ل. گۋميلەۆ اتىنداعى ەۋرازيا ۇلتتىق ۋنيۆەرسيتەتىندە اباي اتامىزدىڭ 175 جىلدىق مەرەيتويى اياسىندا ءبىلىم جانە عىلىم مينيسترلىگى عىلىم كوميتەتىنىڭ باستاماسى جانە ەۇۋ «اباي اكادەمياسى» عىلىمي-زەرتتەۋ ينستيتۋتىنىڭ ۇيىمداستىرۋىمەن «اباي مۇراسى» اتتى رەسپۋبليكالىق عىلىمي-تاجىريبەلىك كونفەرەنتسيا بولىپ ءوتتى.
ءىس-شارا نەگىزىنەن العاندا ۇلتتىق بىرەگەيلىك سالاسىنداعى ۇلى ويشىلدىڭ مۇراسىن, زياتكەرلىك ۇلت پەن جاڭارتىلعان قوعامدى قالىپتاستىرۋ نەگىزدەرىن, سونداي-اق «ماڭگىلىك ەل» يدەياسى شەڭبەرىندەگى «كەمەل ادام» تۇجىرىمداماسىن زەردەلەۋگە باعىتتالدى.
جيىندا العاش ءسوز العان ۋنيۆەرسيتەت رەكتورى ەرلان سىدىقوۆ كونفەرەنتسيانىڭ نەگىزگى يدەياسى, ماقساتى مەن مىندەتتەرىنە توقتالدى. ودان كەيىن ءبىلىم جانە عىلىم ءمينيسترى اسحات قاناتۇلىنىڭ كونفەرەنتسيا قاتىسۋشىلارىنا ارنالعان رەسمي قۇتتىقتاۋى وقىلىپ, قر پارلامەنتى سەناتىنىڭ دەپۋتاتى, قالامگەر نۇرتورە ءجۇسىپ, ش.ءۋاليحانوۆ اتىنداعى تاريح جانە ەتنولوگيا ينستيتۋتىنىڭ ديرەكتورى زيابەك قابىلدينوۆ, مەملەكەت تاريحى ينستيتۋتىنىڭ ديرەكتورى ەركىن ءابىل, بەلگىلى تۇركولوگ شاكىر يبراەۆ, ەۇۋ الەۋمەتتىك-مادەني دامۋ جونىندەگى پرورەكتورى, اكادەميك ديحان قامزابەكۇلى, تاعى باسقا عالىمدار اباي فەنومەنىنە, ويشىلدىڭ شىعارماشىلىعى مەن دۇنيەتانىمىنا قاتىستى بايانداما جاسادى.
كونفەرەنتسيا اياسىندا قر پرەزيدەنتى قاسىم-جومارت توقاەۆتىڭ «اباي جانە XXI عاسىرداعى قازاقستان» اتتى ەڭبەگىنىڭ تۇساۋكەسەرى ءوتتى. مودەراتور ەرلان سىدىقوۆ بۇگىنگى جيىنعا وراي پرەزيدەنتتىڭ باعدارلامالىق ماقالاسىن بۇۇ-نىڭ رەسمي 6 تىلىنە (اعىلشىن, اراب, يسپان, قىتاي, ورىس, فرانتسۋز) اۋدارىپ, باسپادان شىعارىپ وتىرعانىن سۇيىنشىلەي جەتكىزدى. سونداي-اق كونفەرەنتسيادا «اباي اكادەمياسى» سەرياسىمەن شىققان ءتورت كىتاپ: اكادەميك سەيىت قاسقاباسوۆتىڭ «ابايعا دەيىنگى جانە ابايدان كەيىنگى قازاق ادەبيەتى» ەڭبەگى, تۇركولوگ شاكىر يبراەۆتىڭ «اباي فەنومەنى» مونوگرافياسى, ابايتانۋشى تۇرسىن جۇرتبايدىڭ «ول بولامىن دەمەڭدەر» جانە زەرتتەۋشى سۇلتان ىبىرايدىڭ «جارىم ادامنان – تولىق ادامعا» مونوگرافياسى تانىستىرىلدى.
