بيىل ەلىمىز تاۋەلسىزدىكتىڭ 25 جىلدىق مەرەيتويىن ابىرويمەن اتاپ ءوتتى. وسى ۋاقىت ارالىعىندا مەديتسينا سالاسى ايتارلىقتاي جەتىستىككە جەتتى. ارداگەرلەرگە شىنايى قامقورلىق جاساپ كەلە جاتقان وتان سوعىسى مۇگەدەكتەرىنىڭ ورتالىق كلينيكالىق گوسپيتالى دە جىل وتكەن سايىن قىزمەت اۋقىمىن كەڭەيتىپ كەلەدى. مۇندا ۇلى وتان سوعىسىنىڭ ارداگەرلەرى, اۋعان سوعىسىنا قاتىسۋشى جاۋىنگەر-ينتەرناتسيوناليستەر, چەرنوبىل اپاتىنىڭ زاردابىن جويۋشىلار جانە سەمەي يادرولىق سىناق پوليگونىنان زارداپ شەككەندەر ەم-شارا الادى.
ناقتى ايتسام, رەسپۋبليكالىق ارداگەرلەر گوسپيتالىندە 70 ورىندىق اۋرۋحانا جانە ارداگەرلەرگە 16 مەديتسينالىق ماماندىق ءتۇرى بويىنشا قىزمەت كورسەتىلەدى. نەگىزىنەن, تەراپەۆتىك ەمدەۋگە ارنالعان ستاتسيوناردا كارديولوگيالىق جانە جۇيكە اۋرۋلارىنىڭ مامانداندىرىلعان ەم-شارالارى جاسالادى. اتالمىش گوسپيتال استانا مەملەكەتتىك مەديتسينالىق ۋنيۆەرسيتەتىنىڭ كلينيكالىق بازاسى بولىپ سانالعاندىقتان, مۇندا تەراپيا سالاسىنىڭ بىلىكتى عالىمدارى ەمدەۋ ۇردىستەرىن جۇرگىزەدى.
ەم-دومى بولەك مەكەمە – ەلىمىزدەگى سوعىس جانە ەڭبەك ارداگەرلەرىنىڭ سەنىمىنەن شىعىپ, قۇرمەتىنە يە بولعان ساناۋلى مەديتسينالىق ورتالىقتاردىڭ ءبىرى. مۇندا جىلىنا 1700-دەن استام ارداگەر ستاتسيونارلىق ەم قابىلدايدى, دەنساۋلىقتارىن تۇزەيدى. كۇن سايىن گوسپيتالدىڭ بىلىكتى ماماندارى 65-70 ناۋقاسقا تۇراقتى ەمدەۋ شارالارىن جۇرگىزەدى. سوڭعى كەزدە ءداستۇرلى حالىقتىق ەمدەۋ تاسىلدەرى دە كەڭىنەن قولدانىلىپ كەلەدى. اتاپ ايتقاندا, ينەمەن ەمدەۋ, سۇلىك سالۋ جانە اراعا شاقتىرۋ سياقتى ءداستۇرلى حالىقتىق ەمدەۋ تاسىلدەرى سىرقاتتار اراسىندا ۇلكەن سۇرانىسقا يە. كۇندىز-ءتۇنى تىنىمسىز قىزمەت اتقاراتىن ەمحانادا ناۋقاستارعا ارنالعان كىتاپحانا, جاتتىعۋ زالى, اسحانا بار. جاعدايى مۇشكىل, ءجۇرىپ-تۇرۋى قيىن قارتتارعا اس-سۋىن بولمەلەرىنە اكەلىپ بەرەدى.
ءبىزدىڭ قىزمەتكەرلەر مادەني شارالاردىڭ دا بەل ورتاسىنان تابىلادى. وسىدان بىرنەشە جىل بۇرىن ورتالىق كلينيكالىق گوسپيتال بازاسىندا سۋرەتشىلەردىڭ حالىقارالىق بايقاۋىن وتكىزۋ باستاماسى ومىرگە كەلدى. سودان بەرى حالىقارالىق وسى ءبىر اۋقىمدى شارانى ءتورت رەت وتكىزدىك. ماسەلەن, «ەكسپو-2017» كورمەسىنىڭ قۇرمەتىنە ورايلاستىرا ۇيىمداستىرىلعان «جەڭىستىڭ قايراتى – بولاشاقتىڭ قۋاتى» اتتى سۋرەتشىلەردىڭ III حالىقارالىق بايقاۋىنا 14 مەملەكەتتىڭ قىلقالام شەبەرلەرى قاتىستى. وعان رەسەي, ۋكراينا, قىتاي, موڭعوليا, وزبەكستان, قىرعىزستان سەكىلدى ەلدەردەن ءوتىنىم كوپ ءتۇستى. ولار ءوز تۋىندىلارىندا اسكەري-پاتريوتتىق, ۇرپاقتار ساباقتاستىعى جانە «ەكسپو-2017» كورمەسى شەڭبەرىندە قازاقستاننىڭ قازىرگى جەتىستىكتەرىن پاش ەتتى. ۇلتتىق سۋرەت گالەرەياسىندا وتكەن سالتاناتتى شاراعا شەتەل مەملەكەتتەرىنىڭ قازاقستانداعى ەلشىلىكتەرى قىزمەتكەرلەرى, پارلامەنت دەپۋتاتتارى, قوعامدىق ۇيىم وكىلدەرى قاتىستى. ال كونستيتۋتسيا كۇنى قارساڭىندا گوسپيتالدە قازاق حالقىنىڭ داڭقتى باتىرى – راقىمجان قوشقارباەۆتىڭ تۋعانىنا 90 جىل تولۋىنا ارنالعان عىلىمي-پراكتيكالىق كونفەرەنتسيا وتكىزىلدى. جوعارى دەڭگەيدە ۇيىمداستىرىلعان شاراعا رەسەيدىڭ قازاقستانداعى توتەنشە جانە وكىلەتتى ەلشىسى م.بوچارنيكوۆ, پارلامەنت ءماجىلىسىنىڭ دەپۋتاتى ن.پەتۋحوۆا جانە ءبىر توپ عالىمدار قاتىستى.
سونىمەن قاتار, مەكەمە قىزمەتكەرلەرى ەرىكتى تۇردە قان تاپسىرۋدى دا داستۇرگە اينالدىرعان. ەلوردامىزدا دونور قانىنا زارۋلىك وتە جوعارى ەكەنى بەلگىلى. قان قۇيۋ ارقىلى عانا ادام ءومىرىن ساقتاپ قالۋعا بولاتىن اۋرۋ تۇرلەرىنە گەموفيليا, قان ازدىق, باۋىر, قاتەرلى ىسىك, كۇيىك شالۋ جاتادى. اسىرەسە, دونور قانى بوسانعان انا ءومىرىن ساقتاپ قالۋدا وتە ماڭىزدى. سوندىقتان قان تاپسىرۋ اكتسياسىنا ۇجىم بولىپ ءبىر كىسىدەي اتسالىسىپ كەلەدى. شۇكىر, ەڭبەگىمىز ەسكەرىلىپ كەلەدى. ارداگەرلەرگە دەگەن شىنايى قامقورلىقتىڭ ناتيجەسىندە گوسپيتال ۇجىمى 2009 جىلى ەلىمىزدەگى ەڭ ۇزدىك مەديتسينا مەكەمەلەرىنىڭ قۇرامىنا كىردى. 2011 جىلى گوسپيتال استانا قالاسى دەنساۋلىق ساقتاۋ مەكەمەلەرى اراسىندا قازاقستان رەسپۋبليكاسى پرەزيدەنتىنىڭ «التىن ساپا» كونكۋرسىنىڭ جەڭىمپازى اتاندى. ال بيىل مەديتسينا مەكەمەلەرى اراسىندا وتكەن رەسپۋبليكالىق كونكۋرستا «ەڭ ۇزدىك قازاق ءتىلدى مەكەمە» اتاندى.
ءادىلحان ابدۋلين,
ۇلى وتان سوعىسى مۇگەدەكتەرىنە ارنالعان ورتالىق كلينيكالىق گوسپيتالى
