ساكەن سەيفۋللين اتىنداعى قازاق اگروتەحنيكالىق زەرتتەۋ ۋنيۆەرسيتەتىنىڭ «اقجەلكەن» ستۋدەنتتەر تەاترى «جاستار تەاترى» عيماراتىندا س.سەيفۋلليننىڭ 130 جىلدىعى اياسىندا اقىن عازيز ەشتاناەۆتىڭ «اقىن مەن اجال» درامالىق قويىلىمىن ساحنالادى. قويىلىمدى تاماشالاعان مەملەكەت جانە قوعام قايراتكەرلەرى, ونەر مايتالماندارى, ۋنيۆەرسيتەت ۇستازدارى, ستۋدەنتتەر جانە قالا تۇرعىندارى كاسىبي اكتەرلەردىڭ دەڭگەيىندەگى شىعارمانى ويناعان ستۋدەنتتەردىڭ ونەرىنە زور قوشەمەتپەن قول سوقتى.
سپەكتاكلدە ساكەن سەيفۋلليننىڭ جازىقسىز تۇتقىندالىپ, اباقتىدا جاتقان ازاپتى كۇندەرى, قازاق حالقىنىڭ, ۇلت زيالىلارىنىڭ باسىنا تۇسكەن قايعى-قاسىرەت پەن اشارشىلىق جىلدارى سۋرەتتەلەدى. قويىلىم رەجيسسەرلەرى نۇرفات ۆاحيتوۆ پەن دۋمان ۋماروۆتىڭ ەرەك ەڭبەگىن اتاپ وتكەن ءجون. ساكەننىڭ بەينەسىن سومداعان ەكونوميكا فاكۋلتەتىنىڭ 4-كۋرس ستۋدەنتى جانگەلدى ماراتوۆ كورەرمەن ىقىلاسىنا بولەندى. سونىمەن قاتار بالدىرعان امانجولقىزى, اياۋلىم وتەپبەرگەن, ەلامان سادۋاقاسوۆ, نازىم قۋانتاەۆا, ايسۇلۋ سىيلاعانوۆا, ءمولدىر قۋانىشباي, اقجارقىن سەرىكبول, سىمبات سۇرالينا, سابينا جەكسەنباي, شىرايلىم جەڭىس, داميرا توعجانوۆا, مۇحامەديار ساقتاپباەۆ, نۇرجىگىت مەلدەن, بەرەكە جولتاي, ءادىل ماحامبەتوۆ, ايگەرىم قايپەن, ۇلان تۇرسىن, نازەركە قوجابەكوۆا, جاننا نۇرجان, ۇلبولسىن ورىنباسار, دىنمۇحاممەد يبراگيمۇلى, نۇرداۋلەت ايتمىرزا سەكىلدى ستۋدەنتتەر كورەرمەندى شەبەر ويىنىمەن ءتانتى ەتتى.
قويىلىم سوڭىنان ساحناعا شىققان س.سەيفۋللين اتىنداعى قازاق اگروتەحنيكالىق زەرتتەۋ ۋنيۆەرسيتەتىنىڭ باسقارما توراعاسى – رەكتور, قر ۇعا اكادەميگى قانات تىرەۋوۆ, مەملەكەت جانە قوعام قايراتكەرى قۋانىش سۇلتانوۆ, دراماتۋرگ, اكتەر, ءانشى, ساكەنتانۋشى عالىم قانات ءجۇنىسوۆ ستۋدەنتتەردىڭ ونەرىنە ريزاشىلىعىن جەتكىزىپ, جاس ونەرپازدارعا شىعارماشىلىق تابىس تىلەدى.
تالعات قانافين,
ۋنيۆەرسيتەتتىڭ مادەني-بۇقارالىق جۇمىستار جونىندەگى دەپارتامەنتىنىڭ اعا مەنەدجەرى
سۋرەت اۆتورى: دانيل اكراموۆ
