قر ۇلتتىق اكادەميالىق كىتاپحاناسىندا قىزمەت كورسەتۋ جانە وقىرمانداردى تىركەۋ ءبولىمىنىڭ ۇيىمداستىرۋىمەن اقىن, حالىق جازۋشىسى, قر مەملەكەتتىك سىيلىعىنىڭ لاۋرەاتى فاريزا وڭعارسىنوۆانىڭ تۋعانىنا 80 جىل تولۋىنا وراي «تاۋ الىستاعان سايىن بيىكتەيدى» اتتى ادەبي-سازدى كەش ءوتتى.
كىتاپحانا باسشىسى ءۇمىتحان مۇنالباەۆا فاريزا اقىننىڭ اقىندىق بولمىسىنا توقتالىپ, جۋىردا كىتاپحانادا فاريزا وڭعارسىنوۆا اتىنداعى مەديا-ورتالىقتىڭ اشىلعانىن ايتا كەلىپ, بۇل مەديا-ورتالىقتىڭ ادەبي كەشتەر, ماعىنالى كەزدەسۋلەر الاڭىنا اينالارىنا سەنىم ءبىلدىردى, سونىمەن بىرگە اقىن مۇراسىن ناسيحاتتاۋدا اتقارىلىپ جاتقان ءىس-شارالار تۋرالى ايتىپ ءوتتى. فاريزا وڭعارسىنوۆانىڭ جۋرناليست-رەداكتورلىق جولىن زەرتتەۋشى گۇلسىم ەڭسەپوۆا ونىڭ شىعارماشىلىعىن زەردەلەۋ بارىسىندا ءوزى ءۇشىن قىزىقتى بولعان جايتتاردى قايىرا ەسكە الدى. عالىمنىڭ اڭگىمەسىنەن اقىننىڭ قايراتكەرلىك بەينەسى كورىندى. قازاقستاننىڭ ەڭبەك سىڭىرگەن ءجۋرناليسى, قازاق راديوسىنىڭ ارداگەرى عاليا بالتاباەۆانىڭ سىر-تولعانىسى ارقىلى كەيىنگى جاس تولقىننان قامقورلىعىن اياماعان اقىننىڭ ادامگەرشىلىك قاسيەتى, ۇيىمداستىرۋشىلىق قىرى اشىلا ءتۇستى. ال اقپارات سالاسىنىڭ ۇزدىگى كۇلاش مولداحمەتوۆا فاريزا اپايدىڭ ولەڭىن كاسىبي دەڭگەيدە وقىپ بەردى. ءداستۇرلى ءانشى تەلمان نۇركەنوۆتىڭ ورىنداۋىنداعى «فاريزا, فاريزاجان» ءانى كەشتىڭ ءارىن اشا ءتۇستى. ءىزىن باسقان اقىن سىڭلىلەرى ايجان تاباراك, ءساندى اقىلاەۆا, الما تۇسىپبەكوۆا, ءدىلدا ۋاليبەكتەر ايەل ماحابباتى مەن ارمانى, ايەل جانىنىڭ قۇپياسى تۋرالى جازعان اقىن اپالارىنا ارناعان ولەڭدەرىن تەبىرەنىسپەن وقىدى.
بۇل كەشتىڭ كوركەم وتۋىنە كىشكەنتاي وقىرماندار دا اتسالىستى. ا.الحابەك, ا.ءنۇرالى, ح.ەرجانقىزى, ا.جەڭىسبەكۇلى, ا.حاسەن, د.احمەتوۆا, ت. ب. بالاقانداردىڭ وزدەرى كىپ-كىشكەنتاي بولسا دا فاريزا اقىننىڭ «ساندۋعاش», «مازاسىز شاق», «اساۋ تولقىن», «داۋا» اتتى كىتاپتارىنان كولەمى ۇزاق جىر شۋماقتارىن جاتتاپ ايتۋى كورەرمەندى ءتانتى ەتتى. كىتاپحاناداعى قىزمەت كورسەتۋ جانە وقىرمانداردى تىركەۋ ءبولىمىنىڭ قىزمەتكەرى گۇلدار اۋەنقۇلوۆانىڭ ايتۋىنشا, فاريزا اقىنعا ارنالعان, سونىمەن بىرگە كوركەم ادەبيەتتى, پوەزيانى ناسيحاتتاۋ باعىتىنداعى شارالار تەك اقىننىڭ تۋعان كۇنىندە عانا ەمەس, الدا دا جيىرەك ۇيىمداستىرىلىپ تۇرادى. ەسكە الۋ كەشى جيناقى, اسەرلى ءوتتى, دەگەنمەن قازاق پوەزياسىنا ەرەكشە قۇبىلىس بولىپ كەلگەن فاريزا اقىننىڭ ورنى ءبىلىنىپ تۇرعانى انىق. كەش بارىسىندا جينالعان كوپشىلىكتىڭ فاريزا اقىندى ساعىنعانى بايقالىپ تۇردى.
