استانا اكىمى ادىلبەك جاقسىبەكوۆتىڭ توراعالىعىمەن وتكەن كەزەكتى اپپاراتتىق جيىن بارىسىندا تۇرعىندارعا كورسەتىلەتىن قىزمەت ساپاسى, ينۆەستيتسيا تارتۋ, جاڭا وقۋ جىلىنا قالا مەكتەپتەرىن دايىنداۋ جانە تاعى دا بىرقاتار وزەكتى ماسەلەلەر تالقىلاندى دەپ حابارلايدى قالا اكىمىنىڭ ءباسپاسوز قىزمەتى.
وتكەن اپپاراتتىق جيىنداردىڭ بىرىندە ەلورداداعى سۋپەرماركەتتەردىڭ, ساۋدا ورتالىقتارى مەن دەنساۋلىق ساقتاۋ مەكەمەلەرى, سونداي-اق, وزگە دە الەۋمەتتىك نىسانداردىڭ حالىققا كورسەتەتىن قىزمەتتەرىنىڭ ساپاسىن ارتتىرۋ بويىنشا ماسەلە كوتەرىلگەن بولاتىن. بۇل ماسەلەگە تۇرعىندار دا ءۇن قوستى. شارا باسشىسى اتاپ وتكەندەي, قالالىق قۇرىلىمداردىڭ باستى جۇمىس باعىتى ەلوردالىق سەرۆيس دەڭگەيىن جانە حالىققا كورسەتىلەتىن بارلىق قىزمەت تۇرلەرىنىڭ ساپاسىن ارتتىرۋ بولۋى كەرەك.
اكىمنىڭ پىكىرىنشە, بيۋدجەت ساياساتىندا مەملەكەتتىك-جەكە مەنشىك سەرىكتەستىك تەتىكتەرىن ءجيى پايدالانىپ, ينۆەستورلاردى تارتۋ قاجەت. ەلوردا باسشىسى استانادا ينۆەستيتسيالىق قولايلى جاعداي جاساۋ ەڭ وزەكتى ماسەلە بولىپ وتىرعانىن اتاپ ءوتتى. ەلوردادا 27-30 قازان ارالىعىندا وتەتىن «Astana Invest – 2015» VI حالىقارالىق ەكونوميكالىق فورۋمى دا وسى تۇيتكىلدى ماسەلەلەردى شەشۋگە ارنالادى.
– بۇل جۇمىسقا نەمقۇرايلى قاراماۋ كەرەك. كەدەرگىلەردى جويۋ جونىندەگى مەنىڭ قويعان تالاپتارىم شۇعىل تۇردە جۇزەگە اسۋى قاجەت, – دەدى اكىم.
قالا مەكتەپتەرىنىڭ جاڭا وقۋ جىلىنا دايىندىعى جانە ولاردىڭ جاعدايى جاقسى بولعانىمەن, اكىم بىرقاتار كەمشىلىكتەرگە دە توقتالا كەتتى.
– كوپتەگەن قالا مەكتەپتەرىنىڭ اۋلالارىندا سانيتارلىق جاعداي باقىلانبايدى. ماسەلەن, سالبىراپ تۇرعان ەلەكتر سىمدارى بالالارعا جاراقات سالۋى مۇمكىن. مەكتەپ اۋلالارىندا تۇرعىلىقتى مەكەن-جايى جوق ادامداردىڭ ءجۇرۋى دە دۇرىس ەمەس. مۇنىڭ ءبارىن مەكتەپ ديرەكتورلارى عانا ەمەس, قالانىڭ قۇزىرەتتى ورگاندارى دا قاداعالاۋ كەرەك, – دەدى ءا.جاقسىبەكوۆ.
تاعى ءبىر وزەكتى ماسەلە – ۆوكزال اۋماعىنداعى جاعداي. قايىرشىلار مەن «تۇنگى كوبەلەكتەردىڭ» قىزمەتىن ۇسىناتىن «جەڭگەتايلار» جانە باسقا دا ۆوكزال اۋماعىنداعى قىم-قۋىت تىرلىكتىڭ ءبارى قالا تۇرعىندارى مەن قوناقتارى تاراپىنان كوپتەگەن سىنعا تۇرتكى بولادى.
– مىسالى, «ۆەچەرنيايا استانا» گازەتىنىڭ سەنبىلىك نومىرىندە ءتىلشى وزگە قالادان كەلگەن ادام رەتىندە كورىنىپ, ۆوكزال اۋماعىنداعى ءومىردىڭ بارلىق قىر-سىرىن اشىپ بەرگەن. بۇل كەشە عانا ورىن العان جاعداي ەمەس. ىشكى ىستەر دەپارتامەنتىنەن ۆوكزال اۋماعىن تازارتۋ جونىندە شارا قابىلداۋدى تالاپ ەتەمىن, – دەدى اكىم.
قالا باسشىسىنىڭ ايتۋىنشا, پيك توراعالارى تۇرعىندارمەن تىكەلەي بايلانىستا بولىپ, ءاربىر شاعىم مەن وتىنىشكە دەر كەزىندە جاۋاپ قاتۋلارى كەرەك.
ەلوردانىڭ بەزەندىرىلۋى دە, اكىمنىڭ پىكىرىنشە, كوپ سىننىڭ استىندا قالىپ جاتادى. استانانىڭ كۇندىزگى جانە تۇنگى بەزەندىرىلۋى قازىرگى ەلوردانىڭ بەت-كەلبەتىنە ساي ەمەس.
– ەسكى ماتەريالدار, گيرلياندالار, جارىق ديودتى شامدار قولدانىلعان. مۇنىڭ بارلىعى دا ەسكىرىپ بىتكەن. جاڭا, جوعارى تەحنولوگيالىق ماتەريالداردى پايدالانۋ كەرەك. ءبارى بىرىڭعاي قاعيداعا باعىنۋ كەرەك, – دەي كەلىپ, اكىم وسى جۇمىستى باقىلاۋدى قالا قۇرىلىسى جانە ساۋلەت باسقارماسىنا تاپسىردى.
قورىتىندىلاي كەلە, ءا.جاقىبەكوۆ استانا قالاسىندا تۇرعىندارعا كورسەتىلەتىن قىزمەت ساپاسى ەلوردا مارتەبەسىنە ساي بولۋى كەرەكتىگىن تاعى ءبىر اتاپ ءوتتى. سوندىقتان, قالا قۇرىلىمدارى تۇرعىندار مەن قالا قوناقتارىنا ىڭعايلى جاعداي جاساۋ ءۇشىن بارلىق سالالارداعى كەمشىلىكتەردى جويۋلارى كەرەك.
