مەملەكەت باسشىسى نۇرسۇلتان نازارباەۆتىڭ پارلامەنت پالاتالارىنىڭ بىرلەسكەن وتىرىسىندا «پرەزيدەنتتىڭ بەس الەۋمەتتىك باستاماسى» اتتى حالىققا ۇندەۋىندە ەلدى گازبەن قامتاماسىز ەتۋ تۋرالى ناقتى ايتىلعان بولاتىن. بۇل تۇرعىدا ۇكىمەت ءتيىستى جۇمىستاردى قولعا الدى.
قازىرگى تاڭدا استانانى, ەلىمىزدىڭ ورتالىق جانە سولتۇستىك وڭىرلەرىن گازداندىرۋ ماقساتىندا گاز جانە گازبەن جابدىقتاۋ سالاسىنداعى ۇلتتىق وپەراتور «قازترانسگاز» اق «سارىارقا» ماگيسترالدى گاز قۇبىرىنىڭ قۇرىلىسى» جوباسىن ازىرلەدى. وعان «مەمساراپتاما» رمك وڭ تۇجىرىم جاسادى. مينيسترلىكتىڭ گاز ونەركاسىبىن دامىتۋ دەپارتامەنتىنىڭ ديرەكتورى زياش قياقباەۆتىڭ مالىمەتىنشە, قازىرگى تاڭدا «قازترانسگاز»
اق 2018 جىلدىڭ ماۋسىم ايىندا مەملەكەتتىك ساراپتامادان وتكىزگەننەن كەيىن ىسكە قوسۋ جوسپارلانعان, جوبالىق-سمەتالىق قۇجاتتامانى ازىرلەۋ ۇستىندە.
– بۇگىندە مۇددەلى مەملەكەتتىك ورگاندار مەن ۇيىمداردىڭ قاتىسۋىمەن اتالعان جوبانىڭ 1-كەزەڭىن ىسكە اسىرۋعا قاتىستى ماسەلەلەردى پىسىقتاۋعا بايلانىستى, سونىڭ ىشىندە ەققدب, ەادب سەكىلدى حالىقارالىق قارجى ينستيتۋتتارىنان, سونىمەن قاتار قازاقستان دامۋ بانكى مەن باسقا دا كوزدەردەن قاراجات تارتۋ ارقىلى ءتيىستى شارتتار مەن قارجىلاندىرۋ سحەماسى بويىنشا جۇمىس توبى قۇرىلۋدا. وسى جىلدىڭ ماۋسىم ايىنا دەيىن قارجىلاندىرۋ ءماسەلەلەرىن شەشۋ جانە شىلدە ايىنىڭ باسىندا ماگيسترالدى گاز قۇبىرىنىڭ العاشقى تورابىن دانەكەرلەۋدىڭ سالتاناتتى ءراسىمىن وتكىزۋ جوسپارلانىپ وتىر, – دەيدى زياش قياقباەۆ. – جوبانى جۇزەگە اسىرۋ جىل سايىن جەتس – 1,2,3 سۋ جىلىتاتىن قازاندارىندا جاعىلاتىن كومىردىڭ ورنىن الماستىرۋ ارقىلى استانا ءۇشىن الەۋمەتتىك-ەكونوميكالىق جاعىنان پايدالى اسەرىن تيگىزەدى. قىسقارتۋدىڭ ىقپالى جىلىنا 36,1 مىڭ توننا لاستاۋشى زاتتار شىعارىندىلارى بولادى. سونداي-اق حالىق كومىردىڭ ورنىنا تابيعي گازدى پايدالانۋدى ءجون سانايدى دەپ ەسەپتەيمىز, ويتكەنى گازدى وتىن رەتىندە پايدالانۋ – ەڭبەكتى از تالاپ ەتەدى ءارى سالىستىرمالى تۇردە ىڭعايلى.
دەپارتامەنت ديرەكتورىنىڭ ايتۋىنشا, «قازترانسگاز» اق اقپاراتىنا سايكەس, جوبانى قارجىلاندىرۋ باستالعاننان كەيىن «قىزىلوردا – جەزقازعان – قاراعاندى – تەمىرتاۋ – استانا» باعىتى بويىنشا ماگيسترالدى گاز قۇبىرىنىڭ 1-كەزەڭى ءبىر جىل ىشىندە ءجۇزەگە اسىرىلادى دەپ كوزدەلگەن. جالپى «سارىارقا» ماگيسترالدى گاز قۇبىرىنىڭ 1-كەزەڭىنىڭ قۇنى 267,3 ملرد تەڭگەنى قۇرايدى ەكەن.
