التىنشاش تابۋلدينا, استانا قالاسى №5 ەمحانانىڭ باس دارىگەرى: «كەزەكسىز ەمحانا» جوباسى جۇزەگە اسىرىلۋدا
استاناداعى №5 قالالىق ەمحانادا التى وتباسىلىق دەنساۋلىق ورتالىعى, اكۋشەرلىك-گينەكولوگيالىق ءبولىم, الدىن الۋ جانە الەۋمەتتىك-پسيحولوگيالىق كومەك ءبولىمى, لابوراتوريالىق, دياگنوستيكالىق ءبولىم, ارنايى حيرۋرگيالىق كومەك ءبولىمى, ارنايى سوماتيكالىق كومەك ءبولىمى, كۇندىزگى ستاتسيونار, حيرۋرگيالىق, ۋرولوگيالىق, وتولارينگولوگيالىق جانە تراۆمالىق ايماقتا وپەراتسيا جۇرگىزەتىن امبۋلاتوريالىق حيرۋرگيا ورتالىعى دا بار. تاياۋدا وتكەن تىكەلەي تىلدەسۋ بارىسىندا اتالمىش ەمحانانىڭ باس دارىگەرى التىنشاش جۇماشقىزى تابۋلدينا وقىرماندارمەن وسى ورتالىقتار مەن بولىمدەردىڭ جۇمىسى تۋرالى اڭگىمەلەدى
– مەن استاناعا كوكشەتاۋ قالاسىنان كوشىپ كەلدىم. اتى-ءجونىم – بوتاجان اسقاروۆا, تۇرعىلىقتى مەكەنجايىم بويىنشا كونستيتۋتسيا كوشەسىندەگى №4 ءۇيدىڭ 1-پاتەرىندە تۇرامىن. سىزدەردىڭ ەمحانادا قارالۋ ءۇشىن قالاي تىركەلۋگە بولادى؟
– بوتاجان, ەڭ الدىمەن, بۇرىن قارالىپ جۇرگەن ەلدى مەكەندەگى, ياعني كوكشەتاۋ قالاسىنداعى ەمحانادان تىركەۋدەن شىققاندىعىڭىز تۋرالى قاعاز الىپ كەلەسىز. سوسىن ءبىزدىڭ ەمحاناعا كەلىپ, تىركەلۋ تۋرالى ءوتىنىش جازاسىز.
– ەمحانانىڭ نەگىزگى ەرەجەلەرى, مامانداردىڭ قابىلداۋلارى تۋرالى اقپاراتتاردى قايدان قاراپ, بىلۋىمىزگە بولادى؟
– ەمحاناعا قاتىستى بارلىق اقپاراتتاردى ءبىزدىڭ مەكەمەنىڭ ەلەكتروندى ادرەسىنەن www.gp5-astana.kz نەمەسە 57-63-20, 57-63-62 تەلەفوندارىنا حابارلاسۋ ارقىلى الۋىڭىزعا بولادى.
– سوڭعى كەزدە ءجيى اۋىرامىن. ءسىزدىڭ ەمحانانىڭ ماڭىندا تۇرامىن. دارىگەرگە قارالۋ ءۇشىن قالاي جازىلامىن؟
– ەمحانانىڭ تىركەۋ بولىمىنە كەلىپ نەمەسە 57-63-20, 57-63-62 تەلەفوندارى ارقىلى جانە www. egov. كz ەلەكتروندىق ۇكىمەتى ارقىلى جازىلا الاسىز.
– ەسىمىم – الميرا. دەنە قىزۋىمنىڭ جانە قان قىسىمىمنىڭ شامادان تىس كوتەرىلۋىنە بايلانىستى ايماقتىق دارىگەرگە كورىنگىم كەلەدى, بىراق ايماقتىق دارىگەرگە قارالۋ ءۇشىن بۇگىن كەزەك تولىق ەكەن, سوندا مەن قايدا بارامىن؟
– الميرا, ءبىزدىڭ ەمحانانىڭ بالالار عيماراتىندا 116-بولمە جانە ەرەسەكتەر عيماراتىندا 145-بولمە بار. وسىندا وتىرعان دارىگەرلەر جەدەل اۋرۋمەن كەلگەن ناۋقاستاردى قارايدى. سوندا بارىڭىز نەمەسە 57-63-20, 57-63-62 تەلەفوندارىنا حابارلاسۋ ارقىلى دارىگەردى ۇيگە شاقىرتا الاسىز.
– دارىگەرگە كورىنەيىن دەسەم, تىركەۋ بولىمىندەگىلەر الدىن الا جازىلۋ كەرەكتىگىن ايتتى. بۇل نە ءۇشىن قاجەت؟
– دارىگەرگە الدىن الا جازىلۋ ءسىزدىڭ ۋاقىتىڭىزدى ۇنەمدەۋگە جانە كەزەكتە كوپ ۋاقىت تۇرماۋعا, سونداي-اق, دارىگەردىڭ سىزگە ارنايى ۋاقىت ءبولىپ قاراۋىنا مۇمكىندىك بەرەدى.
– سوندا مەن ءوز ايماقتىق دارىگەرىمە قالاي جازىلا الامىن؟
– ول ءۇشىن وزىڭىزگە ىڭعايلى ۋاقىتتى تاڭداپ الاسىز دا, دارىگەردىڭ جۇمىس كەستەسىنە بايلانىستى قالاعان ۋاقىتىڭىزعا جازىلا الاسىز.
– مەنىڭ بالام ءجيى اۋىرادى. ءدارى-دارمەكتەردى ۇنەمى ءدارىحانادان ساتىپ الامىز. ءوزىڭىز بىلەسىز, قازىرگى كەزدە ارزان ءدارى جوق, ازداپ قانا العاننىڭ وزىندە كوپ اقشا كەتەدى. ەمحانادان تەگىن ءدارى-دارمەك الۋعا بولادى دەگەندى ەستىدىم. ءبىزدىڭ دە تەگىن ءدارى الۋىمىزعا بولا ما؟
– ءيا, قازاقستان رەسپۋبليكاسى دەنساۋلىق ساقتاۋ مينيسترلىگىنىڭ 2011 جىلعى 14 قاراشاداعى №786 بۇيرىعىنا سايكەس, بەلگىلى اۋرۋلارمەن اۋىراتىن ادامدار امبۋلاتوريالىق دەڭگەيدە تەگىن مەديتسينالىق كومەك كورسەتۋدىڭ كەپىلدى كولەمى شەڭبەرىندە تەگىن ءدارى-دارمەكتەرمەن جانە مەديتسينالىق ماقساتتاعى بۇيىمدارمەن قامتاماسىز ەتىلەدى. بالاڭىز ديسپانسەرلىك ەسەپتە تىركەلگەن بولسا, تەگىن مەديتسينالىق كومەك كورسەتۋ كەپىلدى كولەمى شەڭبەرىندە ۋچاسكەلىك دارىگەر بالاڭىزدىڭ سىرقاتىنا بايلانىستى تەگىن ءدارى-دارمەكتەرگە رەتسەپت جازىپ بەرەدى. سول بويىنشا «گيپپوكرات» ءدارىحاناسىنان وزىڭىزگە قاجەتتى دارىلەردى اقىسىز الا الاسىز.
– كوزىم اۋىرىپ ءجۇر. وسىعان بايلانىستى وكۋليست دارىگەرىنە قارالايىن دەپ ەدىم. ول ءۇشىن الدىمەن قايدا بارۋىم كەرەك؟
– وكۋليستكە قارالۋ ءۇشىن, بىرىنشىدەن, ءوز ايماقتىق دارىگەرىڭىزگە كەلىپ تەكسەرىلەسىز. سودان كەيىن دارىگەردىڭ باعىتتاماسىمەن وكۋليست دارىگەرگە جازىلاسىز. ءوزىڭىزدىڭ ۋاقىتىڭىزعا ىڭعايلى كۇندى بەلگىلەپ, دارىگەردىڭ جۇمىس كەستەسىنە سايكەس كەلگەن كەزدە كوز دارىگەرىنە قارالا الاسىز. ەگەر كوز دارىگەرىنە جەدەل تۇردە كورىنۋ كەرەك بولسا, وكۋليست دارىگەرى ايماقتىق دارىگەردىڭ باعىتتاۋىمەن ءسىزدى كەزەكتەن تىس قارايدى.
– كەزەكتى ەڭبەك دەمالىسىنا شىققانمىن. جالپى, دەنساۋلىعىمدى ءبىر تەكسەرتىپ السام دەيمىن. قان تالداۋ, ۋزي جانە ەكگ ءوتۋ ءۇشىن كىمگە قارالۋىم قاجەت؟
– مەديتسينالىق تەكسەرۋلەردەن ءوتۋ ءۇشىن ءبىرىنشى ءوزىڭىزدىڭ ايماقتىق دارىگەرىڭىزگە باراسىز. دارىگەر ءسىزدى قاراعاننان كەيىن, باعىتتاما بويىنشا زەرتتەۋلەرگە جىبەرەدى. دەنساۋلىعىڭىزعا ۋاقىتىندا كوڭىل بولگەنىڭىز قۇپتارلىق نارسە. سوندىقتان, سالاۋاتتى ءومىر سالتىن ۇستانىپ, دەنساۋلىعىڭىزدى ۇنەمى باقىلاپ وتىرۋعا كەڭەس بەرەمىن.
– مەن – گۇلميرا رايىمبەكوۆا, ءسىزدىڭ ەمحانادا جالپى تاجىريبەلى دارىگەر فەدوروۆاعا قارالامىن. جالپى تاجىريبەلى دارىگەر دەگەندى بۇرىن تۇسىنبەيتىنمىن, قازىرگى ۋاقىتتا جالپى تاجىريبەلى دارىگەرگە قارالۋ وتە ىڭعايلى ەكەنىنە كوز جەتكىزدىم. تەراپەۆتكە جانە بالالار دارىگەرلەرىنە بولەك جازىلمايسىڭ, دارىگەر بارلىق وتباسىمىزدى بىرگە قارايدى. بۇل رەتتە فەدوروۆا ولگا الەكساندروۆنا – وتە مەيىرىمدى, وتباسىمىزدىڭ بارلىق مۇشەلەرىنە ءوز ىقىلاسىن ءبىلدىرىپ, جاقسى ەمدىك شارالارىن جۇرگىزەدى. ول كىسىگە العىسىمدى بىلدىرەمىن.
– راحمەت, جالپى ەمحانانىڭ جۇمىسى تۋرالى نە ايتاسىز؟
– التىنشاش جۇماشقىزى, ەمحانامىزعا كىرە بەرىستەن ءتارتىپ پەن تازالىق بايقالادى. ەسىك الدىنداعى جايقالا وسكەن گۇلدەرگە قاراپ, باس دارىگەردىڭ ەڭبەگىن كورگەندەي بولامىز. سوعان ريزامىز. ايتارىم, وزدەرىڭىز دە امان بولىڭىزدار. ەڭبەكتەرىڭىزدىڭ جەمىسىن كورىڭىزدەر.
– مەن – قوسشى ەلدى مەكەنىنىڭ تۇرعىنى ناعيما كاريموۆامىن. ماعان سىزدەردىڭ ەمحانالارىڭىزعا قارالعان ىڭعايلى. بىراق مەنى ول جەردە تىركەۋگە المادى. قازىرگى كەزدە ەمحاناعا تىركەلۋ ەركىن تاڭداۋ ارقىلى جۇرگىزىلمەي مە؟ مەنى نەگە تىركەۋگە المايدى؟
– ناعيما, قازاقستان ۇكىمەتىنىڭ №1263 قاۋلىسىنا سايكەس, تەك قالا تۇرعىندارى عانا ءبىر تەرريتوريالىق ايماق بىرلىگى ارقىلى تىركەۋگە تۇرا الادى. ءسىز قوسشى ەلدى مەكەنىندە تۇرۋىڭىزعا بايلانىستى سول ايماقتىڭ ەمحاناسىندا قارالا الاسىز.
– ەسىمىم – ءاليا احمەتوۆا, سىزدەردە كۇندىزگى ستاتسيونار ءبولىمى بار دەگەندى ەستىدىم. وعان قالاي جاتۋعا بولادى؟
– ءاليا, ءبىزدىڭ ەمحانادا قارالۋ ءۇشىن, ەڭ الدىمەن, ءوز دارىگەرىڭىزگە باراسىز. ناۋقاسىڭىزعا بايلانىستى دارىگەر سىزگە جولداما بەرەدى, سول بويىنشا بارلىق مەديتسينالىق تەكسەرۋلەردەن وتەسىز, سوسىن كۇندىزگى ستاتسيوناردىڭ دارىگەرى ءسىزدىڭ مەديتسينالىق تەكسەرۋلەرىڭىزدىڭ قورىتىندىسى بويىنشا ەم بەلگىلەيدى. ەم قابىلداۋ سىرقاتىڭىزعا بايلانىستى بەس كۇننەن جەتى كۇنگە دەيىن سوزىلۋى مۇمكىن. بۇل رەتتە بىزدە ءبارى تەگىن ەكەنىن ەسكەرتكىم كەلەدى. ياعني, ءسىز كۇندىزگى ستاتسيوناردا اقىسىز ەمدەلە الاسىز.
– اياعىمدى جاراقاتتاپ الدىم. وسىعان بايلانىستى قالامىزداعى تەمىرجول اۋرۋحاناسىنا بارىپ, العاشقى مەديتسينالىق كومەك العان بولاتىنمىن. ەندى تراۆماتولوگ دارىگەرگە كورىنۋىم كەرەك. ءسىزدىڭ ەمحانادا مۇنداي دارىگەر بار ما؟ وعان كورىنۋ ءۇشىن قايدا بارۋىم كەرەك؟
– بىزدە تراۆماتولوگ دارىگەرلەر بار. تراۆماتولوگقا الدىن الا جازىلۋ ارقىلى العاشقى كومەك كورسەتىلگەننەن كەيىن ءۇش كۇن وتكەن سوڭ قابىلداۋعا كەلۋىڭىزگە بولادى.
گۇلبارشىن وكەشقىزى
