ە.راحماديەۆ اتىنداعى مەملەكەتتىك اكادەميالىق فيلارمونيانىڭ «حالىق ءانى» ءبولىمى اقان سەرىنىڭ 180 جىلدىعىنا ارنالعان «دالا ءداستۇرى» توپتاماسىنان «مايدا قوڭىر» كونتسەرتىن ۇسىندى.
ءحىح عاسىردى زەرتتەۋشىلەر قازاق ونەرىنىڭ التىن عاسىرىنا بالايدى. قازاقتىڭ مۋزىكا ونەرىنىڭ قالىپتاسۋىنا ۇلكەن ۇلەس قوسقان اقىن, حالىق كومپوزيتورى اقان سەرى قورامساۇلى – سول زاماننىڭ پەرزەنتى. ونىڭ ءار ءانى – تاعدىرلى تۋىندىلار. كەش تە اندەرى تاريحىنىڭ ايتىلۋىمەن ءوربىپ وتىردى. اقان – يت جۇگىرتىپ, قۇس سالعان, جۇيرىك باپتاعان, سال-سەرىلىكتىڭ ۇلگىسىندەي بولعان تۇلعا. وسى تۇرعىدان كونتسەرت بارىسىندا ساحناعا جەتى قازىنامىزعا جاتاتىن بۇركىت پەن تازى ءيتتى الىپ شىعۋ جاراسىمدى بولدى.
اقاننىڭ «مايدا قوڭىر» ءانى باياناۋىلداعى شورمان ءبيدىڭ نەمەرەسى ءامىر-تەمىر مەن ونىڭ جارى بادىعۇل-جامالعا ارنالعان. كونتسەرت حالىقارالىق جانە رەسپۋبليكالىق بايقاۋلاردىڭ لاۋرەاتى جاقسىگەلدى ماياساروۆتىڭ ورىنداۋىندا وسى انمەن اشىلدى. ءارى قاراي «اقتوقتىنىڭ اۋجارى», «التىباسار», «سىرىمبەت», «ماقپال», «بالقاديشا», «قۇلاگەر», «شىرماۋىق», «اۋدەم جەر», «ءلايلىم شىراق» سىندى كوپتەگەن ءان شىرقالدى.
قازاقستاننىڭ ەڭبەك سىڭىرگەن قايراتكەرلەرى ايگۇل قوسانوۆا, گۇلميرا سارينا, مادەنيەت قايراتكەرى سەكەن سىزدىق, مادەنيەت سالاسىنىڭ ۇزدىكتەرى نۇراي تاناباەۆ, تەلمان نۇركەنوۆ, ارافات ىسقاقوۆ, بەرىك وماروۆ, حالىقارالىق جانە رەسپۋبليكالىق بايقاۋلاردىڭ لاۋرەاتتارى جاقسىكەلدى ماياساروۆ, ساۋلەجان تاعزيا, ايگەرىم نارتۇيە, وزگەرىس شەرىكباي, جاندوس يمانباي, زينات قاسىموۆا, الۋا قالىمبەكوۆا, «سارىارقا» فولكلورلىق ءانسامبلى ونەر كورسەتتى.
اقان سەرىنىڭ ومىرىنەن مۋزىكالىق جانە ادەبي شىعارمالار جازىلدى, تەاتردا سپەكتاكلدەر قويىلىپ, كينو ءتۇسىرىلدى. اتاپ ايتقاندا, عابيت مۇسىرەپوۆتىڭ ليبرەتتوسىنا كومپوزيتور سىدىق مۇحامەدجانوۆ «اقان سەرى–اقتوقتى» وپەراسىن جازىپ, كلاسسيك جازۋشىنىڭ پەساسى نەگىزىندە وسى اتاۋمەن قويىلىمدار قويىلدى. ارىندى اقىن ءىلياس جانسۇگىروۆ «قۇلاگەر» پوەماسىن, كورنەكتى قالامگەر ساكەن ءجۇنىسوۆ «اقان سەرى» رومانىن جازدى. كينورەجيسسەر بولات مانسۇروۆ «قۇلاگەر» ءفيلمىن ءتۇسىردى. ال كومپوزيتورلىق قىرىمەن دە تانىمال كورنەكتى اقىن كاكىمبەك سالىقوۆتىڭ «اقان سەرى» اتتى ءانى بار. مادەنيەت سالاسىنىڭ ۇزدىگى دانيار مۇقان شىرقاعان وسى ءان كونتسەرتتىڭ جاڭالىعى بولدى.
