مۇرجا تازالاۋشىلار جەتىسپەيدى

بيىل ەلوردادا 300-گە جۋىق ءورت وقيعاسى تىركەلدى. ونىڭ جارتىسىنان كوبى جەكەمەنشىك تۇرعىن ۇيلەردە بولعان. ماماندار الداعى قىس كەزىندە ءورت قاۋپى مۇنان ارتا تۇسپەسە, كەمىمەيتىنىن ايتادى. اسىرەسە, پەش جاعاتىندار اباي بولعان ءجون.

وسى كۇنى ەلوردادا مۇرجا تازالاۋشىلارعا دەگەن سۇرانىس ارتىپ تۇر. جەكە سەكتور تاراپىنان شاقىرتۋلار كوپ. قىسقا قازىردەن قامدانعان جۇرت ەرلان بولات سەكىلدى مۇرجا تازالاۋ­شىلاردى ىزدەيدى. ولاردىڭ دا جۇمىسى قاۋىرت قازىر.
ەرلان بولات, مۇرجا تازالاۋشى:
– ءبىز بۇرىن اۋىلدا تۇرعاندا وسىنداي قازاقى پەش بولعان. ءاردايىم بىقسيدى. اكەم ونى تازالايدى. سوسىن ەسەيگەن سوڭ مەن دە تازالايتىن بولدىم. قازىر مۇرجا تازالايتىن نەبىر جاقسى اپپاراتتار بار عوي, سودان بەرى جۇمىسىمىز جەڭىلدەدى. العاشىندا ونى يگەرە الماي قورقاقتايسىڭ, كەيىن ۇيرەنىپ كەتەسىڭ, – دەيدى ول.
پەشتى وزدىگىنەن تازالاي المايتىن, وعان ەرىنەتىن ادامدار كوپ. جەكە ۇيلەردە تۇراتىن مۇقتاج جاندار بولادى, ولارعا دا كومەك كەرەك. پەشتىڭ مۇرجاسىن وزدىگىنەن تازالاۋعا كوبىنىڭ شاماسى كەلە بەرمەيدى. وسىندايدا مۇرجا تازالاۋشىلارعا دەگەن سۇرانىس ارتادى. جىلىتۋ مەرزىمىنە مۇقيات دايارلانباسا بولمايدى. وسىنى ەسكەرگەن قالالىق توتەنشە جاعدايلار قىزمەتىنىڭ ماماندارى ءۇي-ءۇيدى ارالاپ, ءورتتىڭ جانە ۋلانۋ جاعدايلارىنىڭ الدىن الۋعا تىرىسادى. جىلىتۋ ماۋسىمى قارساڭىندا الەۋمەتتىك از قامتىلعان وتباسىلاردىڭ پەشىن كورىپ, ءورت دابىلىن دا تەگىن ورناتىپ بەرەدى.
ليۋدميلا ستريجاك, قالا تۇرعىنى:
– پەشتىڭ سيقى مىناۋ. ءبىز كوشىپ كەلگەندە وسىنداي كۇيدە بولدى. جازدىگۇنى وعان وت جاعىپ, ءۇيدى جىلىتىپ كورمەدىك. قورىقتىق. ەندى ارنايى ماماندار كەلىپ, ونى جوندەپ بەردى. ءۇش بالام بار. سولاردىڭ قاۋىپسىزدىگىنە بۇدان بىلاي الاڭدامايتىن بولدىم, – دەپ مۇڭىن شاقتى ول.
جىل باستالعالى ەلوردادا 300-دەن استام ءورت وقيعاسى تىركەلدى. ونىڭ تەڭ جارتىسى تۇرعىن ۇيلەردە بولعان. 12 ادام ءتىلسىز جاۋ­دىڭ قۇربانىنا اينالدى.
باۋىرجان سىزدىقوۆ, قالالىق توتەنشە جاعدايلار دەپارتامەنتىنىڭ باسشىسى:
– بىلتىر 12 ادام ورتتەن قايتىس بولدى. سولاردىڭ 5-ەۋى وزدەرى ىشكىلىك ءىشىپ, قايعىلى جاعدايعا دۋشار بولىپ وتىر. كوپ جاعدايدا جىلىتۋ پەشتەرىن دۇرىس قولدانباۋدان, ماساڭ ادامداردىڭ قاۋىپسىزدىكتى ساقتاماۋىنان, ەلەكتر سىمدارىنىڭ دۇرىس جالعانباۋىنان ءورت شىعادى. ءورتتىڭ سەبەپتەرى جەتەرلىك, مەن سولاردىڭ ەڭ ءجيى كەزدەسەتىن تۇرلەرىن ايتىپ وتىرمىن, – دەدى مامان.
بىلتىرعى جىلعى رەيدتەردىڭ قورىتىندىسى بويىنشا ءورت قاۋىپسىزدىگى ەرەجەسىن بۇزۋدىڭ 18 مىڭ دەرەگى تىركەلگەن. ماماندار كوبىنە جەكە سەكتوردا تالاپ ورىندالا بەرمەيتىنىن ايتادى. سوندىقتان تۇرعىنداردىڭ ءورتتىڭ الدىن الۋ شارالارىنا بەي-جاي قاراماۋىن ەسكەرتەدى.