استانا قالاسىنىڭ اكىمى باقىت سۇلتانوۆ وزبەكستاننىڭ ولي ءماجىلىسىنىڭ زاڭ شىعارۋ پالاتاسى سپيكەرى نۋردينجون يسمويلوۆپەن كەزدەستى.
كەزدەسۋدە قازاقستان مەن وزبەكستان اراسىنداعى قارىم-قاتىناستىق نىعايىپ كەلە جاتقاندىعى ءسوز بولدى. كەيىنگى جىلدارى ەكى ەل اراسىنداعى ساۋدا-ەكونوميكالىق ارىپتەستىك جاڭا دەڭگەيگە كوتەرىلگەن. ايتالىق, سوڭعى 9 ايدىڭ ىشىندە ەكى مەملەكەت اراسىنداعى تاۋار اينالىمى 2 ملرد دوللارعا جەتكەن. ەلوردا باسشىسىنىڭ ايتۋىنشا, وتكەن جىلى استانا مەن وزبەكستان اراسىنداعى تاۋار اينالىمى 288 ملن اقش دوللارىن قۇراعان. ونىڭ ىشىندە ەكسپورت – 174 ملن, يمپورت – 114 ملن اقش دوللارىن قامتىعان. استانا قالاسىنىڭ اكىمى ەكى ەل ۇكىمەتىنىڭ كولىك-لوگيستيكا ينفراقۇرىلىمىن دامىتۋعا قاتىستى قابىلدانعان قۇجاتتار ەكى تاراپتىڭ تاۋار اينالىمىن ودان ءارى ۇلعايتا تۇسەتىنىنە سەنىم ءبىلدىردى.
«استانا – الەمدەگى ەڭ ادەمى قالالاردىڭ ءبىرى. قازاقستان پرەزيدەنتى نۇرسۇلتان نازارباەۆتىڭ
تاۋەكەلشىلدىگىنىڭ ارقاسىندا وسىنداي اسەم قالا سالىندى. بۇل شاھار ماعان دا ۇنايدى. وعان جەل دە, اياز دا كەدەرگى كەلتىرمەيدى» دەدى نۋردينجون
يسمويلوۆ. سونىمەن قاتار سپيكەر قازاقستان پرەزيدەنتىنىڭ «ۇلى دالانىڭ جەتى قىرى» اتتى ماقالاسىنان ۇلكەن اسەر العاندىعىن جەتكىزدى. ول سونداي-اق, ءوز سوزىندە وزبەكستاننىڭ باس شاھارى تاشكەنتتىڭ استانانىڭ ەڭ ءبىرىنشى سەرىكتەسى بولعانىن, وسى جىلى ەكى ەل استاناسىنىڭ اراسىندا ساۋدا-ەكونوميكا, عىلىمي-تەحنيكا جانە مادەني ارىپتەستىك تۋرالى ۋاعدالاستىققا قول قويىلعانىنا 20 جىل تولعاندىعىن اتاپ ءوتتى.
