ەل تاۋەلسىزدىگىنىڭ 25 جىلدىعى قارساڭىندا «Kazakhstan Kids Fashion Show-2016» اتتى بالالار ءسان كورسەتىلىمى وتاندىق ديزاينەرلەردىڭ تۋىندىلارىن پاش ەتتى.
«Kazakhstan Kids Fashion Show-2016» جوباسى وسىمەن ءتورتىنشى مارتە ماحاببات ەسەن مەن جۇلدىز سەيسەنبەكوۆانىڭ ۇيىمداستىرۋىمەن ءوتتى. 4-16 جاس ارالىعىنداعى قاتىسۋشىلار بالالارعا ارناۋلى تىگىلگەن توپتامالارمەن ءسان شەرۋىنە شىقتى. كورسەتىلىم شىمىلدىعىن «اسىل-ديزاين» ءسان ءۇيىنىڭ جەتەكشىسى ايدارحان قاليەۆتىڭ كوللەكتسياسى اشتى. ءسان الەمىندە 25 جىل بويى ەڭبەك ەتىپ كەلە جاتقان ديزاينەردىڭ كيىمدەرى قازاقىلىققا تۇنىپ تۇر. كورسەتىلىمنىڭ ءوزى دە قازاقى ناقىشتا, حالىق جانە ەسترادا اندەرىنىڭ سۇيەمەلدەۋىمەن ءوتتى.
ەكىنشى بولىپ ديزاينەر انەل رايىم ءوزىنىڭ «KaroMeli» اتتى ءسان توپتاماسىن تانىستىردى. ساحناعا جوبانىڭ ەڭ كىشكەنتاي قاتىسۋشىلارى ۇلپىلدەگەن كويلەكتەرىمەن شىعىپ, كورەرمەن كوزايىمى اتاندى.
«Glasman» ءسان ءۇيى ەر بالالارعا ارنالعان كوستيۋمدەرمەن كوزگە ءتۇستى. ال «ILATI» قىزداردىڭ نازىكتىگىن ايقىنداي تۇسەتىن شىلتەر ماتاسىن ۇتىمدى پايدالاندى. ودان بولەك, مايا جۇمانبەكوۆا, دينارا چاكاروۆا سىندى وتاندىق ديزاينەرلەر مەن Samidel, Vesta, LOGOVO ءسان ۇيلەرى جوباعا قاتىسىپ, سانقويلاردىڭ كوڭىلىنەن شىقتى. وسى رەتتە ءبىز «I Am Different» توپتاماسىمەن توبە كورسەتكەن زارينا اقشولاقوۆانى اڭگىمەگە تارتتىق.
– بالالار توپتاماسىن العاش رەت ۇسىنىپ وتىرمىن. ماعان جاسوسپىرىمدەرمەن جۇمىس ىستەۋ بۇيىردى. كيىمدەر دە وتپەلى كەزەڭدەگى جەتكىنشەكتەرگە لايىقتى ەتىپ تىگىلدى. كوبىنەسە اق, قارا جانە جالبىز ءتۇستى جاسىلعا باسىمدىلىق بەرىلدى. ءبىر-بىرىنە ءۇيلەسپەيتىن ماتەريالداردى توعىستىرىپ, تۇتاس تۋىندى جاساپ شىعارۋعا تىرىستىم. ماقسات – ءوسىپ كەلە جاتقان ۇرپاقتىڭ ەرەكشە ەكەنىن كورسەتىپ, دارالىعىن تانىتۋ, – دەيدى زارينا.
ايەل ادامى سانگە جاقىن كەلەتىنى بەلگىلى, دەگەنمەن كورسەتىلىمدە بالالارىنا قولداۋ كورسەتۋگە كەلگەن اكەلەردى دە كەزدەستىردىك. سونىڭ ءبىرى – 11 جاسار ەلجاننىڭ اكەسى ەرلان جوبا تۋرالى مىناداي پىكىر ءبىلدىردى. «باستاپقىدا قارسى بولدىم, كەيىن بالام ءوزى قاتىسۋعا نيەتتى ەكەنىن ءبىلىپ, بەتىن قاقپادىم. ساحنادا ءجۇرىپ, بوي تۇزەپ, اشىلا باستادى. بالادان ءسانقوي جاساۋدى كوزدەمەيمىز, ۇياڭدىعىنان ارىلىپ, سەنىمدىلىگى ارتسا دەيمىن» دەدى ول.
بەس بالانىڭ اناسى ايجان سادىقوۆا دا بۇل ويدى جالعاستىردى. «بالالاردىڭ تاربيەسى تىكەلەي مەنىڭ موينىمدا. بىلتىر ءسان كورسەتىلىمىنە ءتورت بالام قاتىسسا, بيىل ارۋجان, حانزادا, ايبارىس ەسىمدى بالالارىم وزدەرىن مودەل رەتىندە بايقاپ كورۋدە. ەڭ ۇلكەنى – 13, ال كىشىسى – 4 جاستا. ۇلكەن قىزىم ارۋجاننىڭ ءجۇرىس-تۇرىسىندا, سويلەۋ مانەرىندە وزگەرىس بايقادىم, تالعامى ءتۇزەلىپ, قالىپتاسىپ قالدى. بىلتىر ەكىنشى قىزىممەن جوبا اتىنان ميلانعا بارىپ, بالالار ءسان توپتاماسىن تانىستىردىق. وسى جىلى قازاقتىڭ ۇلتتىق كيىم ۇلگىلەرىن تانىستىرۋعا سان-مارينوعا جولداما الدىق» دەپ ءسوزىن اياقتادى ول. بالالاردىڭ ونەرىن تاماشالاۋعا كوپ بالالى انا جۇبايىمەن بىرگە كەلگەن ەكەن. كورسەتىلىم وتباسى قۇندىلىقتارىن ناسيحاتتايتىنى وسىدان-اق بەلگىلى.
كەش سوڭىندا جوبانىڭ پروديۋسەرى ماحاببات ەسەنمەن تىلدەسۋگە مۇمكىندىك الدىق.
– جۇكتەلگەن جاۋاپكەرشىلىكتى ابىرويمەن الىپ شىقتىق دەۋگە بولادى, ءۇمىتىمىز اقتالدى. بۇگىن – ءبىز ءۇشىن, بالالار مەن ولاردىڭ اكە-شەشەلەرى ءۇشىن ءۇلكەن مەرەكە. استانانىڭ ايازى شوۋدى تاماشالاۋعا كەلگەن كورەرمەنگە توسقاۋىل بولمادى. ءبىر-بىرىمىزگە جاقسى كوڭىل-كۇي سىيلادىق دەپ ۇمىتتەنەمىن, – دەدى ول.
ايتا كەتەرلىگى, وسى جىلى «Kazakhstan Kids Fashion Show-2016» ورتالىق ازياداعى ەڭ ۇزدىك بالالارعا ارنالعان شوۋ ءمارتەبەسىنە يە بولدى.
گۇلدانا تالعاتقىزى