مەن وسى مەكەمەنىڭ تابالدىرىعىنان اتتاعانىما ەكى ايدان ەندى عانا استى. مەكەمەنىڭ اتاۋى – استانا قالاسى اكىمدىگىنىڭ «شاراپات» الەۋمەتتىك قىزمەت كورسەتۋ ورتالىعى» كوممۋنالدىق مەملەكەتتىك مەكەمەسى.
مەكەمەنىڭ كوپ جىلدان بەرگى, اتاپ ايتقاندا, 2003 جىلدان باستاپ ديرەكتورى, بۇگىندە زەينەتكەرلىك جاسقا تولىپ وتىرعان كەنجەبولات ساپارۇلى باپىشەۆ – ءوزى ىرگەسىن قالاسقان ابىرويلى مەكەمەنىڭ «ىستىعىنا كۇيىپ, سۋىعىنا توڭىپ جۇرگەن ازامات». ەڭبەك جولىن ۇستازدىقتان باستاپ, مەكتەپ ديرەكتورلىعىن اتقارىپ كورگەن جىگىتتىڭ بىردەن قارتتار مەن مۇگەدەكتەر ءۇيىنىڭ ديرەكتورلىعىنا قادام باسۋى تاۋەكەلدىڭ ءىسى ەدى. ماسەلە مۇنىڭ ءبىر قول جەتپەيتىن مانساپ ەكەندىگىندە ەمەس, ۇستازدىق پەن تالىمگەرلىكتىڭ سان الۋان مەكتەبىنەن وتكەن, ءومىردىڭ سان الۋان تاۋقىمەتىن تارتىپ, ارىپ-اشقان, ابدەن قاجىعان, شارشاعان, كوپتى كورگەن قارت ادامداردىڭ الدىندا ۇستازدىق كورسەتۋ دەگەنىڭىز قيىننىڭ قيىنى بولاتىن. وسىندا تاپ بۇگىنگى كۇنى ءومىر ءسۇرىپ جاتقان 334 ادامنىڭ 334 ءتۇرلى پروبلەماسى بار.
كەنجەبولات ساپارۇلى تاعدىرى سان ءتۇرلى تالكەككە ۇشىراعان كارىپ جانداردىڭ بىرىنە اعا, بىرىنە ءىنى بولعانىمەن, ءبارىمىز ءۇشىن ول – اكەدەي. ويتكەنى ول ۇلى وتان سوعىسىنىڭ ارداگەرلەرىنە دە, سولارعا تەڭەستىرىلگەندەرگە دە, سوعىس كەزىندە تىلدا ەڭبەك ەتكەن ارداگەرلەرگە دە, جاستاي ارباعا تاڭىلعان بوزداقتارعا دا قامقورشى بولا ءبىلدى.
كەنجەكەڭ وسى جۇمىسقا كىرىسپەس بۇرىن اقىل سۇراي بارعاندا اناسىنىڭ: «بالام, سەندەر مەنى باعىپ-قاعىپ, بار جاعدايىمدى جاساپ وتىرسىڭدار. سەن ۇلكەن جاۋاپكەرشىلىكتى تالاپ ەتەتىن اۋىر جۇمىسقا بەت العان ەكەنسىڭ. مەن ءبىر امانات ايتايىن, جارىعىم: «ەگەر سول كىسىلەردى مەنى كۇتكەندەي كۇتە الساڭ, وندا سول جۇمىسقا بار. ەگەر ىستەي الماساڭ, دوعار» دەگەنى بار. قۇدايعا شۇكىر, كەنجەبولات ساپارۇلى اناسىنىڭ وسى اماناتىن ءمىنسىز اتقارىپ كەلەدى. بۇعان ونىڭ ۇكىمەت تاراپىنان, مينيسترلىكتەر مەن قالالىق اكىمدىك تاراپىنان العان ناگرادالارى, ماراپات حاتتارى مەن العىس كۋالىكتەرى ايعاق بولا الادى. ونىڭ ءبارىن تىزبەكتەپ جاتپادىق.
جالپى سانى 400 ادامعا ارنالعان بۇل مەكەمەدە قازىر شتات بويىنشا 220 ادام جۇمىس ىستەيدى. ولاردىڭ قاتارىندا سانيتارلار دا, دارىگەرلەر دە, الەۋمەتتىك قىزمەت كورسەتۋ سالاسىنىڭ قىزمەتكەرلەرى دە, پسيحولوگتار دا, مەدبيكەلەر دە, كۇتۋشىلەر دە بار. ءبارىنىڭ جۇمىستارى باستارىنان اسادى. توسەك تارتىپ جاتقان I جانە II توپتاعى مۇگەدەكتەرگە بەس مەزگىل اس دايىنداۋ, تاماقتاندىرۋ, ىدىس-اياقتارىن جۋ, توسەك ورىندارىن اۋىستىرىپ تۇرۋ, بولمەلەرىن مۇنتازداي قىپ تازالاۋ, وزدىگىنەن جۇرە المايتىنداردى ارباعا وتىرعىزىپ سەرۋەندەتۋ, ءۇستى-باستارىن تازالاپ, جۋىندىرىپ-كيىندىرۋ, اياق استىنان اۋىرىپ قالعانداي بولسا, جەدەل جاردەم شاقىرتىپ, ەمحاناعا الىپ بارىپ, الىپ كەلۋ, ءتىپتى جامان ايتپاي جاقسى جوق, كوز جۇما قالسا, مايىتحاناعا الىپ بارۋ – وسى جوعارىداعى اتالعان قىزمەت كورسەتۋشىلەردىڭ موينىندا. وسىنىڭ ءبارى دارحان جۇرەكتى باسشىنىڭ اسقان كىشىپەيىلدىلىگىن, قايىرىمدىلىعىن, كەڭدىگىن, قاراپايىمدىلىعىن كورسەتسە كەرەك. «جينالىس زالىنا, اسحاناعا ءتاۋىر كيىمدەرىڭمەن بارىڭدار. داياشىلارعا تاڭەرتەڭ – «قايىرلى تاڭ!», اس ىشكەن سوڭ «ءدام-تۇزدارىڭىزعا راقمەت» دەۋدى ۇمىتپاڭىزدار» دەپ ەسكەرتىپ وتىراتىنىن تالاي رەت ەستىدىم. ءيا, ءبىر اۋىز جىلى ءسوزدىڭ ءوزى جانىڭا جىلۋ بەرەدى.
«شاراپات» ورتالىعى بەس بلوكتان: اكىمشىلىك-باسقارۋ بلوگى, «ب» بلوگى, «ۆ» بلوگى, «گ» بلوگى مەن «د» بلوكتەرىنەن تۇرادى. ءبارىنىڭ اسحاناسى ورتاق بولعانىمەن, ءار بلوكتىڭ, ءار قاباتتاعى تۇرعىنداردىڭ ءوز قوناق بولمەلەرى, وزدەرىنشە اس دايىنداپ ىشەتىن ورىندارى تاعى بار. مۇندا كىرگەن ادام ءبىر-بىرىمەن جالعاسقان وسى بلوكتەردىڭ ءبارىن ارالاپ شىعا الادى. ءار بلوگىڭىز – ءۇش قاباتتى ءۇي. ولاردان باسقا ءماجىلىس زالى, كىتاپحانا, كيىم تىگەتىن شەبەرحانا, شاشتاراز, سپورت زالى, توعىزقۇمالاق, شاحمات, دويبى, بيليارد ۇستەلدەرى, دارىگەرلىك كابينەتتەر, حوش ءيىستى وسىمدىكتەر ءوسىپ تۇرعان زال تاعى بار.
ەندى وسىنىڭ ءبارىن ۇيلەستىرىپ وتىرعان اكىمشىلىك قىزمەتكەرلەرىن اتاپ وتكەننىڭ ەش ارتىقتىعى بولماس دەپ ويلايمىن. بۇل رەتتە ديرەكتوردىڭ الەۋمەتتىك جۇمىس جونىندەگى ورىنباسارى ارداق بەيسەنبايقىزى سەيىتوۆانى, ديرەكتوردىڭ اكىمشىلىك جانە شارۋاشىلىق جونىندەگى ورىنباسارى جانار نۇركەشقىزى ەسەنامانوۆانى, مەديتسينا ءبولىمىنىڭ مەڭگەرۋشىسى بولاتبەك مۇساحانوۆتىڭ تاباندى دا تىڭعىلىقتى جۇمىسى ەرەكشە اتاپ وتۋگە لايىق.
ال استاناداعى قالالىق, اۋداندىق اكىمدىكتەرمەن, ءارتۇرلى مادەنيەت وشاقتارىمەن, وقۋ ورىندارىمەن تىنىمسىز بايلانىس جاساپ, كوڭىلدى سەرۋەندەر, تالىمگەرلىك كەزدەسۋلەر, ويىن-ساۋىقتار ۇيىمداستىرۋدا الدارىنا جان سالمايتىن, جۇمىسقا بار ىقىلاسىمەن بەرىلگەن الەۋمەتتىك جۇمىس جونىندەگى مامان ساۋلە قازبەكقىزى قايىروۆانى, كۇن دەمەي, ءتۇن دەمەي تىنىم كورمەيتىن سانيتارلار زاۋرەش ەرجانوۆانى, قالامقاس بايداۋلەتوۆانى, ساۋلە سادۆاكاسوۆانى, ءازيزا ماحمەتوۆانى قالاي ماقتاساڭ دا ارتىق بولمايدى. اڭگىمە ماقتاۋدا ەمەس, ماقتاۋعا لايىقتى ءىس اتقارىپ جۇرگەندىكتەرىندە بولىپ وتىر-اۋ.
ال ەندى وسى ءۇيدىڭ دۇنيە جيھازدارىنان باستاپ توسەك ورىندارىنا دەيىن تۇگەندەپ, بۇتىندەپ, قامتاماسىز ەتىپ وتىراتىن ايدانا ەسششانوۆا مەن ونىڭ ورنىن جاڭا عانا باسقان مارال جۋنۋسوۆانىڭ ەڭبەكتەرى مۇلدەم بولەك. بارىڭدى جاراستىرىپ, جوعىڭدى تاۋىپ بەرىپ وتىراتىندار دا وسىلار.
«شاراپات» الەۋمەتتىك ءۇيىنىڭ ءومىردەن كوپ قاعاجۋ كورىپ, ۇمىتتەرى ۇزىلۋگە شاق قالعان بەيكۇنا جاندارعا جاساپ وتىرعان جاقسىلىقتارىنىڭ ءبارىن ايتىپ جەتكىزۋ مۇمكىن ەمەس. ماسەلەن, كۇندىزدى قويىپ, تۇنىمەن شەكارا كۇزەتكەن ساقشىلارداي كوز ىلمەي قىزمەت ەتەتىن مەدبيكەلەر ناتاشا شايمەردەنوۆا مەن نۇرگۇل نايىپوۆانىڭ ەڭبەگىنە ريزا بولاسىڭ.
الەۋمەتتىك قىزمەت كورسەتۋ ورتالىعى بولعاندىقتان, بۇدان ەكى اي بۇرىن مۇندا كەلۋدىڭ جەڭىلدەتىلگەن جاڭا ءتۇرى اشىلدى. ول كۇندىزگى جارتىلاي ستاتسيونار دەپ اتالادى. مەكەمەگە ورنالاسقان قاريا تاڭەرتەڭ كەلىپ, كەشكىسىن قايتىپ كەتەدى. ءۇش مەزگىل تاماعىن وسىندا ءىشىپ, تۇرعىندارعا كورسەتىلەتىن قىزمەت تۇرلەرىن تۇگەلدەي قابىلدايدى, ۋاقىتتارىن قىزعىلىقتى وتكىزەدى.
مۇندا, باسقانى ايتپاعاندا, كەشەگى قۋعىن-سۇرگىن قۇرباندارى دا پانا تاۋىپ وتىر. ايتىپ وتىرسا, ولاردىڭ باستان كەشىرگەن قاسىرەتىن جۇمىر باستى ادامعا بەرمەسىن. كەنجەبولات ساپارۇلى باسقاراتىن ۇجىم سونىڭ بارىنە اسقان قامقورلىقپەن, جاۋاپكەرشىلىكپەن قارايدى.
باياعىدا اناسىنىڭ ايتقان اماناتى دا وسى ەمەس پە ەدى؟! جانى جارالى, جۇرەگى شارشاۋلى قارتتاردى, كەمباعالداردى مەنى كۇتكەندەي كۇتە ءبىل, دەمەۋ بول دەمەپ پە ەدى؟ كەنجەبولات ساپارۇلى اناسىنىڭ وسى وسيەتىن ۇمىتپاي, بويتۇمارداي ساقتاپ, تولىعىمەن اقتاپ ءجۇر.
ماتكەرىم اكىمجانوۆ,
قازاقستان جازۋشىلار وداعىنىڭ مۇشەسى
