ەلىمىزدىڭ باتىس وڭىرلەرىندە ۇلىستىڭ ۇلى كۇنى ناۋرىز مەيرامىن تويلاۋ 14 ناۋرىزدان باستالىپ كەتتى. ماسەلەن, بيىل ماڭعىستاۋدا رۋحاني جاڭعىرۋ باعدارلاماسى اياسىندا حالىقتى ىنتىماق پەن بىرلىككە باستايتىن ءداستۇرلى امال مەرەكەسى تۇڭعىش رەت رەسپۋبليكالىق دەڭگەيدە تويلاندى. اتاپ ايتقاندا, «امال-2018» مادەني شاراسىنا ەلۋ كيىز ءۇي تىگىلىپ, ەلىمىزدىڭ بىرقاتار ايماقتارىنان ونەرپازدار جينالىپ, ونەر كورسەتتى.
وبلىس اكىمى ەرالى توعجانوۆتىڭ شەشىمىنە سايكەس, «امال-2018» مەرەكەسىن رەسپۋبليكالىق دەڭگەيدە تويلاۋ باعدارلاماسى بويىنشا وتپان تاۋ – تاريحي مادەني كەشەنىندە 13 ناۋرىزدان باستالعان مادەني ءىس-شارالار 14 ناۋرىز كۇنى ۇلتىمىزدىڭ سالت-داستۇرلەرى مەن ونەرى كەڭىنەن اتاپ ءوتىلدى. اۋقىمدى وتكەن شاراعا جان-جاقتان ات ارىلتىپ كەلگەن 5 مىڭنان استام ادام قاتىستى. ءدۇبىرلى مادەني شارانى ۇيىمداستىرۋدا جەرگىلىكتى ءالىم ۇرپاقتارى دا ۇلەس قوستى.
بيىلعى باستى ەرەكشەلىك, امال مەرەكەسىنە ەلىمىزدىڭ بىرقاتار وبلىستارى دا اتسالىستى. اتاپ ايتقاندا, اتىراۋ, قىزىلوردا, وڭتۇستىك قازاقستان, شىعىس قازاقستان وبلىستارىنان, الماتى جانە استانادان قوناقتاردىڭ كەلۋى شارانىڭ اۋقىمدى وتكەنىنىڭ دالەلى بولدى. سونداي-اق, كورشى مەملەكەتتەر – تۇركىمەن ەلىنەن, وزبەكستاننان, رەسەيدىڭ سامارا, استراحان سىندى قالالارىنان دا قوناقتار كەلدى.
جىلدىڭ باسى بولىپ سانالاتىن ۇلىق مەرەكە سپورتتىق جارىستارمەن باستالدى. وتپان تاۋدا قازاقستاننىڭ ءار وبلىسىنان, ءار اۋدانىنان كەلەتىن قۇرمەتتى قوناقتارعا ارنالىپ بەرەكەلى داستارحان دايىندالدى. جەرگىلىكتى شەبەرلەردىڭ قولىنان شىققان بۇيىمداردان جارمەڭكە دە ۇيىمداستىرىلعان.
سول كۇنى وتپان تاۋداعى اقسارايدا «امال مەرەكەسى – رۋحاني جاڭعىرۋىمىزدىڭ جارشىسى» اتتى دوڭگەلەك ۇستەل ءوتتى. شاراعا جان-جاقتاعى كورشى وبلىستاردان قوناقتار جينالدى. تارقاتىپ ايتساق, قاراعاندى, شىعىس قازاقستان, اتىراۋ وبلىسى جانە تۇركىستان قالاسىنان كەلگەن زيالىلار باس قوسىپ, ءوز ويلارىن ورتاعا سالدى. جيىندا ەلباسىنىڭ ۇلت قۇندىلىقتارىنا قاتىستى ماقالاسى كەڭىنەن تالقىلانىپ, وي-پىكىر ايتىلدى. ول جەردە امال مەرەكەسى مەن كورىسۋ ءداستۇرىنىڭ ءمان ماعىناسى ءتۇسىندىرىلدى.
باسقوسۋعا ءتۇرلى وبلىستان ارنايى كەلگەن قوناقتار تويدىڭ كەرەمەت ءوتىپ جاتقاندىعى جانە ونىڭ جاستارعا بەرەرى مول ەكەندىگىن اتاپ ءوتتى. تۇركىستان قالاسى «ازىرەت سۇلتان» مەملەكەتتىك تاريحي-
مادەني قورىق-مۋزەي ديرەكتورى نۇربولات احمەتجانوۆ مۇراجايعا ارنايى اكەلگەن سىيىن تارتۋ ەتتى.
ماڭعىستاۋ وبلىسى اكىمى ەرالى توعجانوۆ جينالعان جۇرتشىلىقتى امال مەرەكەسىمەن قۇتتىقتادى. رەسپۋبليكالىق ارداگەرلەر ۇيىمى ورتالىق كەڭەسى توراعاسىنىڭ ءبىرىنشى ورىنباسارى, پروفەسسور ومىرزاق وزعانباەۆ مەرەكەگە جينالعان قاۋىمعا يگى تىلەك تىلەپ, اقجولتاي ءسوزىن ايتتى.
وبلىس اكىمى باستاعان توپ كەشكىسىن وتپان تاۋدىڭ ەڭ بيىگىندەگى «اداي اتا» كەسەنەسى باسىندا «بىرلىك وتىن» تۇتاتتى. ءبىر-بىرىنە اقجارما تىلەكتەرىن ارناعان جۇرتشىلىق مەرەكەلىك كونتسەرتتى تاماشا تابيعات اياسىندا كوتەرىڭكى كوڭىل-كۇيمەن قىزىقتادى.
تەلمان بەيسەنوۆ
