باس قالادان سوڭعى ەكى ايدا 1 ملن تەكشە مەتردەن اسا قار شىعارىلدى. بۇل جونىندە ەلوردا اكىمىنىڭ ورىنباسارى التىنبەك قايساعاليەۆ قالانىڭ كوممۋنالدىق قىزمەتىنىڭ تۇنگى اۋىسىمداعى جۇمىسىن قاداعالاۋ كەزىندە ءمالىم ەتتى, دەپ حابارلادى قالا اكىمدىگىنىڭ رەسمي سايتى.
كەشە قالادا قار تازالۋعا 1091 بىرلىك ارنايى تەحنيكا جانە 1744 جول جۇمىسشىلارى جۇمىلدىرىلدى. 25-نەن 26-نا قاراعان ءتۇنى 879 بىرلىك ارنايى تەحنيكا جانە 229 جۇمىسشىلارى ەڭبەك ەتتى. 25 جەلتوقسان كۇنى 19638 تەكشە مەتر قار شىعارىلدى (1637 رەيس). جالپى قىس باستالعالى 1122475 تەكشە مەتر قار تاسىلدى (93540 رەيس).
جۇمىس توبى الدىمەن جۇرتشىلىق كوپ قاتىنايتىن «نۇرلى جول» ۆوكزالىنىڭ اينالاسىن تەكسەردى. «باس قالانى قاردان تازالاۋ جۇمىستارى ءۇش اۋىسىممەن جۇرگىزىلەدى. قالانى قاردان تازارتۋعا 900 ارنايى تەحنيكا بىرلىگى جۇمىلدىرىلدى. ولاردىڭ باسىم بولىگى – «ساموسۆال», قار تيەيتىن كولىك, اۆتوگرەيدەر سەكىلدى تەحنيكالار. سونىمەن قوسا تۇنگى اۋىسىمدا جول جيەگىن تازالاۋ ءۇشىن 200 جۇمىسشى جاساعى شىقتى. ءبىر ايتا كەتەتىنى, كۇندىزگىگە قاراعاندا تۇنگى اۋىسىمدا شىعاتىن جۇمىسشىلار سانى ازداۋ بولادى. كۇندىز 1500-گە جۋىق جۇمىسشى مەن 1000-عا تارتا تەحنيكا قار تازالايدى. تۇنگى اۋىسىمداعى قىزمەتكەرلەر كەشكى ساعات 21:00-دەن تاڭعى 05:00 ارالىعىندا جۇمىس ىستەيدى. جينالعان قار قالا سىرتىنداعى ارنايى پوليگوندارعا شىعارىلادى. قالامىزدىڭ ءار اۋدانىنا بولىنگەن پوليگون بار» دەدى التىنبەك قايساعاليەۆ. سونداي-اق اكىم ورىنباسارى ءوز سوزىندە سەبىلگەن رەاگەنتتەر مەن قۇم-تۇز قوسپالارى كوكتايعاقتىڭ الدىن الاتىنىن ەرەكشە اتاپ ءوتتى. ەستەرىڭىزگە سالساق, بۇرناعى كۇندەرى وتكەن ءباسپاسوز ءماسليحاتىندا ەلوردا اكىمى التاي كولگىنوۆ تاپسىرىس بەرىلگەن تەحنيكالاردىڭ ءبىر بولىگى جەتكىزىلگەنىن, تاعى ءبىر بولىگى جاقىندا اكەلىنەتىنىن ايتقان بولاتىن. بۇل تۇرعىدا ەسكى تەحنيكالاردىڭ جاعدايى قالاي بولاتىنىن التىنبەك قايساعاليەۆ ءتۇسىندىردى. «قازىرگى ۋاقىتتا 157 ارنايى تەحنيكا ساتىپ الىندى. الايدا ەسكى تەحنيكالار ەسەپتەن شىعارىلمايدى. ولار ءارى قاراي دا قولدانىلا بەرەدى. ەسكى تەحنيكالاردىڭ ءبىر كەمشىلىگى تەز بۇزىلادى, كوبىرەك جوندەۋدى تالاپ ەتەدى. وسىعان بايلانىستى جاڭا تەحنيكالار ساتىپ الۋ قاجەت بولدى. جاڭا تەحنيكالار قاڭتار ايىنان باستاپ ىسكە قوسىلادى. بۇگىنگى تاڭدا قالا بويىنشا تازالىق جۇمىسىنىڭ 30 پايىزىن «استانا تازالىق» جشس جۇرگىزەدى. ودان بولەك جەكە 65 مەردىگەر كومپانيا جۇمىس ىستەيدى. ال بولىنگەن قارجى شىعارىلعان قاردىڭ كولەمىنە تىكەلەي بايلانىستى. بۇگىنگە دەيىن 1 ملن تەكشە مەتردەن استام قار شىعارىلدى» دەدى ا.قايساعاليەۆ. مامانداردىڭ مالىمەتىنشە, قالا تۇرعىندارى تاراپىنان اۋلا ءىشىن قاردان تازالاۋعا قاتىستى شاعىم ءجيى تۇسەدى. بۇل رەتتە التىنبەك قايساعاليەۆ تۇرعىنداردىڭ بەلسەندىرەك بولۋى كەرەكتىگىن ايتتى. «ءار ۇيگە قىزمەت كورسەتەتىن كومپانيالار, پيك-تەر اۋلا ءىشىن قاردان تازالاۋدى باقىلاۋدا ۇستاۋى كەرەك. ۇيدەن 5 مەتر قاشىقتىققا دەيىن تۇرعىنداردىڭ وزدەرى تازالاۋى ءتيىس. ال ءتيىستى دەڭگەيدە جۇمىس ىستەمەگەن ۇيىمدارعا ايىپپۇلدار سالىنىپ جاتىر. شىنىن ايتۋ كەرەك, جۇمىسىنا اسقان ۇقىپتىلىقپەن دە, ءجۇردىم-باردىم دا قارايتىن كومپانيالار بار. قازىر ولارمەن ءتيىستى جۇمىس جۇرگىزىپ جاتىرمىز. سول
سياقتى تۇرعىندار تاراپى دا بەلسەندى بولۋى كەرەك. قار تازالاۋ جۇمىستارىن تالاپ ەتۋ ءتيىس. سەبەبى قىزمەت كورسەتەتىن كومپانيالارعا اقشانى تۇرعىندار تولەپ وتىر» دەپ ءسوزىن تۇيىندەدى ول. سونىمەن قاتار, اكىم ورىنباسارى «نۇرلى جول» ۆوكزالىنان كەيىن «شۇبار» ىقشام اۋدانىندا جۇرگىزىلىپ جاتقان جۇمىسپەن تانىستى.
