ەلورداداعى تەاترلاردىڭ قاتارىنا تاعى ءبىر ونەر ۇجىمى قوسىلدى. «قازاقكونتسەرت» مەملەكەتتىك كونتسەرتتىك ۇيىمى جانىنان اشىلعان «Astana Musical» تەاترى العاشقى پرەمەراسىن الداعى كۇزدە كورەرمەن نازارىنا ۇسىنباق. «عاشىقتار جىرى» اتاۋىن العان بۇل تۋىندى ايگىلى «دوس-مۇقاسان» ءانسامبلى رەپەرتۋارىنداعى اندەردەن تۇرادى.
جاڭا تەاتردىڭ كوركەمدىك جەتەكشىسى اسحات ماەميروۆتىڭ ايتۋىنشا, بولاشاقتا «قىز جىبەك» شىعارماسىن ميۋزيكل فورماتىندا ساحنالاۋ دا جوسپاردا بار. «شىققانىنا 500 جىلدان استام ۋاقىت بولعان ۇلتىمىزدىڭ كونە ەپوسى «قىز جىبەكتى» حالىق قازىردە كينو جانە وپەرا ونەرلەرى ارقىلى قابىلدايدى. ال ءبىز بۇل تۋىندىنى ميۋزيكلگە اينالدىرماقپىز. جاستار اۋديتورياسىنا ۇلتىمىزدىڭ كونە مۇراسى سانالاتىن شىعارمانى بۇل جانر ارقىلى قابىلداۋعا جەڭىل بولادى دەپ ويلايمىن. ونىڭ ۇستىنە ەپوستىڭ تاقىرىبى دا اسا قىزىقتىرارلىق. حالقىمىزدىڭ سالت-داستۇرىنەن ءنار العان ەپوستا ادامزات بالاسىنا ءتان بارلىق مىنەزدەر مەن سەزىمدەر كەزدەسەدى. ونىڭ ۇستىنە كەشەگى ۇلى كومپوزيتورلارىمىز نەگىزىن قالاپ كەتكەن شىعارمانىڭ مۋزىكالىق ماتەريالى دا عاجاپ» دەيدى ول.
ا. ماەميروۆتىڭ پىكىرىنشە, استانادا اشىلعان تەاتر ميۋزيكلداردى قويىپ, ورتا ازيا جانە قازاقستان تاريحىندا ونەردىڭ بۇل سالاسىندا ءدۇمپۋ تۋدىرىپ, جاڭاشىلدىق اكەلمەك. راسىمەن دە, ميۋزيكل – ۇلتىمىزعا ءالى دە تاڭسىقتاۋ جانر. ال, اتالمىش ونەر ۇجىمىنىڭ قويىلىمدارى ارقىلى استانا مادەنيەتىن جاڭا ساپاعا شىعارىپ, قازىرگى دەڭگەيىنەن بيىك دارەجەگە كوتەرۋ كوزدەلۋدە. «Astana Musical» تەاترى دا قازاقستان رەسپۋبليكاسىنىڭ مادەني ساياساتىنىڭ تۇجىرىمداماسىن ىسكە اسىرۋ اياسىندا اشىلعان. دەمەك, ونەر وشاعى ساحنالايتىن تۋىندىلار دا سوعان ساي كەلۋى ءتيىس. اسىرەسە, كەلەسى جىلى ەلوردادا وتەتىن «ەكسپو-2017» حالىقارالىق مامانداندىرىلعان كورمە كەزىندە تەاتر ۇجىمىنا ۇلكەن سالماق تۇسكەلى تۇر. الەمنىڭ ءار ەلىنەن قازاقستانعا اعىلاتىن قوناقتاردىڭ الدىندا ۇياتقا قالماس ءۇشىن تەاتر ۇجىمى قازىردەن قامدانا باستادى. الداعى جىلى تەاتر «We Will Rock You» («ءبىز ءسىزدى تاڭعالدىرامىز») ميۋزيكلىنىڭ پرەمەراسىن وتكىزۋدى جوسپارلاپ قويدى. بۇل جوبا بريتانيانىڭ تەاتر ماماندارىمەن بىرىگىپ, جۇزەگە اسىرىلماق. ال ونىڭ العاشقى كورەرمەندەرى «ەكسپو -2017» كورمەسىنىڭ قوناقتارى مەن قاتىسۋشىلارى بولماق.
«We Will Rock You» – گيننەستەر رەكوردتار كىتابىنا ەنگەن تانىمال تۋىندى ەكەنىن ايتا كەتەيىك. اتاقتى «Queen» توبىنىڭ رەپەرتۋارىنداعى اندەردەن تۇراتىن ميۋزيكلگە بريتاندىق رەجيسسەرلەر, حورمەيستەر مەن حورەوگراف قاتىسادى. ال اندەردى قازاقستاندىق ارتىستەر ورىنداماق. وعان ەلىمىزدىڭ ۇزدىك انشىلەرى دە تارتىلماق. قازىرگى تاڭدا بۇل قويىلىمعا قاتىساتىن ونەرپازداردى ىرىكتەۋ ءۇشىن كاستينگ جاريالاندى. ا. ماەميروۆتىڭ سوزىنشە, وعان انشىلىك ونەرى بار كەز كەلگەن ادام قاتىسا الادى. «ميۋزيكلگە قاتىساتىن ءالى 10-20 ادام جەتپەي تۇر. سوندىقتان 10 قىركۇيەك كۇنى اشىق كونكۋرس وتكىزەمىز. ول «قازاقستان» ورتالىق كونتسەرت زالىندا ۇيىمداستىرىلادى. بۇل قويىلىمدى قويۋ الەمدىك تاجىريبە الۋىمىز ءۇشىن قاجەت بولدى. ەگەر بۇل ميۋزيكل ءساتتى شىعىپ جاتسا, بولاشاقتا الەمدىك ارەنادا ءوزىمىزدىڭ قازاقستاندىق قويىلىمدارىمىزدى كورسەتە الامىز» دەيدى «Astana Musical» تەاترىنىڭ كوركەمدىك جەتەكشىسى.
امانعالي قالجانوۆ
