بىلتىر جىل باسىنان باستاپ نۇر-سۇلتان قالاسىندا نۇرجول جەلەكجولى بويىندا 24 اقىلى كولىك قويۋ الاڭدارى اشىلىپ, ولاردا ارنايى سەرتيفيكاتتالعان قۇرىلعىلار – پاركوماتتارمەن, جول بەلگىلەرىمەن, اقپاراتتىق قالقانشالارمەن جابدىقتالعان 487 ورىن پايدالانۋعا بەرىلدى. ال 2019 جىلدىڭ سوڭىنا دەيىن اقىلى ورىنداردىڭ سانى 10 مىڭعا جەتكىزىلۋى ءتيىس. الداعى كۇندەرى اقىلى كولىك تۇراقتارى ەسىل, سارىارقا جانە الماتى اۋداندارى اۋماقتارىندا پايدا بولماق. بىلتىر جىل باسىنان باستاپ نۇر-سۇلتان قالاسىندا نۇرجول جەلەكجولى بويىندا 24 اقىلى كولىك قويۋ الاڭدارى اشىلىپ, ولاردا ارنايى سەرتيفيكاتتالعان قۇرىلعىلار – پاركوماتتارمەن, جول بەلگىلەرىمەن, اقپاراتتىق قالقانشالارمەن جابدىقتالعان 487 ورىن پايدالانۋعا بەرىلدى. ال 2019 جىلدىڭ سوڭىنا دەيىن اقىلى ورىنداردىڭ سانى 10 مىڭعا جەتكىزىلۋى ءتيىس. الداعى كۇندەرى اقىلى كولىك تۇراقتارى ەسىل, سارىارقا جانە الماتى اۋداندارى اۋماقتارىندا پايدا بولماق.
بۇل – ەلوردانىڭ كولىك كەڭىستىگىن باسقارۋعا اۆتوماتتاندىرۋ جۇيەسى ەنگىزىلگەن العاشقى جوبا. ول استانانىڭ ينفراقۇرىلىمىن دامىتۋعا ارنالعان ماڭىزدى كەزەڭدەردىڭ ءبىرى بولىپ سانالادى. جۇرگىزۋشىلەردىڭ كوپشىلىگى كولىك قۇرالدارىن اقىلى كوممۋنالدىق تۇراقتارعا قويعاندا وعان تولەم تولەگىسى كەلمەيدى نەمەسە تىيىم سالىنعان ورىندارعا تاستاپ كەتەدى.
– اتالعان جوبا ارقىلى ءبىز اقىلى تۇراق نارىعىن قالىپتاستىرامىز. بۇل شارا مەملەكەتتىك-جەكەمەنشىك كاسىپورىن نەگىزىندە قۇرىلعانىمەن, وعان مەملەكەت قارجىسى قۇيىلمادى, ول تولىقتاي ينۆەستيتسيالىق قاراجات ارقىلى جۇزەگە اسىرىلادى. ياعني بيۋدجەتكە ەشقانداي سالماق تۇسپەيدى. كولىك تۇراعىنىڭ جۇمىسىنا جەكە ينۆەستور جاۋاپتى, – دەدى «استانانىڭ كولىك تۇراعى كەڭىستىگى» جشس ديرەكتورى شىڭعىس دوسىباەۆ.
مامانداردىڭ ايتۋىنشا, جۇزەگە اسىرىلىپ جاتقان شارا كولىك ماگيسترالىن بەيبەرەكەت اۆتوتۇراقتاردان بوساتادى, كوشە كەپتەلىستەرىن ازايتادى, سونداي-اق اقىلى تۇراققا جۇرگىزۋشىلەردىڭ كوپتەپ ورنالاسۋىنا مۇمكىندىك بەرەدى. ماسەلەن, «استانا» تەمىرجول ۆوكزالى جانىنان اقىلى تۇراق اشىلعالى ودان وتەتىن كولىك سانى ەسەلەپ ارتتى جانە كەپتەلىس اناعۇرلىم سەيىلىپ قالدى.
ارينە, قارجى قۇيىلعان كەز كەلگەن ءىستىڭ قايتارىمى, ەكونوميكالىق ناتيجەسى بولۋى ءتيىس, بىراق اتالعان جوبادا ول ەڭ ماڭىزدى ماسەلە ەمەس. اتقارۋشى بيلىك ءبىرىنشى كەزەكتە كولىك قوياتىن ورىنداردىڭ اينالىمىن, جەكە اۆتوقۇرالدار تاسقىنىنىڭ ازايۋىن, جۇرتتىڭ قوعامدىق كولىكتى پايدالانۋ قىزىعۋشىلىعىن كۇشەيتۋگە كوڭىل بولەدى.
تولەماقى سەرتيفيكاتتالعان ۇتقىر فوتوفيكساتسيا كەشەنى بويىنشا ەسەپكە الىنادى. جۇيە ءاۆتوموبيلدىڭ ءنومىرىن جازىپ الادى دا, ول توقتاعان كۇندى, ۋاقىتتى جانە ورىندى كورسەتىپ, بۇل اقپاراتتى سىمسىز بايلانىس جەلىسى ارقىلى دەرەكتەردى وڭدەۋ ورتالىعىنا جولدايدى. تولەم جونىندەگى دەرەكتەر دە, جەڭىلدىگى بار اۆتوموبيلدەر تۋرالى دەرەكتەر دە وسى ورتالىقتىڭ قورىندا ساقتالادى.
– ءسويتىپ بارلىق قاجەتتى اقپاراتتار ءبىزدىڭ دەرەكتەردى وڭدەۋ ورتالىعىندا شوعىرلاندىرىلادى. ءار ءتۇنى 00.00 ساعاتتان كەيىن جۇيە اۆتوماتتى تۇردە فاكتىلەردى جەڭىلدىكتەر قورىمەن جانە تولەم دەرەكتەرىمەن سالىستىرادى. جەڭىلدىكتەر قورىندا جوق جانە تولەم تولەنبەگەن كولىكتەر تۋرالى اقپارات شيفرلانعان ارنا ارقىلى نۇر-سۇلتان قالاسى ءىىد پروتسەسسينگ ورتالىعىنا جىبەرىلەدى, – دەدى «استانانىڭ كولىك تۇراعى كەڭىستىگى» جشس باسشىسى.
«جۇرگىزۋشىلەر اقىلى تۇراقتاردىڭ تولەمىن بىرنەشە ءتاسىل ارقىلى تولەي الادى: قولما-قول اقشامەن, SMS, جەكە كابينەت, «كاسسا 24» تەرمينالدارى نەمەسە ارنايى ۇيالى قوسىمشالار ارقىلى جانە پاركومات ارقىلى بانك كارتوچكاسىنان تولەۋگە بولادى» دەيدى «نۇر-سۇلتان قالاسىنىڭ كولىك جانە جول-كولىك ينفراقۇرىلىمىن دامىتۋ» مم جول قوزعالىسى قاۋىپسىزدىگى جانە كولىك ينفراقۇرىلىمى ءبولىمىنىڭ باسشىسى رۋسلان ابدۋاليەۆ.
«استانانىڭ كولىك تۇراعى كەڭىستىگى» جشس ءباسپاسوز قىزمەتىنىڭ مالىمدەۋىنشە, اقىلى كولىك قويۋ ورىندارىنىڭ باعاسى كۇز ايلارىندا قىمباتتايتىن ءتۇرى بار. قازىرگى كەزدە ونىڭ قۇنى – ساعاتىنا 100 تەڭگە. ال دەمالىس جانە مەرەكە كۇندەرى تەگىن. سونداي-اق شۇعىل قىزمەت كورسەتۋ كولىكتەرى, ۇلى وتان سوعىسىنىڭ ارداگەرلەرى, ءبىرىنشى جانە ەكىنشى توپ مۇگەدەكتەرى, «التىن قىران» جانە «حالىق قاھارمانى» وردەندەرىنىڭ يەگەرلەرى, «التىن القا» جانە «كۇمىس القامەن» ماراپاتتالعان كوپبالالى انالار, سەمەي يادرولىق پوليگونىنداعى جارىلىستاردان زارداپ شەككەندەر, اۋعانستانداعى جانە باسقا دا جاۋىنگەرلىك ءىس-شارالاردىڭ ارداگەرلەرى مەن مۇگەدەكتەرى اقىلى تۇراقتاردى تەگىن پايدالانا الادى.
ال اقىلى تولەمنەن جالتارعاندارعا ءبىرىنشى رەت 3 اەك (ايلىق ەسەپتىك كورسەتكىش – 7215 تەڭگە), زاڭ بۇزۋشىلىق قايتالانعاندا 5 اەك (12025 تەڭگە) ايىپ سالىنادى. ايىپپۇل تولىقتاي بيۋدجەتكە اۋدارىلادى. سونىمەن بىرگە, اقىلى اۆتوتۇراقتا دەر كەزىندە تولەمى تولەنبەگەن اۆتوموبيل ەۆاكۋاتسيالانۋى مۇمكىن.
ايتا كەتەيىك, نۇرسۇلتان نازارباەۆ حالىقارالىق اۋەجايىنىڭ كولىك قويۋ ورنى ازىرشە تەگىن. «استانا LRT» كومپانياسىنىڭ مالىمدەۋىنشە, اۋەجاي قۇرىلىمدارىن بىرىكتىرۋ جانە شىعىنداردى وڭتايلاندىرۋ ماقساتىندا اۆتوتۇراق كەڭىستىگى اۋەجايدىڭ بالانسىنا بەرىلگەن. اۋەجاي ءباسپاسوز قىزمەتىنىڭ اقپارىندا, قازىرگى كەزدە اۆتوتۇراقتا ىسكە قوسۋ-جوندەۋ, جابدىقتاردى جاڭارتۋ جۇمىستارى جۇرگىزىلىپ جاتقاندىقتان 850 كولىك ورىندارىنا كولىك قويۋ تەگىن. اتالعان جۇمىستار اياقتالعان سوڭ, ول ورىندار دا اقىلى بولماق.
سونداي-اق قاتتى ايازدى, بوراندى كۇندەرى ەلوردانى اۋەجاي مەن تەمىرجول اۋماعىنداعى اۆتوتۇراقتارعا كولىكتەر تەگىن كىرە الادى.
