«اپات ايتىپ كەلمەيدى» دەگەن راس ەكەن. اي-كۇننىڭ امانىندا تۇركىستان ءوڭىرىنىڭ ارىس قالاسىنداعى الاپات اپات ءدۇيىم ەلدى دۇرلىكتىردى. ءۇش ادامنىڭ قازاسى بار قازاقتىڭ قابىرعاسىن قايىستىردى. وقيعا ورنىنا قاسىم-جومارت توقاەۆتىڭ شۇعىل بارعانىن گازەتتىڭ وتكەن نومىرىندە جازعانبىز. ەل امان, جۇرت تىنىشتا ءۇيىن تاستاپ, بوسقان ەلگە كۇللى قازاقستاندىقتار قول ۇشىن سوزۋدا. قالاعا قانشا زيان كەلگەنى ازىرشە بەلگىسىز.
جارىلىستاردىڭ بىرنەشە كۇنگە سوزىلۋى ونىڭ زارداپتارىنىڭ دا كوپ بولاتىنىن كورسەتۋدە. وبلىستىق اكىمدىكتىڭ ءباسپاسوز قىزمەتى حابارلاعانداي, جارىلىستاردىڭ سالدارىنان ارىستاعى 7600 ءۇيدىڭ تەرەزەسى سىنىپ, 80-85 پايىزىنىڭ شاتىرى قيراعان.
ارىسقا بۇكىل قازاقستان كومەكتەسەدى
ەل پرەزيدەنتى قاسىم-جومارت توقاەۆ ارىس قالاسىنا بارىپ, اپاتتىڭ اۋقىمىن ءوز كوزىمەن كوردى. توتەنشە جاعداي بولعان ايماقتان تۇرعىنداردى كوشىرۋ جۇمىسىمەن تانىستى. قاۋىپسىز جەرگە كوشىرىلگەن حالىقتى ىستىق تاماقپەن, دارىگەرلىك كومەكپەن قامتاماسىز ەتۋدى, بارلىق قاجەتتى كومەكتى كورسەتۋدى تاپسىردى. پرەزيدەنت پوليتسەيلەرگە, اسىرەسە بالالارعا, ەرەكشە كوڭىل ءبولۋدى قاداپ ايتتى.
قالانى ارالاپ شىعۋ بارىسىندا قاسىم-جومارت توقاەۆ وق-ءدارى قويماسىنداعى جارىلىس سالدارىنان قاتتى قيراعان تۇرعىن ۇيلەر مەن اكىمشىلىك نىساندارىن ارالاپ كوردى.
قازاقستان پرەزيدەنتىنە ەۆاكۋاتسيا جۇمىستارىنىڭ بارىسى جانە جارىلىس وشاقتارىن توقتاتىپ, ءورتتى ءسوندىرۋ جونىندە مالىمەت بەرىلدى. مەملەكەت باسشىسى ىشكى ىستەر ورگاندارىنىڭ, قورعانىس مينيسترلىگىنىڭ, جەرگىلىكتى اتقارۋ ورگاندارىنىڭ قىزمەتكەرلەرىنە ريزاشىلىق ءبىلدىردى. قاسىم-جومارت توقاەۆ ءبىر كۇننىڭ ىشىندە وتە اۋقىمدى جۇمىس اتقارىلعانىن ايتتى جانە جۇمىستاردىڭ وسى قارقىنىن باسەڭدەتپەي, جالعاستىرا بەرۋدى تاپسىردى.
پرەزيدەنت كەشكىلىك شىمكەنتتەگى كلينيكالىق اۋرۋحاناعا دا باردى. سوڭعى مالىمەت بويىنشا جارىلىس سالدارىنان جاراقات العان ادامداردىڭ سانى 165-كە جەتتى. سونىڭ ىشىندە 89-ى دەرەۋ اۋرۋحاناعا جاتقىزىلدى. 26 ماۋسىمداعى اقپارات بويىنشا اۋرۋحانادا ەم-دوم الىپ جاتقان ادامداردىڭ سانى 45-كە كەمىدى. اپات ءۇش ادامنىڭ ءومىرىن قيدى. ونىڭ ەكەۋى – اسكەري ادام, بىرەۋى – جەرگىلىكتى تۇرعىن. سوڭعىسى كولىگىنە قۇلاعان قارۋدان كوز جۇمعان.
اپاتتىڭ اۋقىمىن بولجاۋ ازىرگە مۇمكىن ەمەس
وق-ءدارى قويماسىنداعى جارىلىستار بىرنەشە كۇنگە سوزىلۋى مۇمكىن. سول سەبەپتەن ارىس تۇرعىندارىن باسقا جەرگە جەدەل كوشىرۋ جونىندە شەشىم قابىلداندى. دۇيسەنبى كۇنى كەشكە دەيىن قالادا ەشكىم قالمادى. اسكەري پاترۋل مەن پوليتسەيلەر جان ساۋعالاپ, ۋاقىتشا جەرتولەلەرگە تىعىلعانداردىڭ ءبارىن شىعاردى. كوشىرۋ جۇمىستارىنا 150 اۆتوكولىك جۇمىلدىرىلدى. يەسىز قالعان ۇيلەردى توناۋعا, قيراتۋعا جول بەرمەۋ ءۇشىن ىشكى ىستەردىڭ 345 قىزمەتكەرى قالانى كۇزەتۋگە كىرىستى. ودان بولەك, تاعى 800 اسكەريلەر قالادا جانە ونىڭ اينالاسىندا شوعىرلاندىرىلدى.
قورعانىس ءمينيسترى نۇرلان ەرمەكباەۆ جارىلىستاردىڭ العاشقى ءدۇمپۋى دالادا بولعانىن مالىمدەدى. ول اپات بولعان قويمادا اسا قاۋىپتى اۆياتسيالىق بومبالار مەن قارۋ-جاراقتار ساقتالماعانىن حابارلادى. «ول جەردە راديواكتيۆتىك قارۋلار بولعان جوق. سوندىقتان رادياتسيانىڭ قاۋپى جوق. نەگىزگى قاتتى دۇمپۋلەر دالادا بولعان. ارىس قالاسى جارتىلاي زارداپ شەكتى. مەن قالا تۇرعىندارىنا ۇيلەرىنە ورالماۋعا كەڭەس بەرەمىن. ويتكەنى كوشەدە ءالى جارىلماعان قارۋلار بولۋى مۇمكىن. ساپەرلەر توبى قالانى قارۋلاردان تازارتۋعا كىرىستى. وسى جۇمىستاردىڭ ءبارى بىتكەندە عانا ۇيلەرىڭىزگە قايتۋعا بولادى» دەپ ءتۇسىندىردى مينيستر. ول سونداي-اق ارسەنالدىڭ قاتاڭ كۇزەتىلەتىنىن, قاۋىپتى نىسانداعى ادامداردىڭ ومىرىنە ەشقانداي قاۋىپتىڭ جوقتىعىن ايتتى.
