باقىت سۇلتانوۆ بىرقاتار قالالىق كوممۋنالدىق كاسىپورىنداردى ارالاپ, كوشپەلى وتىرىس وتكىزدى.
قالانىڭ ءومىر ءسۇرۋىن قامتاماسىز ەتەتىن «ارەك» اق, «استانا سۋ ارناسى», جەو-2 كاسىپورىندارىنىڭ جۇمىسى جونىندە اكىمگە ونىڭ ورىنباسارى قوسمان ايتمۇحامبەتوۆ باياندادى. قازىرگى كەزدە قالانى جىلۋ بەرۋ ماۋسىمىنا دايىنداۋعا قاتىستى جۇمىستار اياقتالۋعا جاقىن. تۇرعىن ۇيلەر مەن الەۋمەتتىك نىسانداردىڭ جىلۋ قابىلداۋعا دايىندىعى 97 پايىزدى قۇرايدى. 12 شاقىرىم سۋ قۇبىرىنا, 5 شاقىرىم كاناليزاتسيا جەلىلەرىنە جوندەۋ جۇمىستارى جۇرگىزىلدى.
قالا باسشىسى بۇل جۇمىستى باقىلاۋدا ۇستاۋدى تاپسىردى. «ءبىزدىڭ جۇمىسىمىزدى قالا تۇرعىندارى كورسەتىلەتىن قىزمەتتىڭ ساپاسىنا قاراي باعالايدى. ءبىز اسىرەسە, جىلۋ بەرۋ ماۋسىمىندا بارىنشا جايلى, قولايلى جاعدايلار تۋعىزۋىمىز كەرەك. سۋ, جىلۋ, ەلەكتر قۋاتى ۇزدىكسىز بەرىلۋى ءتيىس» دەدى ب.سۇلتانوۆ. سونىمەن قاتار, قالا باسشىسى «iKomek» قالالىق جەدەل ارەكەت ەتۋ ورتالىعىنىڭ جۇمىسىمەن تانىستى. بۇگىنگى تاڭدا «iKomek» دەر كەزىندە ەلوردانىڭ ومىرىندەگى كەمشىلىكتەردى جويۋ, مونيتورينگ جانە تالداۋ جاساۋدى ۇيلەستىرەتىن قۇرال بولىپ تابىلادى. تۇرعىنداردىڭ شاعىمدارىنىڭ 77%-ى العاشقى قوڭىراۋدان باستاپ قولعا الىنادى. بۇل كورسەتكىشتى 85%-عا دەيىن جەتكىزۋ جوسپارلانىپ وتىر. بۇل تۋرالى اكىمگە اتالعان ورتالىقتىڭ جەتەكشىسى جانات دۇبىربەكوۆا اڭگىمەلەدى.
سوڭىنان قالا اكىمى №27 كوشەنىڭ ۋچاسكەسىنە جول سالۋ جانە جوندەۋ جۇمىستارى بويىنشا كوشپەلى وتىرىس وتكىزدى. بۇگىنگى كۇنى استانانىڭ كوشە-جول جەلىسى جالپى ۇزىندىعى 1102,32 شاقىرىمدى قۇرايتىن 1039 كوشەدەن تۇرادى. سونىڭ ىشىندە 837,82 شاقىرىم جولعا اسفالت توسەلگەن. ينجەنەرلىك قۇرىلىمداردى 8 كولىك جول ايرىعى, 17 اۆتوكولىك كوپىرى, 5 جاياۋ جۇرگىنشىلەر وتكەلى, 9 وتپەجول قۇرايدى. ق.ايتمۇحامبەتوۆتىڭ ايتۋىنشا, ۇزىندىعى 71,8 شاقىرىم بولاتىن 98 كوشەنى سالۋ جانە جوندەۋ جوسپارلانعان. سونىڭ ىشىندە ۇزىندىعى 20,8 شاقىرىم ماگيسترالدىق كوشەلەر جانە ۇزىندىعى 35,2 شاقىرىم تۇرعىن ءۇي ماسسيۆىندەگى كوشەلەر بار. بۇگىنگە دەيىن 11 كوشەدە 15,7 شاقىرىم جول توسەنىشى توسەلىپ, ورتاشا جوندەۋ جۇمىستارى جۇرگىزىلدى.
