رۇستەم ەرعاليۇلى, بايقوڭىر اۋدانىنىڭ تۇرعىنى:
– مىنە, باس شاھارعا سارى الا كۇز دە كەلدى. قىر استىنان قىستىڭ باسى قىلتيادى. ءبىزدىڭ اۋدانداعى كوپ قاباتتى تۇرعىن ۇيلەر مەن الەۋمەتتىك مەكەمەلەردىڭ قىسقى ماۋسىمعا ازىرلىگىن بىلگىم كەلەدى.
بۇل ساۋالعا بايقوڭىر اۋدانىنىڭ اكىمى ەرلان قاناليموۆ جاۋاپ بەردى.
– بابالارىمىز «ارباڭدى قىستا, شاناڭدى جازدا سايلا» دەپ بەكەر ايتپاعان. ءبىزدىڭ اۋداندا قىسقا ازىرلىك جۇمىستارى جەر قارايىسىمەن باستالدى. ناتيجەسىندە, دايىندىعىمىز ويداعىداي بولدى. بۇگىندە اۋداندا 452 كوپ قاباتتى تۇرعىن ءۇي ورنالاسقان, سونىڭ 403-ىنە قىسقا ازىرلىك جۇمىستارى جۇرگىزىلدى. پايىزبەن شاقساق, كوپ قاباتتى ۇيلەردىڭ 92 پايىزى دايىن. سونداي-اق, اۋداندا 35 ءبىلىم بەرۋ ورىندارى بار. ولاردىڭ 32-ءسى قىسقا ءازىر. ال مادەنيەت جانە دەنساۋلىق مەكەمەلەرى قىسقا ءجۇز پايىز ساقاداي-ساي.
