جەكسەنبىنىڭ كەشىندە شامالعان ستانساسىندا ورىن العان قايعىلى وقيعا بۇكىل ەلدى بەيجاي قالدىرمادى. تەمىرجول وتكەلىندە الماتى-قوستاناي باعىتىنداعى №43 پويىز بەن الماتىدان قاسكەلەڭگە قاتىنايتىن «Setra» ماركالى اۆتوبۋستىڭ سوقتىعىسۋى سالدارىنان اۆتوبۋس جۇرگىزۋشىسى مەرت بولىپ, ءۇش ادام (انا مەن ەكى بالاسى) قاراساي اۋداندىق اۋرۋحاناسىنىڭ جانساقتاۋ بولىمىنە جەتكىزىلدى.
قاتەرلى وتكەل نۇر-سۇلتان-الماتى كۇرە جولى بويىندا ورنالاسقان. بۇل جەردە پويىزداردىڭ ادامدى قاعۋ وقيعالارى بىرنەشە رەت تىركەلگەن. 2017 جىلدىڭ وزىندە وسى اۋماقتا جەتى ادامنىڭ ءومىرى قيىلعان.
وتكەل شامالعان ستانساسىن ەكىگە ءبولىپ تۇر. مەكتەپكە بالالارىن جىبەرەتىن اتا-انا پەرزەنتتەرى امان بولسا ەكەن دەپ قۇدايدان سۇراۋمەن وتەدى. بۇل اۋماقتا كوپىر سالۋ ماسەلەسى كوپتەن بەرى كوتەرىلگەن ەدى. تاياۋدا تەلەارنالاردىڭ بىرىنەن ءتيىستى سيۋجەت تە كورسەتىلگەن. سوندا جەڭىل كولىك يەلەرى وتكەلگە كەلگەندە ساعاتتاپ كەپتەلىستە تۇراتىنى ايتىلعان.
قاراساي اۋدانىنىڭ اكىمى جانداربەك دالباەۆ تا مۇنى راستاپ وتىر. ونىڭ ايتۋىنشا, الايدا وسى اۋماقتا كوپىر سالۋ ازىرگە مۇمكىن ەمەس. ول ءۇشىن جول بويىنداعى ۇيلەردى ءسۇرۋ كەرەك. ال بۇل جۇمىس قوماقتى قارجىنى قاجەت ەتەدى.
كەشە يندۋستريا جانە ينفراقۇرىلىمدىق دامۋ ءمينيسترى رومان سكليار كوپىر قۇرىلىسى كەلەسى جىلعا جوسپارلانعانىن ايتتى.
وسىعان ۇقساس پروبلەما ەلوردادا دا بار. باس قالا مەن «ءوندىرىس» تۇرعىن الابىن قوساتىن جولدىڭ بويىندا دا تەمىرجول وتكەلى بار. ارى قاراي نەمەسە بەرى قاراي شىققان كولىكتەر يەلەرىنىڭ مۇنداعى كەپتەلىستە دە قانشاما ۋاقىتى «ءولىپ» جاتادى. بۇل اۋماقتا كوپىر سالۋ ماسەلەسى دە ءبىرازدان بەرى ايتىلىپ كەلە جاتقان اڭگىمە. قالالىق ءماسليحات دەپۋتاتتارى دا مۇنى دۇركىن-دۇركىن كوتەردى. دەپۋتات ميراس شەكەنوۆ ش.بەيسەكوۆا مەن قۇس جولى كوشەلەرىن قوساتىنىن كوپىر سالىناتىنىن, ءتيىستى جوبا ازىرلەنىپ جاتقانىن, قازىرگى كەزدە جەر ۋچاسكەلەرىن الىپ قويۋ ماسەلەسى قارالىپ وتىرعانىن ايتتى. بىراق كوپىر قۇرىلىسى ناقتى قاشان باستالاتىنى ءالى بەلگىسىز.
ماسەلەنى وسىلاي سوزبالاڭعا سالا بەرسەك, شامالعانداعىداي قايعىلى جاعدايدىڭ قايتالانباۋىنا كىم كەپىلدىك بەرەدى؟!
