بيىل وتكەن استانا قالالىق ءماسليحاتىنىڭ سەسسيالارىندا ءارتۇرلى ماسەلەلەر بويىنشا 100-دەن استام شەشىم شىعارىلدى. جالپى, وسى جىلدىڭ 11 ايىندا ءماسليحات دەپۋتاتتارىنىڭ جەكە قابىلداۋىندا – 1172 ادام, «نۇر وتان» پارتياسىنىڭ قوعامدىق قابىلداۋىندا 106 ادام بولدى. وسىنىڭ قورىتىندىسىندا 1300 ماسەلە قارالدى. حالىق, نەگىزىنەن, جولداردىڭ قۇرىلىسى مەن قايتا سالىنۋى, قالا اۋماعىنىڭ اباتتاندىرىلۋى مەن سانيتارلىق جاعدايى, تۇرعىن ءۇي قورىنىڭ تەحنيكالىق احۋالى, الەۋمەتتىك جانە مەديتسينالىق كومەك كورسەتۋ, وزگە دە وزەكتى ماسەلەلەردى كوتەردى.
جاقىندا وتكەن قالالىق ءماسليحاتتىڭ ءححىىى سەسسياسىندا دەپۋتاتتار قالا تىرشىلىگىنە قاتىستى بىرقاتار سىن-ەسكەرتپەلەردى, ۇسىنىستاردى جەتكىزدى. سونىڭ ىشىندە ەلوردانىڭ الەۋمەتتىك-ەكونوميكالىق دامۋى, ايماقتىق ينۆەستيتسيالىق ساياساتتى جۇزەگە اسىرۋ مەن استاناعا ينۆەستيتسيالاردى تارتۋ ستراتەگياسىن قالىپتاستىرۋ, بيۋدجەت, ەكونوميكا, ونەركاسىپ جانە كاسىپكەرلىك ماسەلەلەرى قوزعالدى. ءبىر ەسكەرەتىن جاعداي, ول ماسەلەلەردىڭ بارىنە قالا باسقارمالارى ءتيىستى جاۋاپ بەردى.
وسى جىلى استانانىڭ ورتا مەكتەپتەرىنە بەس قوسىمشا عيمارات سالىنىپ, پايدالانۋعا بەرىلدى. دەپۋتات رامزيا ۋمەرباەۆا اتالمىش نىسانداردىڭ وقۋ ورىندارىنداعى تىعىزدىقتى ازايتۋعا ءبىراز سەپتىگىن تيگىزگەنىن ايتا كەلىپ, بۇل جۇمىستى جالعاستىرۋدى ۇسىندى. وسىنىڭ سەبەبىن ول جاپسارلاس عيماراتتى قاجەت ەتەتىن مەكتەپتەر ءالى دە بار ەكەندىگىمەن ءتۇسىندىرىپ, №59 مەكتەپ-ليتسەي جانە №75 مەكتەپ-گيمنازياسىنان وسىنداي ءوتىنىش تۇسكەنىن جەتكىزدى. سونداي-اق, شۇبار تۇرعىن الابىندا مەكتەپ قۇرىلىسىن باستاۋ اسا وزەكتى ماسەلەگە اينالعانىن ايتتى. دەپۋتاتتىڭ سوزىنشە, قوسىمشا عيماراتتاردى كەرەك-جاراقپەن جابدىقتاۋ ءىسى دە ءتيىستى دەڭگەيدە ەمەس. قاراپايىم ماسەلە – پارتالاردىڭ ءوزى جەتكىلىكسىز بولىپ وتىر.
وعان ءبىلىم باسقارماسى تاراپىنان قازىرگى تاڭدا 11200 ورىنعا شاقتالعان 10 مەكتەپ پەن 1 قوسىمشا عيماراتتىڭ قۇرىلىسى باستالعانىن, بۇل جاعداي 5 مەكتەپتىڭ تىعىزدىعىن ازايتىپ, ءۇش اۋىسىمدىق 3 مەكتەپتىڭ ماسەلەسىن شەشەتىندىگى ايتىلدى. ال №59 مەكتەپ-ليتسەيدە 3042 وقۋشى ەكى اۋىسىمدا, №75 مەكتەپ-گيمنازياسىندا 3028 وقۋشى ءۇش اۋىسىمدا وقىپ جاتىر. قازىرگى تاڭدا اتالمىش وقۋ ورىندارىنا قوسىمشا عيمارات سالۋ ماسەلەسى قارالىپ جاتىر. ال شۇبار تۇرعىن الابىندا مەكتەپ قۇرىلىسىن 2020 جىلى باستاپ, 2021 جىلى اياقتاۋ جوسپارلاندى. كەلەسى جىلى مەكتەپتەردى جابدىقتاۋ بويىنشا دا بيۋدجەتتىك كوميسسياعا قوسىمشا قاجەتتىلىكتەر تۋرالى ءوتىنىش جىبەرىلدى.
قۇرىلىس باسقارماسىنىڭ مالىمەتىنشە, بۇگىنگى تاڭدا №57 جانە 64 مەكتەپتەرگە قوسىمشا عيمارات سالۋ بويىنشا جوبالىق-سمەتالىق قۇجاتتى ازىرلەۋ جۇمىسى اياقتالدى. №24, 28, 31, 40, 51, 52, 60, 68 مەكتەپتەرگە قاتىستى ءتيىستى قۇجاتتى ازىرلەۋ جۇمىسى جالعاسۋدا.
دەپۋتات زەينوللا شىبكەنوۆ ءوندىرىس تۇرعىن الابى مەن كيرپيچنىي كەنتىندە جولداردى سالۋ مەن جارىقتاندىرۋ ماسەلەلەرىن كوتەرگەنىنە 5 جىل بولعانىن ايتىپ, جاڭاجول كوشەسىندەگى جولدى سالۋ ماسەلەسى شەشىلمەي كەلە جاتقانىن, ءۇش جىل بۇرىن جازىق كوشەسىندەگى جولدىڭ قۇرىلىسى باستالىپ, اياقتالماعانىن جەتكىزدى. بۇل جاعداي حالىقتىڭ تۇرمىسىنا كەرى اسەر ەتىپ وتىرعانىن, ماسەلەن, بۇل جولداردا ءجيى بولاتىن كولىك كەپتەلىستەرىنەن جەدەل جاردەم كولىگى كەشىگىپ كەلەتىنىن ايتتى. ءوندىرىس تۇرعىن الابىنداعى مەديتسينالىق نىساندى كەڭەيتۋ ماسەلەسى دە شەشىلمەگەنىنە ءبىراز ۋاقىت ءوتتى.
اۆتوموبيل جولدارى باسقارماسى مەن ەنەرگەتيكا باسقارماسىنىڭ مالىمەتتەرىنە سۇيەنسەك, بيىل استانا قالاسىنىڭ شەتكەرى ايماقتارىن دامىتۋ تۇجىرىمداماسى اياسىندا 18 كوشەنىڭ جولدارى جوندەلدى. 2018 جىلى 25 كوشە جوندەۋدى قاجەت ەتەدى. استانا قالاسىن دامىتۋدىڭ باس جوسپارىنا سايكەس ءوندىرىس تۇرعىن الابىندا جولدار مەن ينجەنەرلىك جەلىلەردى سالۋدىڭ جاڭا جوباسى ازىرلەنە باستادى. ونىڭ ىشىنە جالپى ۇزىندىعى 10,1 شاقىرىمدى قۇرايتىن 20 كوشە ەنىپ وتىر. جاڭاجول كوشەسىن كەڭەيتۋ بويىنشا بيۋدجەتتىك ءوتىنىشحات جىبەرىلدى. ەگەر ءتيىستى قارجى بولىنسە, الداعى جىلى جوبالىق-سمەتالىق قۇجات ازىرلەنەدى.
تۇرعىن ءۇي باسقارماسىنىڭ مالىمدەۋىنشە, وندىرىستەگى وتباسىلىق-دارىگەرلىك امبۋلاتوريا التى قاباتتى تۇرعىن ءۇيدىڭ ءبىرىنشى قاباتىندا ورنالاسقان. امبۋلاتوريانى كەڭەيتۋ ءۇشىن سول ءبىرىنشى قاباتتاعى ەكى پاتەردى بوساتۋ كەرەك. ولاردىڭ يەلەرىنە باسقا پاتەرلەر ۇسىنىلدى. ونىڭ بىرەۋى ۇسىنىلعان پاتەرگە كوشۋگە كەلىستى. ەكىنشىسى بولسا باس تارتتى. سول سەبەپتەن ونىمەن پاتەر اۋىستىرۋ تۋرالى كەلىسسوزدەر جۇرۋدە. ءبىرىنشى پاتەر بويىنشا بۇگىندەرى دەنساۋلىق ساقتاۋ باسقارماسىنىڭ بالانسىنا وتكىزۋ جۇمىسى ءجۇرىپ جاتىر.
استاناداعى №1 يندۋستريالدى پارك اۋماعى ينفراقۇرىلىممەن 65 پايىزعا عانا قامتىلعان. وسى ماسەلەنى كوتەرگەن دەپۋتات امان ايۋپوۆ نەگىزگى ماسەلە ورتالىق جىلۋ جۇيەسىنە تىرەلىپ تۇرعانىن جەتكىزدى. پارك اۋماعىنداعى 41 نىساننىڭ 10-ىنا عانا جىلۋ تارتىلعان. وزگە كاسىپورىندار اي سايىن جىلۋعا 2-3 ملن تەڭگەدەن بولۋگە ءماجبۇر.
دەپۋتاتتىڭ ايتۋىنشا, بۇل پروبلەماعا قوسا پارك اۋماعىنا جۇمىسكەرلەردى اكەلۋ ماسەلەسى وزەكتى. مۇندا ءبىر عانا قالالىق باعدار – №64 اۆتوبۋس كەلەدى. ال ونىڭ قاتىناۋ ارالىعى دا تىم كوپ. بۇل باعدار پارك اۋماعىن تۇگەل قامتىمايتىن دا بولىپ وتىر. وسى جاعداي جۇمىسكەرلەرگە قولايسىزدىق تۋدىرۋدا. اسىرەسە, قىس مەزگىلىندە دالانى اياز قۇرساعاندا نەمەسە بوران سوققاندا جۇمىسقا جەتۋ ءۇشىن قينالۋعا تۋرا كەلەدى. وعان اۆتوبۋس ايالدامالارىنىڭ جوقتىعىن قوسىڭىز.
بۇل ماسەلە بويىنشا ينۆەستيتسيالار جانە دامۋ باسقارماسى دەپۋتاتقا اۆتوبۋس باعىتىن وزگەرتۋ جانە قوسىمشا باعدار جىبەرۋ ماسەلەسى ۆەدومستۆوارالىق كوميسسيا وتىرىستارىندا قارالعانىن حابارلادى. قورىتىندىسىندا «استانا لرت» كومپانياسى مەن الماتى اۋدانى اكىمدىگى №64 اۆتوبۋستىڭ باعىتىن وزگەرتۋ جانە ۇزارتۋ جۇمىسىن جۇرگىزگەن. ال قوسىمشا باعدار جىبەرۋ ماسەلەسى زەرتتەلۋ ۇستىندە.
جولاۋشىلار كولىگى باسقارماسى №1 يندۋستريالدى پارككە ءبىر عانا اۆتوبۋستىڭ كەلەتىنىن اۋماقتا تۇرعىن ۇيلەر, ساۋدا ورتالىقتارى, قوناقۇيلەر, ەمحانالار جانە وزگە دە الەۋمەتتىك نىسانداردىڭ جوقتىعىمەن ءتۇسىندىردى. وسى سەبەپتەن اتالمىش باسقارما قىزمەتتىك تاسىمالداۋدى ۇيىمداستىرۋ ماقساتىندا تاسىمالداۋشىمەن جەكە كەلىسىمشارت جاساۋدى ۇسىندى.
دەپۋتات سايات باتپەنوۆ وعان №1 يندۋستريالدى پاركتەگى كاسىپكەرلەردەن كاسىپورىنداردى جارىقتاندىرۋ جونىندە ءوتىنىش كەلىپ تۇسكەنىن جەتكىزدى. ەنەرگەتيكا باسقارماسى تاراپىنان پارك اۋماعىن جارىقتاندىرۋ, سۋمەن جانە جىلۋمەن قامتۋ جۇمىستارىن تولىعىمەن اياقتاۋ الداعى جىلدىڭ اياعىنا دەيىن جوسپارلانىپ وتىرعانى, ءتيىستى جوبالار «گوسەكسپەرتيزا» مەكەمەسىنىڭ قاراۋىندا جاتقانى ايتىلدى.
امانعالي قالجانوۆ
