەكە كۋالىگى بولۋى ءتيىس. ول دا ون جىلعا بەرىلەدى. تولقۇجات پەن جەكە كۋالىكتى راسىمدەۋ كەزىندە مەملەكەتتىك مىندەتتەمە تولەنەدى. مىسالى, جەكە كۋالىكتى الۋعا 0,2 اەك تولەۋ كەرەك. بۇل جەردەگى ايلىق ەسەپتىك كورسەتكىش 2018 جىلدىڭ 1 قاڭتارىنان باستاپ 2405 تەڭگە بولىپ بەكىتىلگەن. سوندا 481 تەڭگە تولەيدى. ال تولقۇجاتتى الۋ ءۇشىن 8 اەك (19240 تەڭگە) بەرەدى. ءوتىنىش بەرىلگەن كۇندى ەسەپتەمەگەندە 15 جۇمىس كۇن ىشىندە راسىمدەلەدى.
