ەركەعالي راحماديەۆ اتىنداعى مەملەكەتتىك اكادەميالىق فيلارمونيا زالىندا مادەنيەت جانە اقپارات مينيسترلىگىنىڭ ۇيىمداستىرۋىمەن, Amanat پارتياسىنىڭ قولداۋىمەن «ەڭبەك – ەل ىرىسى» اتتى رەسپۋبليكالىق اقىندار ايتىسى ءوتتى. ەكى كۇنگە جالعاسقان وسى جىلدىڭ باستى دوداسىنا ەلىمىزدىڭ ءار وڭىرىندە جىل بويى وتكەن ايتىستاردىڭ جەڭىمپازدارى قاتىستى.
ون التى اقىن باق سىناعان «ءسوز بارىمتاسىن» ءماجىلىس سپيكەرى, Amanat پارتياسىنىڭ توراعاسى ەرلان قوشانوۆ اشىپ بەرىپ, مەملەكەت باسشىسى قاسىم-جومارت توقاەۆ ەڭبەك ادامىنىڭ مارتەبەسىن كوتەرۋدى ۇنەمى ايتىپ جۇرگەنىنە ەرەكشە نازار اۋداردى. رەسپۋبليكا كۇنى قارساڭىندا پرەزيدەنت 700-دەن استام قاراپايىم ەڭبەك ادامىن مەملەكەتتىك ناگرادامەن ماراپاتتاعانىن اتاپ ءوتتى.
«بيىلعى «التىن دومبىرا» اقىندار ايتىسىنىڭ وزىندىك ءمانى بار. بۇگىنگى ايتىس قاراپايىم ەڭبەك ادامدارىنا ارنالادى. «ەڭبەك – ەل ىرىسى» دەپ وتىرمىز. سەبەبى بەرەكەنىڭ باستاۋى – ەڭبەكتە. ال ونىڭ يەسى دە, كيەسى دە – قاراپايىم ەڭبەك ادامدارى. وسى رەتتە مەملەكەت باسشىسى «ادال ازامات» ۇعىمىن قوعام ساناسىنا ءسىڭىرۋدى ۇسىندى. اينالىپ كەلگەندە, مەملەكەتتى مەملەكەت, ەلدى ەل قىلىپ وتىرعان باي-باعىلاندار ەمەس, قاتارداعى جۇمىسشىلار, مالشىلار, ديقاندار, ۇستازدار مەن دارىگەرلەر. قازىر ولارعا دەگەن قوعامنىڭ شىنايى قۇرمەتى ويانىپ كەلەدى» دەدى ە.قوشانوۆ.
ايتىستىڭ ەكىنشى كۇنى 8 اقىن فينالعا شىقتى. ماراپاتتاۋ راسىمىنە Amanat»-تىڭ اتقارۋشى حاتشىسى داۋلەت كارىبەك قاتىسىپ, ءداستۇرلى دودانىڭ ءمانى مەن ماڭىزىنا توقتالدى, پارتيا الداعى ۋاقىتتا دا مادەنيەت پەن ونەرگە بارىنشا قولداۋ كورسەتە بەرەتىنىن جەتكىزدى.
قازاقستاننىڭ حالىق اقىنى ءاسيا بەركەنوۆا باستاعان قازىلار القاسىنىڭ شەشىمىمەن باس جۇلدەنى قاراعاندىلىق ماقسات احانوۆ يەلەندى. وعان «التىن دومبىرا» جانە اۆتوكولىك تابىستالدى. ال جۇلدەلى 1-ورىن جانە «ايتىس اقتاڭگەرى» اتاعى قىزىلوردالىق مەيىربەك سۇلتانحانعا, 2-ورىن پاۆلودارلىق اسپانبەك شۇعاتايعا بۇيىردى. 3-ورىندى ۇلىتاۋلىق تولەگەن جامانوۆ پەن باتىس قازاقستان وبلىسىنان كەلگەن جانسايا مۋسينا ءوزارا ءبولىستى. سونداي-اق جامبىلدىق الينا ايدارالى, باتىس قازاقستان وبلىسىنىڭ ايتىسكەرى مۇرادىم مەيرلانوۆ جانە الماتىلىق شۇعايىپ سەزىمحان ارنايى جۇلدە يەلەندى. سايىسقا تۇسكەن بارشا اقىنعا قوماقتى سىي-سياپات تابىستالدى.
