اندەرى حالىق جۇرەگىنە ۇيالاعان…
«Cەنىڭ دە, نۇرعيسانىڭ دا اندەرىندە ءومىر بار». دىنمۇحامەد قوناەۆ قازاق ءۆالسىنىڭ كورولى ءشامشى قالداياقوۆپەن كەزدەسكەندە كومپوزيتورعا وسىلاي دەپتى. بۇل تۋرالى جازۋشى, جۋرناليست ورازبەك بودىقوۆ ءشامشى جايلى ەستەلىگىندە جازىپ كەتكەن. ءشامشىنى ءبىرىنشى حاتشىنىڭ قابىلداۋىنا نۇرعيسانىڭ الىپ كىرگەندىگى جونىندە دە اڭگىمە بار. قوس كلاسسيك كومپوزيتور اراسىندا ۇلكەن دوستىق بولعان. اندەرى دە ۇلتىمىزعا ماڭگىلىك مۇرا بولىپ قالدى. استانا قالاسى مەملەكەتتىك اكادەميالىق فيلارمونياسى «استانا» كونتسەرت زالىندا «ۇمىتىلماس اندەر» اتتى كونتسەرت وتكىزدى.
قازاقستاننىڭ حالىق ءارتىسى نۇرعالي ءنۇسىپجانوۆتىڭ «مەن ءشامشى مەن نۇرعيسانىڭ جەكەمەنشىك ءانشىسى ەدىم» دەگەنى بار. ارقالى اقىن سەرىك اقسۇڭقارۇلى:
ءشامشىنىڭ جاراتقاندا جاپپار يە
ءبىر دىبىس تانىنە ونىڭ سىيماي قاپتى…
ءبىز – تاسپىز – اللا كوكتەن نۇر قۇيسا دا,
اينالا المايتۇعىن جىر-حيسساعا.
شامشىگە سىيماي قالعانسيقىرىڭدى
بەرگەن ول سونى سەزىپ – نۇرعيساعا, – دەپ جىرلايدى.
قوس كومپوزيتوردىڭ شىعارماشىلىعىندا ەل مەن جەر تۋرالى اندەر جەتىپ ارتىلادى. ماسەلەن, ءشامشى قالداياقوۆتىڭ اندەرىنەن گەوگرافيا ساباعىن وتكىزۋگە بولادى دەگەن قالجىڭ بولسا دا, اقيقاتتان الىس ەمەس ءسوز جۇرت اراسىندا ءجيى ايتىلادى. راسىمەن, ءشامشىنىڭ اندەرىندە قامتىلماعان بايتاق قازاقستانداعى جەر جوق شىعار. نۇرعيسا تىلەنديەۆتىڭ «ءوز ەلىم», «سارجايلاۋ», ت.ب. وسى سىندى اندەرىن ەل بىلەدى.
ءشامشى مەن نۇرعيسادا جۇرەكتىڭ قىلىن شەرتەتىن, اسەم سازى تەربەيتىن تۋىندىلار دا بارشىلىق. كومپوزيتورلارعا ارنالعان كەشتىڭ ءبىر ەرەكشەلىگى, شىرقالعان اندەردىڭ باسىم كوپشىلىگى جاندى داۋىستا, فيلارمونيانىڭ سيمفونيالىق وركەسترىنىڭ سۇيەمەلدەۋمەن شىرقالدى. تامىلجىتا ورىندالعان سونداي اندەردىڭ ءبىرى ءشامشىنىڭ «ارىس جاعاسىندا» تۋىندىسى بولدى.
بۇعان قوسا, «ساعىنىشىم مەنىڭ», «باقىت قۇشاعىندا», «شىعىستىڭ شولپانى», «انا تۋرالى جىر», «تۋعان جەر», «ساعىندىم عوي» سىندى حالىققا تانىمال ءھام سۇيىكتى اندەر ايتىلدى.
كونتسەرتكە قازاقستان جانە تاتارستاننىڭ حالىق ءارتىسى نۇرجامال ۇسەنباەۆا, قازاقستاننىڭ ەڭبەك سىڭىرگەن ءارتىسى باعدات سامەدينوۆا, قازاقستاننىڭ ەڭبەك ءسىڭىرگەن قايراتكەرلەرى ازامات جىلتىركوزوۆ, التىناي جوراباەۆا, قايىرجان بەردىباي, مادەنيەت سالاسىنىڭ ءۇزدىگى نۇرعالي تۇرلىبەكوۆ, حالىقارالىق جانە رەسپۋبليكالىق بايقاۋلاردىڭ لاۋرەاتتارى ارايلىم راحىمقىزى, شاحريزادا تىنىشتىق, التىنبەك ءابىلدا, ءداستۇر اسىلحان, مۇراتبەك حايرولدا, ديحان ىلياشەۆ قاتىستى.
بۇل كەشكە حالىق كوپ جينالدى. وزدەرىنىڭ سۇيىكتى اندەرىن تىڭداعان جۇرت كونتسەرتتەن كوڭىلدەنىپ قايتتى.