استانا قالاسىندا 2 قىركۇيەكتەن باستاپ كەپتەلىستەر ءجيى ورىن الاتىن جول قيىلىستارىندا جاڭا ەكسپەريمەنتتىك جول بەلگىسى پايدا بولدى.
«تور» بەلگىسى – جول قيىلىسىنىڭ كولىك جۇرەتىن بولىگىنە سالىنعان سارى سىزىقتاردان تۇراتىن تور. بەلگى تەز نازار اۋدارىپ, جولاۋشىعا جول قيىلىسىنان ءوتۋ ەرەجەسىن ورىنداۋعا كومەكتەسەدى. قيىلىستىڭ شەكارالارى جۇرگىن بولىكتەردىڭ اينالماسى باستالاتىن نۇكتەلەردى بايلانىستىراتىن, قيىلىستىڭ ورتاسىنان ەڭ الىس ورنالاسقان جورامالداعى سىزىقتارمەن بەلگىلەنگەن. جۇرگىزۋشى قيىلىستىڭ شەكاراسىن وڭاي انىقتاي الادى, ال «تور» بەلگىسى ولارعا انىقتاپ كورۋگە مۇمكىندىك جاسايدى. جۇرگىزۋشىنى جول قيىلىسىندا توقتاۋعا ءماجبۇر ەتەتىن كولىك كەپتەلىسى پايدا بولعان جاعدايدا بەلگىگە شىعىپ كەتۋگە بولمايدى. سونداي-اق, بەلگى سالىنعان قيىلىستا قاراما-قارسى بەتتە كەلە جاتقان اۆتوكولىكتى وتكىزىپ جىبەرۋ كەرەك بولعان جاعدايدا ارتقا بۇرىلۋعا بولمايدى. الداعى ۋاقىتتا جۇرگىزۋشىگە جول قيىلىسىندا «تور» بەلگىسىنىڭ بار ەكەنىن ەسكەرتۋ ءۇشىن سايكەس تەحنيكالىق قۇرالدار پايدالانىلادى.
بۇل «تور» بەلگىسى ازىرگە سىناق رەجيمى رەتىندە ەنگىزىلگەن.
اتالعان قيىلىستا جول ەرەجەلەرىن بۇزۋ قر اقبتك-ءنىڭ 594-بابى, 1,4 بولىكتەرىنە («جول قيىلىسىنا شىعۋ نەمەسە كەپتەلىس كەزىندە جولدىڭ جۇرگىن بولىگىنەن ءوتۋ ارقىلى كولدەنەڭ باعىتتا كەلە جاتقان كولىكتەر ءۇشىن كەدەرگى تۋعىزۋ») سايكەس تالاپتاردى ورىنداماۋ رەتىندە تانىلادى. اتاپ ايتقاندا, قر اقبتك 594-بابى, 1-بولىگى بويىنشا ەسكەرتۋ جاسالادى نەمەسە 3 اەك تۇرىندە ايىپپۇل سالىنۋى مۇمكىن. قر اقبتك-ءنىڭ 594-بابى, 4-بولىگىنە سايكەس, اكىمشىلىك جازا تاعايىندالعاننان كەيىن ءبىر جىل ىشىندە جول ەرەجەسىن قايتا بۇزعان ازامات 7 اەك تۇرىندە ايىپپۇل تولەيدى.
