ايدوس كەڭەس, ەلوردا تۇرعىنى:
– كاسىپكەرلىكپەن اينالىسۋعا نيەتتەنىپ ءجۇر ەدىم. ال «كوشە ساۋداسىنا – 1000 ورىن» جوباسى بويىنشا بيزنەس باستاۋ ءۇشىن نە ىستەۋ كەرەك؟
بۇل ساۋالعا «Astana» الەۋمەتتىك-كاسىپكەرلىك كورپوراتسياسى «كوشە ساۋداسىنا – 1000 ورىن» جوباسىنىڭ جەتەكشىسى ساكەن ادىلبەكوۆتىڭ جاۋابىن ۇسىنامىز.
– بيزنەس باستاۋعا نيەتتى كەز كەلگەن قالا تۇرعىنى بۇل جوبا بويىنشا جۇمىس ىستەۋگە قۇقىلى. ول ءۇشىن ەڭ الدىمەن جەكە كاسىپكەر نەمەسە زاڭدى تۇلعا رەتىندە تىركەلۋى ءتيىس. ونىمەن قوسا, بانكتەن ەسەپ-شوت اشۋى قاجەت. ودان كەيىن جەكە كۋالىگى مەن سالىق كوميتەتىنەن قارىزىنىڭ بار-جوعى تۋرالى انىقتاما سۇرالادى. وسى جانە وزگە دە ءتيىستى قۇجاتتى تاپسىرعان سوڭ كاسىپكەر وزىنە ىڭعايلى جەردى الۋىنا مۇمكىندىگى بار. بىراق ول جەرگە باسقا دا ۇمىتكەرلەر كوز تىكسە, كاسىپكەرلەر اراسىندا كونكۋرس وتكىزىلەدى.
سونىمەن قاتار, جوبانىڭ ەرەجەسىنە سايكەس, كاسىبىن باستاۋعا نيەتتىلەر 50 اەك كولەمىندەگى كەپىلدىك جارنانى تولەگەنىن راستايتىن بانك بەلگىسى قويىلعان تولەم قۇجاتىن كونكۋرسقا قاتىسۋ ءۇشىن باسقا قۇجاتتارمەن بىرگە وتكىزەدى. ەگەر كونكۋرستان وتپەي قالعان جاعدايدا قارجى يەسىنە قايتارىلادى.
