كەشە استانا قالاسى تىلدەردى دامىتۋ باسقارماسىنىڭ ۇيىمداستىرۋىمەن «تىلەپ» قوبىز سارايىندا قازاقستان رەسپۋبليكاسى تاۋەلسىزدىگىنىڭ 25 جىلدىعىنا ارنالعان «ماڭگىلىك ەل – مۇراتىم» جاس اقىندار ءمۇشايراسى مەن «ازاتتىق ءۇنى» جىر-تەرمەشىلەر بايقاۋى ءوتتى.
– بيىل ەلىمىزدىڭ ەگەمەندىك العانىنا 25 جىل تولىپ وتىر. بۇل – بارىمىزگە ورتاق مەرەكە. تاۋەلسىزدىك تويىن جاس اقىندارىمىز, جىرشىلارىمىز, تەرمەشىلەرىمىز ءوز ونەرىمەن اسقاقتاتىپ, ەلدىگىمىزدى پاش ەتەدى, – دەدى شارانى اشقان قالالىق تىلدەردى دامىتۋ باسقارماسىنىڭ باسشىسى تىلەۋعالي قىشقاشباەۆ.
ءمۇشايرا جانە بايقاۋعا شارت بويىنشا 16-30 جاس ارالىعىنداعى ۇمىتكەرلەر قاتىسۋعا ءوتىنىش بەردى. ناتيجەسىندە 13 اقىن ىرىكتەۋدەن ءوتىپ, قورىتىندى كەزەڭگە جولداما الدى. ساحناعا شىققان ولاردىڭ ارقايسىسى تاۋەلسىزدىك تۋرالى جانە ەركىن تاقىرىپتاعى ولەڭدەرىن وقىدى. اقىنداردى س. سەيفۋللين مۇراجايىنىڭ عىلىمي قىزمەتكەرى, ادەبيەتتانۋشى عالىم ءىلياس رىسبەكۇلى, ابايتانۋ» عىلىمي-تانىمدىق ورتالىعىنىڭ ديرەكتورى الماحان مۇحامەتقاليقىزى, «شابىت» حالىقارالىق جاستار فەستيۆالىنىڭ لاۋرەاتى اسىلزات ارىستانبەك, «دارىن» مەملەكەتتىك جاستار سىيلىعىنىڭ لاۋرەاتى قالقامان سارين باعالادى. قورىتىندىسىندا اقىنداردان جۇلدىزاي ىسقاق ءبىرىنشى ورىندى يەلەندى. سۇلۋجان تاۋبالدى مەن ءبىزدىڭ شامالاۋىمىزشا وسى ءمۇشايرانىڭ ەڭ جاس قاتىسۋشىسى بولعان الكەي مارعۇلان اتىنداعى № 40 ورتا مەكتەپتىڭ 11 سىنىپ وقۋشىسى ەلدوس انكەي ەكىنشى ورىننان كورىندى. ءۇشىنشى ورىن تىلەك توبىقباەۆ پەن بەكمۇرات ومىربەككە بەرىلدى.
جىر-تەرمە سايىسىنا قاتىسۋشىلارعا قر مادەنيەت قايراتكەرى, قازاق ۇلتتىق ونەر ۋنيۆەرسيتەتى جانىنداعى قورقىت اتا اتىنداعى عىلىمي-زەرتتەۋ ينستيتۋتىنىڭ قازاق اقىندارى, جىراۋ, شەشەندىك ونەر زەرتحاناسىنىڭ جەتەكشىسى, پروفەسسور اماندىق كومەكۇلى, قازاقستاننىڭ ەڭبەك سىڭىرگەن قايراتكەرى, بەلگىلى ءانشى كلارا تولەنباەۆا قازىلىق ەتتى. بۇل بايقاۋدا نۇربەك سانسىزباەۆ باس جۇلدە الدى. ەكىنشى ورىن فەرۋزا وڭتالاپقا, ءۇشىنشى ورىن راحات بەگاسىلوۆقا بۇيىردى. سايىس قورىتىندىسىندا جەڭىمپازدارعا ارنايى جۇلدەلەر مەن ديپلومدار تاپسىرىلدى. بۇعان قوسا ىنتالاندىرۋ سىيلىقتارى تابىستالدى.
امانعالي قالجانوۆ
