اياۋجان جاناتوۆا, ەلوردا تۇرعىنى:
– ءبىز تۇراتىن كوشەدە قاڭعىعان يت-مىسىقتار كوبەيىپ كەتتى. تۇرعىن ءۇيدىڭ كىرە بەرىسىنەن مىسىقتاردى كورگەندە اۋرۋ جۇقتىرا ما دەپ الاڭدايمىن. قالادا بوسىپ جۇرگەن ءۇي جانۋارلارىن ۇستاۋمەن اينالىساتىن مەكەمە نەمەسە ولاردى اپاراتىن ورىندار بار ما؟
وقىرمان ساۋالىنا قالا اكىمدىگىنە قاراستى «استانا ۆەتسەرۆيس» شارۋاشىلىق جۇرگىزۋ قۇقىعىنداعى كوممۋنالدى مەملەكەتتىك كاسىپورنى ديرەكتورىنىڭ ورىنباسارى مەدەت قىلىشباەۆتىڭ جاۋابىن ۇسىنامىز.
– قاڭعىباس يت-مىسىقتاردى كورسەڭىز, «109» جەدەل جەلىسىنە نەمەسە «استانا ۆەتسەرۆيس» مەكەمەسىنىڭ 28-59-70 تەلەفون نومىرىنە حابارلاسىڭىز. قۇرىقتالعان تورتاياقتىلار ءبىزدىڭ مەكەمەنىڭ ۋاقىتشا يزولياتورىنا جەتكىزىلەدى. سونىمەن قاتار الداعى ۋاقىتتا استانا قالاسى اكىمدىگىنىڭ تاپسىرىسى بويىنشا قالادا قاڭعىپ جۇرگەن يت-مىسىقتارعا ارنالعان پاناحانا پايدا بولادى. بيىلعى قىركۇيەكتە قۇرىلىسى باستالدى. جوسپار بويىنشا كەلەر جىلدىڭ ءساۋىر ايىنىڭ سوڭىندا اياقتالۋى كەرەك. وندا 400 يت پەن 100 مىسىق مەكەندەيتىن بولادى. سونىڭ ناتيجەسىندە قالا كوشەلەرىندەگى بوسىپ جۇرگەن قاڭعىباس يت پەن مىسىقتىڭ سانى ازايادى دەپ وتىرمىز.
