قازاقستان پرەمەر-ليگاسىنىڭ 18-تۋرىندا «استانا» ءوز الاڭىندا قاراعاندىنىڭ «شاحتەر» كلۋبىن قابىلدادى.
وتكەن تۋردا قوستانايدان جەڭىسسىز قايتقان «استانا» بۇل ويىنعا جايباراقات قارامادى. دەگەنمەن الدا چەرنوگوريا ەلىندە جاۋاپتى ماتچ كۇتىپ تۇرعانىن ەسكەرگەن ەلوردالىقتار نەگىزگى قۇرامنىڭ ءبىردى-ەكىلى ويىنشىسىن دەمالدىرۋدى ءجون ساناپتى.
«استانا» ادەتتەگىدەي ويىن تىزگىنىن وزدەرى ۇستادى. بىراق جىلدام گول سالۋدىڭ رەتى كەلمەدى. يگور ششاتسكي كۇزەتكەن «شاحتەر» قاقپاسىنا الاڭ يەلەرى اجەپتاۋىر قاۋىپ ءتوندىردى. ءبىراز شابۋىلعا تويتارىس بەرگەن شاتسكي ويىننىڭ بەل ورتاسىنا تاياعاندا جاراقات الىپ قالدى. ول كەتىسىمەن العاشقى گول دا كەلدى. 44-مينۋتتا وڭ قاپتالعان كوتەرىلگەن دوپتى ابزال بەيسەبەكوۆ قاقپاعا باعىتتاپ, ونى قاقپاشى قايتارعان. بىراق كەيىن سەرپىلگەن دوپتى الەكسەي ششەتكين گولعا اينالدىرىپ كەتتى.
ەكىنشى تايمدا «استانا» ەكپىندەتە شابۋىلدادى. ەسەپتى ەسەلەيتىندەي ساتتەر كوپ بولدى. دەگەنمەن شەشۋشى گول ويىننىڭ سوڭىندا ءبىر-اق سوعىلدى. 82-مينۋتتا مارين توماسوۆ ايىپ الاڭىنان سىرتىنان تەۋىپ, الىس بۇرىشتى ءدال كوزدەدى. ەسەپ – 2:0.
قالعان ويىندارعا كەلسەك, «قايرات» ءوز الاڭىندا «جەتىسۋدان» 2:1 ەسەبىمەن باسىم ءتۇستى. ال «ەرتىس» شىمكەنتتىڭ «ورداباسى» كومانداسىنا ەسە جىبەرسە (1:2), «اقتوبە» «اتىراۋدى» تاس-تالقان ەتىپ ۇتتى (5:1). سونداي-اق, «اقجايىق» «قىزىلجاردى» قاپى قالدىرىپ (2:0), «قايسار» «توبىلمەن» تەڭ ءتۇستى (2:2).
