قارا شاڭىراق م. اۋەزوۆ اتىنداعى قازاق مەملەكەتتىك اكادەميالىق دراما تەاترى بيىلعى 91 ماۋسىمىن ءمادينا وماروۆانىڭ «اقتاستاعى احيكو» سپەكتاكلى پرەمەراسىمەن اشقان بولاتىن. رەجيسسەر اسحات ماەميروۆ ساحنالاعان بۇل قويىلىم مەن اتالمىش تەاتر رەپەرتۋارىنداعى وزگە دە تۋىندىلاردى استانالىقتار دا تاماشالاي الادى. 28-30 قاراشا كۇندەرى ەل تاۋەلسىزدىگىنىڭ 25 جىلدىعى اياسىندا «اكەمتەاتردىڭ» ەلورداداعى گاسترولدەرى وتەدى.
گاسترولدىك تۋردى 28 قاراشا كۇنى جاستار تەاترىنىڭ ساحناسىندا قويىلاتىن د. يسابەكوۆتىڭ «ءجۇز جىلدىق ماحاببات» دراماسى (رەجيسسەرى ا. كاكىشەۆا) اشادى. شىعارما وتكەن عاسىردىڭ وتىزىنشى جىلدارداعى قۋعىن-سۇرگىن قۇربانىنا اينالعان اقىن ماعجان جۇماباەۆتىڭ اۋىر تاعدىرىنان, جارى زىليحا ەكەۋىنىڭ اراسىنداعى ماحاببات حيكاياسى تۋرالى سىر شەرتەدى.
30 قاراشادا استانالىقتاردىڭ نازارىنا ا. ءۆولوديننىڭ «قوشتاسقىم كەلمەيدى» دراماسى شىعارىلادى. سپەكتاكلدە سەگىز وتباسىنىڭ تاعدىرى جونىندە باياندالادى. ءار كەيىپكەردىڭ ءبىتىم-بولمىسىن اشاتىن وقيعالار جەلىسى وتە تارتىستى ءوربيدى.
ال 29 قاراشادا بەيبىتشىلىك جانە كەلىسىم سارايىندا «اقتاستاعى احيكو» سپەكتاكلى كورسەتىلەدى. شىعارمانىڭ باس كەيىپكەرى – تاعدىردىڭ جازۋىمەن قازاقستانعا كەلىپ, وسىندا قالىپ قويعان جاپون ازاماتى احيكو تەتسۋرا.
م. اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ ديرەكتورى ەرلان ءبىلال بۇل كىسى تۋرالى قر پارلامەنتى ءماجىلىسىنىڭ دەپۋتاتى نۇرلان دۋلاتبەكوۆتەن ەستيدى. ونىڭ حيكاياسىن جازۋشى ءمادينا وماروۆاعا ايتىپ, قالامگەر 15 جاسىندا جازىقسىز جازالانىپ, ءجاسوسپىرىم شاعىن كارلاگتا وتكىزگەن, قاراعاندى وبلىسىنىڭ اقتاس كەنتىندە تۇرىپ جاتقان جاپوندىقپەن كەزدەسەدى. سودان احيكونىڭ باستان كەشكەن ءومىرىن ءوز اۋىزىنان ەستىپ, ونى دراماعا اينالدىرادى. باس كەيىپكەردىڭ تاعدىرى الاش قايراتكەرلەرىنىڭ ومىرىمەن پاراللەل ءوربىپ وتىرادى. كورەرمەندەر وندا ۇرپاق بولاشاعىن ويلاپ, ارقا جەرىندە ەۋروپالىق ۇلگىدەگى قازاق-ورىس مەكتەبىن سالدىرعان اقايدىڭ قاسەنىنىڭ, ساكەن سەيفۋلليننىڭ اكەسى سەيفوللانىڭ بەينەلەرىمەن قاۋىشادى.
سپەكتاكلدە احيكونىڭ ءرولىن بەلگىلى اكتەر دۋلىعا اقمولدا سومدايدى. بۇعان قوسا درامادا بولات ءابدىلمانوۆ, بەكجان تۇرىس, داناگۇل تەمىرسۇلتانوۆا, ازامات ساتىبالدى, استانادان الماتىعا جاقىندا اۋىسقان قۋاندىق قىستىقباەۆ سىندى تانىمال ارتىستەر وينايدى.
امانعالي قالجانوۆ
