1 ناۋرىز – العىس ايتۋ كۇنى. مەرەيلى مەرەكەگە وراي ەلوردادا كوپتەگەن ءىس-شارالار ءوتىپ جاتىر. سولاردىڭ ءبىرى – استانا قالاسى قازاقستان حالقى اسسامبلەياسى مۇشەلەرىنىڭ «شاراپات» الەۋمەتتىك قىزمەت كورسەتۋ ورتالىعىندا وتكىزگەن قايىرىمدىلىق شاراسى. حالىقتىڭ الەۋمەتتىك تۇرعىدان ءالسىز توبىنا كوڭىل بولگەن شارا بارىسىندا قالا تۇرعىندارىنا مەرەكەلىك كونتسەرت ۇسىنىلىپ, ءتۇرلى تاعامداردان تۇراتىن داستارقان جايىلدى.
مەرەكەلىك ءىس-شارالاردىڭ اۋقىمى كەڭ. 1 ناۋرىزعا دەيىن «التىن جۇرەك» ءان چەللەندجى, «العىسىڭمەن جاقىندا» العىس ايتۋ ساباعى, «راحمەت ساعان, ەلوردام» اتتى وقۋشىلاردىڭ تىلەگى, «قازاقستان – مەيىرىم مەكەنى» تاقىرىپتىق ەكسپوزيتسيا, «العىس ساندىعى» ەلوردا تۇرعىندارىنا العىس ءبىلدىرۋ ءىس-شاراسى, «العىسقا بولەنۋ» ادام ءومىرىن قۇتقارعان باتىر بالالارعا العىس ايتۋ اكتسيالارى جوسپارلانىپ وتىر. قالا مەكتەپتەرىندە «العىس باتاسى» اتتى قارت ادامدارعا كومەكتەسۋ ءىس-شاراسى, سول سياقتى الەۋمەتتىك جەلىلەر ارقىلى «ارايلى اتامەكەنىم» چەللەندجى, «تاريح عيبراتى – ارحيۆ قۇجاتتارىندا» دەگەن تاقىرىپپەن فوتوقۇجات كورمەسى ۇيىمداستىرىلادى.
بۇل كۇنى ماحامبەت وتەمىسۇلى اتىنداعى وكۋشىلار سارايىندا «دوسىما مەنىڭ مىڭ العىس» مەرەكەلىك قۇتتىقتاۋ, «قازاق حالقىنا مىڭ العىس» ونلاين-كۆەستى, «انام مەن اكەمە العىس» سۋرەت جانە فوتو كورمەسى, «قازاقستان – مەيىرىمدىلىك مەكەنى», نەمىس ەتنولينگۆيستيكا ورتالىعىنىڭ قولدانبالى شىعارماشىلىق بويىنشا شەبەرلىك سىنىبى بولادى.
مادەنيەت مەكەمەلەرى بۇل كۇنى قويىلىمدارىن دايىنداپ وتىر. ماسەلەن, قۋىرشاق تەاترى ەرەكشە بالالارعا ارنالعان «ەلۆين جانە جۇمباق ورماننىڭ تۇرعىندارى» سپەكتاكلىن قويسا, «جاستار» تەاترىندا «دەمەۋ» ورتالىعىنىڭ مۇمكىندىگى شەكتەۋلى جانە زەينەتكەرلەرگە ارنالعان «جولى بولعىش جىگىت» قويىلىمى وتەدى. مەرەكەنىڭ قۇرمەتىنە جەدەل جاردەم ستانتسياسىنىڭ قىزمەتكەرلەرىنە, سونداي-اق كوممۋنالدىق قىزمەت ماماندارىنا العىس ءبىلدىرىپ, ىستىق شاي مەن باۋىرساق, ىستىق تاماق تاراتىلادى. دوستىق ۇيىندە قازاقستان حالقى اسسامبلەياسى مۇشەلەرىنىڭ قاتىسۋىمەن العىس ايتۋ كۇنىنە ارنالعان دوڭگەلەك ۇستەل وتىرىسى, سول سياقتى مۇقتاج بالالاردىڭ ەمىنە ارنالعان قايىرىمدىلىقتان جينالعان قاراجاتتى سالتاناتتى تۇردە تاپسىرۋ ءراسىمى وتەدى. 1 ناۋرىز كۇنى قازاقستان حالقى اسسامبلەياسى مۇشەلەرى «قازاق ەلىنە مىڭ العىس» مونۋمەنتىنە گۇل شوعىن قويادى.
