استانا الاتاۋدان ارقاعا اۋىسار شاقتا ەلورداسى بولاتىن شاھار جايلى ۇزدىك انگە بايقاۋ جاريالاندى. بۇل ونەر جارىسىندا اقىن امانگەلدى جۇمابەك ءسوزىن جازعان ەسكەرمەس يمانبايدىڭ «اقمولا – باس قالام» ءانى وزىپ شىقتى. ءاندى وسىدان 20 جىل بۇرىن استانانىڭ حالىقارالىق تۇساۋكەسەرىندە بەلگىلى ءانشى, اكتەر نۇراي تاناباەۆ جالپاق جۇرتقا تانىستىردى.
«ەسكەرمەس ەكەۋمىز بۇدان بۇرىن دا بىرنەشە ءان جازدىق. وسىنداي بايقاۋ جاريالانعان سوڭ ول ماعان قولقا سالدى. بايقاۋعا تۇسكەن شىعارمالاردى مارقۇم نۇرعوجا وراز باستاعان قازىلار القاسى قارادى. قورىتىندى وتىرىس 1997 جىلدىڭ ساۋىرىندە م. گوركي اتىنداعى ورىس دراما تەاترىندا ءوتتى. سوندا باس بايگە بىزگە بەرىلدى» دەيدى ا. جۇمابەك.
اقمولا وبلىستىق فيلارمونياسىنىڭ ۇلت اسپاپتارى وركەسترىنىڭ سۇيەمەلدەۋىمەن (ديريجەرى نۇرلان حامزين) تىڭدارماندارعا جول تارتقان ءان ۇزاق ۋاقىت ورىندالماي كەتتى. استانا مەن پولشانىڭ گدانسك قالاسى باۋىرلاسقاننان كەيىن بۇل تۋىندى سول ەلدە شىرقالدى.
«بۇدان سوڭ ءانىمىز جوعالۋعا اينالدى. استانا تۋرالى باسقا اندەر شىعىپ جاتتى. سونىڭ ىشىندە ەربول شايمەردەنۇلى مەن مارات وماروۆتىڭ «ارمان قالا – استانا» اتتى جاقسى ءانى تۋدى. بىراق ءوزىم ءانىمىزدىڭ بەينە نەمەسە اۋديونۇسقالارىن ىزدەۋگە كىرىستىم. ۇزاق ۋاقىت تابىلمادى. تەلەۆيزيا ارداگەرى رافاەل جۇماباەۆ قايتىس بولارىنان 3-4 جىل بۇرىن بولۋى كەرەك, بۇل ءاندى تاۋىپ بەردى. ماعان ءسۇيىنشى سۇراپ حابارلاستى. كەيىننەن ماگنيتوفون كاسسەتاسىنا جازىپ, اكەلىپ بەردى. ءاننىڭ تاريحى وسىنداي» دەيدى اقىن.
