«حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ اياسىندا پرەمەر-ءمينيستردىڭ ورىنباسارى ەرالى توعجانوۆقا ەلوردالىق سىبايلاس جەمقورلىققا قارسى ءىس-قيمىل دەپارتامەنتى جانىنداعى «Antikor وrtalygy» سەرۆيستىك ورتالىعىنىڭ جۇمىسى تانىستىرىلدى. ءىس-شاراعا سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اليك شپەكباەۆ, ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ, نۇر-سۇلتان قالاسى اكىمىنىڭ ورىنباسارى باقتيار ماكەن قاتىستى.
ورتالىقتىڭ نەگىزگى قىزمەتى قوعاممەن اشىق الاڭدا ءوزارا قارىم-قاتىناس جاساۋ جانە تۇرعىندارمەن ءتيىمدى كەرى بايلانىس ورناتۋعا باعىتتالعان. قابىرعالارى اينەكپەن جابدىقتالعان دەپارتامەنت قىزمەتكەرلەرىنىڭ كابينەتتەرىن كورگەن قوناقتار بۇل باستامالاردىڭ اشىقتىق پەن سەنىمدىلىكتى قامتاماسىز ەتەتىنىن اتاپ ءوتتى. قوناقتارعا تۇرمىستىق سىبايلاس جەمقورلىقتى جويۋ, مەملەكەتتىك قىزمەتتى الۋ كەزىندە قولايلى جاعدايلار جاساۋ جانە قوعامدىق باقىلاۋدىڭ ىسكە اسىرىلۋىن قامتاماسىز ەتۋ ماقساتىندا «استانا ادالدىق الاڭى» جوباسى اياسىندا اتقارىلىپ جاتقان باستامالار تانىستىرىلدى.
سونداي-اق مەملەكەتتىك مەكەمەلەردىڭ بيۋدجەت قاراجاتتارىنىڭ جۇمسالۋىن ونلاين رەجيمدە قوعامدىق باقىلاۋعا مۇمكىندىك بەرەتىن «اشىق بيۋدجەتتەردىڭ ينتەراكتيۆتى كارتاسى» جوباسى ۇسىنىلدى. دەپارتامەنت قىزمەتكەرلەرى كارانتين جاعدايىندا تۇرعىندارمەن جەدەل بايلانىس ورناتۋعا قولايلى «Antikor.Live» جوباسى اياسىندا جۇرگىزىلەتىن تىكەلەي ەفيرلەر مەن بريفينگ ستۋدياسىنىڭ جۇمىسى تۋرالى ايتتى. سىبايلاس جەمقورلىققا قارسى قىزمەت جانىنداعى اقپاراتتىق-اعارتۋشىلىق شتابىنىڭ جەتەكشىسى ىرزا تۇرسىنزادا قوعامدا سىبايلاس جەمقورلىققا قارسى مادەنيەتتى قالىپتاستىرۋ, ادالدىق پەن پاراساتتىلىق قاعيداتتارىن ناسيحاتتاۋ باعىتىندا اتقارىلىپ جاتقان جۇمىستارى جونىندە اقپارات بەردى.
كەزدەسۋ قورىتىندىسى بويىنشا ەرالى توعجانوۆ سىبايلاس جەمقورلىققا قارسى ءىس-قيمىل دەپارتامەنتى قىزمەتىندەگى اشىقتىق پەن قوعاممەن سىندارلى ىنتىماقتاستىقتى قامتاماسىز ەتۋدەگى جۇمىسىنا وڭ باعاسىن بەردى. سونىمەن قاتار بۇل تاجىريبەنى اقپاراتتىق الاڭداردا كەڭىنەن جاريالاپ, باسقا مەملەكەتتىك ورگانداردىڭ جۇمىسىنا ەنگىزۋ قاجەتتىگىن اتاپ ءوتتى.
