ارىپتەسىمىز, «استانا اقشامى» گازەتىندە جاۋاپتى حاتشى قىزمەتىن اتقارعان ادىلبەك جاپاق «بولاشاق» باعدارلاماسىمەن وقۋعا تۇسكەندە شىن قۋانىپ, ىنىمىزگە ءسات ساپار تىلەگەنبىز. ەندى تاعى وسىنداي قۋانىشتى باسىمىزدان كەشىپ وتىرعان جايىمىز بار. ۇجىمىمىزعا قوسىلعانىنا ءبىر جىلداي عانا ۋاقىت بولعان دارىندى جۋرناليست قارىنداسىمىز بوتاگوز ماراتقىزى لوندونعا جۋرناليستىك شەبەرلىگىن شىڭداۋعا اتتانعالى وتىر.
بوتاگوز ورتامىزعا كەلگەندە تالابى تاۋداي قىز ەكەنىن بىردەن بايقاتتى. ول بىردەن باسىلىمىمىزعا «الەۋمەتتىك ەكسپەريمەنت» دەگەن تىڭ ايدار قوستى. جاس جۋرناليست بۇل ايدارمەن شىعاتىن ماقالالارىندا قوعامدا وزەكتى بولىپ وتىرعان ماسەلەلەردى كوتەردى. ماسەلەن, تەمەكى شەگەتىن اياعى اۋىر ايەلگە سىرتتىڭ كوزقاراسىن باعامدادى. جۇرتتىڭ قالا تازالىعىنا قالاي قارايتىنىن پايىمداپ كوردى. تاعى وسى سياقتى وقىرماندى بەيجاي قالدىرمايتىن تاقىرىپتاردى قوزعاپ, ىزدەنىمپازدىعىن تانىتتى.
قازىر اعا بۋىن جۋرناليستەردىڭ اراسىندا دا ونىڭ وقىرماندارى بار دەپ ايتساق, قاتەلەسە قويماسپىز. مىسالى, گازەتىمىزدە ىستەپ كەتكەن ءورىس ءياشۇكىرقىزىنان بىلتىر سۇحبات العان ءارىپتەسىمىز ازامات ەسەنجول ول اپاي بوتاگوزدىڭ قالام سىلتەسىنە سۇيسىنەتىنىن ايتىپ كەلگەن. تاعى سول ازامات قۇرداسىم «بوتاگوزدىڭ ماتەريالدارىن راحاتتانىپ وقيسىڭ» دەپ ايتادى. بۇل – شىن ءسوز. ءجۋرناليستىڭ تالانتىنا بەرىلگەن ءادىل باعا. كەزەكشىلىك كەزىندە سىرەسكەن ماقالالار كەزدەسەدى. امال جوق, وقۋعا تۋرا كەلەدى. ال بوتانىڭ ماتەريالدارىنان جىلىلىقتىڭ لەبى ەسەدى. ونىڭ قويعان تاقىرىپتارىنىڭ ءوزى ۇيقاسىپ تۇرادى. وندايدا ارىپتەس قارىنداسىمىزدىڭ بويىندا اقىندىق ونەر بۋلىعىپ تۇر-اۋ دەپ ويلايمىز. كىم بىلەدى, تىعىلىپ ءجۇرىپ ولەڭ جازاتىن دا بولار. ايتەۋىر, پوەزيانى جاقسى كورەتىنى بايقالادى. جۇمىستاعى ءمادينا, گۇلدانا سىندى سىرلاستارى دا ونىڭ ولەڭدى مانەرلەپ وقىعاندى جاقسى كورەتىنىن ايتادى.
ايتپاقشى, بوتاگوز كەز كەلگەن تاقىرىپتا ەركىن كوسىلەتىنىمەن دە ۇجىمدى ءتانتى ەتۋدە. شارۋاشىلىق بولسىن, الەۋمەتتىك, مادەني تاقىرىپتاردى جازۋدا دا ارىپتەستەردەن قالىسپايدى.
كورنەكتى اقىن جۇماتاي جاقىپباەۆتىڭ «قول بۇلعار» اتتى ولەڭىندە:
جاس داناعا جانى قۇمار جان از با,
جاقسى ونەردىڭ جاڭا تۋعان ۇركەرى.
كەستە توكشى قارا سوزبەن قاعازعا,
قيالىڭمەن توقىشى ءبىر شىلتەرى.
…تەك شاراپات كۇتسىن سەنەن ىزگى ەلىڭ,
ەڭ كيەلى بورىشىڭدى ورىندا.
قالدىرمايتىن ساۋساعىنىڭ ىزدەرىن
تابيعاتتىڭ قولى بولسىن قولىڭ دا – دەگەن جىر جولدارى بار. شەتەلگە وقۋعا باراتىن دارىندى قارىنداسىمىزعا ءبىز دە سونى تىلەيمىز.
امانعالي قالجانوۆ
