31 مامىر – ساياسي قۋعىن-سۇرگىن قۇرباندارىن ەسكە الۋ كۇنىنە وراي مەملەكەت باسشىسى نۇرسۇلتان نازارباەۆ استانانىڭ ىرگەسىندەگى اقمول اۋىلىندا ورنالاسقان «الجير» مەموريالدى مۇراجاي كەشەنىنە باردى. وندا ەلباسى قارالى جىلدارداعى قاندى ازاپتى كورگەندەردىڭ ۇرپاقتارىمەن, تۋىستارىمەن كەزدەسىپ, ەسكەرتكىش تاقتاعا گۇل شوعىن قويدى.
وسىدان تۋرا 20 جىل بۇرىن ەلباسى جارلىعىمەن وسى اتاۋلى ەسكە الۋ كۇنى بەكىتىلگەن بولاتىن.نۇرسۇلتان نازارباەۆتىڭ ايتۋىنشا, بۇل كۇن قازاقستان تاريحىندا ايرىقشا كۇن بولىپ سانالادى. سوندىقتان دا ول ساياسي قۋعىن-سۇرگىن قۇرباندارىن جالپىۇلتتىق ەسكە الۋ كۇنى رەتىندە اتاپ وتىلەدى.
– ءبىر عانا قازاقستاننىڭ وزىندە سول جىلدارى 103 مىڭنان اسا ادام تۇتقىندالىپ, ونىڭ 25 مىڭنان استامى اتۋ جازاسىنا كەسىلدى. قازاق زيالىلارىنىڭ بەتكە ۇستار وكىلدەرىنىڭ, رەسپۋبليكا باسشىلىعىنىڭ تۇگەلگە جۋىعى جويىلدى. قازاقستاننىڭ ءار تۇكپىرىندەگى 11 لاگەردىڭ قابىرعاسىندا ادامدار قيناۋ مەن ازاپتاۋ سالدارىنان قازا بولدى. سول لاگەرلەردە ميلليوننان استام ادام جازاسىن وتەدى. ساياسي قايراتكەرلەرمەن قاتار, ولاردىڭ جۇبايلارى مەن بالالارى دا قۋعىن-سۇرگىنگە ۇشىرادى. كەيبىر نارەستەلەر سول لاگەرلەردە دۇنيەگە كەلدى, – دەدى مەملەكەت باسشىسى.سونداي-اق, ەلباسى قيىن كەزەڭدە ەلىمىز ساياسي قۋعىن-سۇرگىنگە ۇشىراعان وزگە ۇلت وكىلدەرىنە قامقورلىق كورسەتكەنىن ايتىپ ءوتتى. وسىنداي قيىندىقتى باستان وتكىزگەن ەلىمىز بۇگىندە ءبىرتۇتاس حالىققا اينالدى.
– حالقىمىز وسى قايعىلى وقيعالاردى ەستە ساقتاۋعا ءتيىس. مۇنداي قاسىرەت قايتالانباس ءۇشىن ونى بولاشاق ۇرپاق ءبىلۋى كەرەك. بۇگىندە ءبىز قۇقىقتىق جاڭا مەملەكەت قۇردىق. قازاقستاندا ازاماتتاردىڭ قۇقىقتارى مەن بوستاندىقتارى قورعالعان. ءبىزدىڭ ەلدە ساياسي قۋدالاۋعا ورىن جوق. ءبىز ەۆوليۋتسيالىق دامۋ جولىن تاڭدادىق, – دەدى مەملەكەت باسشىسى.
سەرىك جولداسباي
