«سەرگەك» فوتو-بەينەتىركەۋ جانە بەينەباقىلاۋ جۇيەسىنىڭ ارقاسىندا مەملەكەتتىك بيۋدجەتكە جالپى سوماسى 1 ملرد 270 ملن تەڭگە كولەمىندە قارجى ءتۇسىپتى.
ناتيجەسىندە جول-كولىك وقيعالارى 16 پايىزعا, ودان جارالاناتىندار سانى 22 پايىزعا, اپات سالدارىنان بولاتىن ءولىم 54 پايىزعا تومەندەگەن. ەستەرىڭىزگە سالساق, استانادا «فوتو-بەينەتىركەۋ جانە بەينەباقىلاۋ اپپاراتتىق-باعدارلامالىق كەشەندى قۇرۋ جانە پايدالانۋ» جوباسى بىلتىر قالالىق اكىمدىك پەن «استانا Innovations» اق جانە «كوركەم تەلەكوم» جشس اراسىندا مەملەكەتتىك-جەكەمەنشىك ارىپتەستىك اياسىندا جۇزەگە اسقان بولاتىن. ايتا كەتۋ كەرەك, بۇل – ەلىمىز بويىنشا مەملەكەتتىك-جەكەمەنشىك ارىپتەستىك اياسىندا اقپاراتتىق تەحنولوگيا مەن قاۋىپسىزدىك باعىتىندا جاسالعان العاشقى كەلىسىمشارت. سونداي-اق «سەرگەك» – نازارباەۆ ۋنيۆەرسيتەتىنىڭ عالىمدارىنىڭ قاتىسۋىمەن جاسالعان وتاندىق جۇيە. ونىڭ نەگىزىندە ماشينالىق وقىتۋ جەلىلەرىنىڭ نەيروندى تەحنولوگياسى قولدانىلعان. جوبا اياسىندا 13 مىڭ كامەرا قويۋ جانە ينتەگراتسيالاۋ كوزدەلسە, ونىڭ 6 مىڭى قالا كوشەلەرىنىڭ 400 قيىلىسى مەن 300 جەلىلىك ۋچاسكەسىنە, 4 مىڭى ادامدار كوپ جينالاتىن ورىندارعا, ساۋدا, ويىن-ساۋىق جانە بيزنەس ورتالىقتارىندا ورناتىلىپ, 3 مىڭى سىرتقى كامەرانى ينتەگراتسيالاۋعا بەلگىلەنگەن.
