اۋەجايدىڭ تىنىس-تىرشىلىگىمەن تانىسقاننان كەيىن مەملەكەت باسشىسى ن.نازارباەۆ جاڭادان اشىلعان «نۇرلى جول» ۆوكزالىن ارالاپ, كەشەننىڭ مۇمكىندىكتەرىمەن تانىستى. ەلباسىنىڭ ايتۋىنشا, اتالعان ۆوكزال تمد ەلدەرى اراسىندا تەڭدەسى جوق نىسان بولىپ سانالادى.
– مەن استانانىڭ ماقتانىشىنا اينالاتىن جاڭا نىسانداردى ارالاپ ءجۇرمىن. بۇل – 3,2 ملن ادامعا قىزمەت كورسەتىپ جۇرگەن جانە 2025 جىلى 8 ملن ادامدى قامتي الاتىن اۋەجاي. بيىل جانە بولاشاقتا قىزمەت كورسەتۋ ساپاسى ارتىپ, مۇلدەم باسقا بولادى. بۇكىل ەۋروپا مەن ازيانى ارالاۋعا مۇمكىندىك بەرەتىن جاڭا اۋە مارشرۋتتارى اشىلىپ جاتىر. مىنا ۆوكزال دا پوستكەڭەستىك كەڭىستىكتە جالعىز. سىزدەر بىلەسىزدەر, ءبىز قازاقستاننىڭ بارلىق وڭىرلەرىن جىلدامدىعى جوعارى «تالگو» پويىزدارىمەن جالعادىق, – دەدى مەملەكەت باسشىسى.
«قتج» ۇك» اق ۆوكزال شارۋاشىلىعىن دامىتۋ جانە پايدالانۋ دەپارتامەنتىنىڭ ديرەكتورى جۇبان كورپەباەۆتىڭ ايتۋىنشا, ۆوكزالدىڭ جالپى اۋماعى 126 مىڭ شارشى مەتردى قۇرايدى. سونداي-اق, ول التى جولدىڭ تورابى كىرىپ وتىرعان بەكەتتىڭ تاۋلىگىنە 35 مىڭ جولاۋشىنى قابىلداي الاتىنىن اتاپ ءوتتى.
– ۆوكزال جولاۋشىلار اعىنىن, كەزەگىن, قاۋىپسىزدىگىن, ەلەكتروندى بيلەت ساتۋ پروتسەسىن ينتەللەكتۋالدىق باسقارۋ جەلىسىمەن قامتىلعان. «ۆوكزال رەسمي تۇردە بۇگىن اشىلعانىمەن, ءىس جۇزىندە 1 ماۋسىم كۇنى العاشقى جولاۋشىلار جولعا شىعادى. پويىز مارشرۋتتارى مەن ۋاقىتى بەكىتىلدى. جولاۋشىلار بيلەت ساتىپ الاردا الدىن الا اقپاراتتاندىرىلدى. ءبىرىنشى جانە ەكىنشى قاباتتا 740 كولىككە ارنالعان اۆتوتۇراق بار. سونىمەن قاتار, ول جەردە قىزمەتتىك-تەxنيكالىق بولمەلەر ورنالاسقان. ءۇشىنشى قاباتتا – شاتىر استىندا پەررون ورىن تەپكەن. ءتورتىنشى قابات ەڭ نەگىزگى بولىپ سانالادى. مۇندا باستى كىرەبەرىس پەن 10 بيلەت كاسساسى, انىقتاما بيۋروسى, ساۋدا ورىندارى بار. بەسىنشى قاباتتا فۋد-كورت ورنالاسقان. التىنشى قاباتتا اكىمشىلىك كەڭسەلەر بولادى, – دەدى ول.
سونداي-اق, ول ۆوكزالدىڭ قاۋىپسىزدىگىنە كوپ كوڭىل بولىنگەنىن ايتتى. ماسەلەن, عيماراتتا ادامداردى تەكسەرىستەن وتكىزەتىن 16 كىرەبەرىس بار. ونىڭ ۇستىنە اقىلدى جۇيەمەن باسقارىلاتىن 510 كامەرا ورناتىلعان. جۇبان كورپەباەۆتىڭ ايتۋىنشا, ەسكى ۆوكزال ترانزيتتىك پويىزداردى جانە قالا ماڭىنداعى اۋداندارعا قاتىنايتىن بەلگىلى ءبىر پويىزداردى قابىلدايدى. ال بۇگىننەن باستاپ «نۇرلى جول» ۆوكزالى استاناعا دەيىن كەلەتىن پويىزداردى قابىلداپ, شىعارىپ سالادى.
سەرىك جولداسباي
