ۇلتتىق مۋزەيدىڭ «التىن ادامنىڭ الەم مۋزەيلەرىنە شەرۋى» حالىقارالىق جوباسى اياسىندا تۇركيانىڭ انكارا قالاسىنداعى انادولى وركەنيەتتەر مۇراجايىندا «ۇلى دالا: تاريح جانە مادەنيەت» اتتى كورمەسى اشىلدى.
مادەني شارانىڭ اشىلۋىنا قازاقستاننىڭ تۇركياداعى توتەنشە جانە وكىلەتتى ەلشىسى ابزال ساپاربەكۇلى, مۋزەيلەر مەن مادەني ەسكەرتكىشتەردىڭ باس ديرەكتورى گوكحان يازگى, تۇركىسوي باس حاتشىسى دۇيسەن قاسەيىنوۆ جانە ۇلتتىق مۋزەي ديرەكتورى ارىستانبەك مۇحامەديۇلى قاتىسىپ, قۇندىلىعى مول كورمە تۋرالى ىزگى لەبىزدەرىن ءبىلدىردى.
«قازاق جەرى – الەمدى ءوزىنىڭ كوشپەلى مادەنيەتى جانە باي تاريحىمەن قىزىقتىرادى. ەلىمىزدە ەلباسىنىڭ «رۋحاني جاڭعىرۋ», «ۇلى دالانىڭ جەتى قىرى» باعدارلاماسى اياسىندا ونەر سالاسىندا كوپتەگەن جۇمىستار اتقارىلدى. سونىڭ ءبىرى – وزدەرىڭىز كۋا بولىپ وتىرعان كورمە. مۇندا باۋىرلاس تۇركيا ەلىنە قازاقستان تاۋەلسىزدىگىنىڭ سيمۆولىنا اينالعان «التىن ادامدى» ۇسىنىپ وتىرمىز» دەدى ارىستانبەك مۇحامەديۇلى.
كورمەگە وتكەن عاسىردىڭ 70-شى جىلدارى الماتى وبلىسىنداعى ەسىك قورعانىنان تابىلعان «التىن ادامنىڭ» رەكونسترۋكتسياسى مەن ونىڭ التىن تىلىمشەلەر اشەكەيلەپ تۇرعان كونۋس ءپىشىندى باس كيىمى قويىلدى. سونىمەن بىرگە ۇلتتىق مۋزەي قورىنداعى ەجەلگى جانە ورتاعاسىرلىق ونەردىڭ جاۋھارلارىنا اينالعان 207 جادىگەر ۇسىنىلدى.
ايتا كەتەيىك, كورمە 12 قازانعا دەيىن جالعاسادى.
